Yeremia 19 - AHYERƐLƐ KRONGRON

Kulie bɔ wabɔ ne

¹ Bɔ AWURADE kã ɛhe, “Kɔtɔ ngukuenwonɛniɛ ye kulie. Fa maen ne anu mbanyi ne bie ne asɔfo mbanyi nemɔ bie boka wɔ nwo so,

² ná kɔ Hinom Awa bɔnza bɔ ɔwɔ Nyangaa Bue Pambim ne noa ne anu. Na bɔ edwirɛ bɔ ngɔhã ngohyire wɔ ne dawure wɔ berɛ.

³ Kã kyɛ, ‘Ao Yuda ahemvo ne Yerusalemfoɛ, ɛ́mɔtie AWURADE dwirɛ. Bɔ Asafo AWURADE Yisrael Nyameɛ kã ɛhe: Tie, ngɔprapra musue ngogua ɛwa sɔa, bɔ ebiala bɔ ɔkɔte ne, ye kunu kɔte ye ɔ.

⁴ Ofikyɛ bapo me, na bagua nekaa he anwo fiɛ, na bayera ɛyɛɛ bama nyameɛ foforɛ mɔ bɔ bɛ nana mɔ ne Yuda ahemvo bɛnze bɛ ɔ. Bahã mogya bɔ onni fɔ ɔ bagua maa wayi wa to.

⁵ Basisi Baal asɔneyɛɛ mɔ koso, kyɛ bɛyera bɛ mma mɔ wɔ see nu bɛfa bɛbɔ naen yeralɛ afɔleɛ bɛma Baal. Ɛhe te nikyee bɔ nna me yeɛ nhyɛle bɛ kyɛ bɛyɔ ɔ, nngane, yeɛ ɔwwale m’adwene nu po.

⁶ Yiti tie, AWURADE nwa nyoo: Mmerɛ bie ɔ́ba bɔ bɛngɔfrɛ ɛwa Tofete anaa Hinom Awa bɔnza ko, na mmom bɛkɔfrɛ ɛwa Akumyɛɛ bɔnza.

⁷ Ngɔma Yuda ne Yerusalem nzusuleɛ kɔyɛ mbaen wɔ wa, na ngɔmaa bɛkɔtotɔ ngrandɛ noa wɔ bɛ pɔfoɛ mɔ nyunu, ɔne bɛ bɔ bɛpena bɛ beku bɛ ɔ, bɛ sa nu. Na ngɔfa bɛ fuin ngɔma ewienu nnomaa ne aseɛ so ngaka aboyaa maa bekoli.

⁸ Ngɔma kuro ye kɔkakyi kurofoen, ɔne nikyee bɔ mmenia sobi bɛ noa begua so ɔ. Na ebiala bɔ ɔpɛ nu berɛ ne, ye nwo kodwiri ye, na okosobi ye, ɔnate ye amaneɛ ne amukoraa ti.

⁹ Ngɔmaa bɛkɔpɛ bɛ nwo bekoli bɛ mma mmienzua ne bɛ mma mmrasua mɔ naen. Na ebiala koli obiɛngo naen, ɔnate kuro ne bɔ batua ye, ɔne amaneɛ bɔ bɛ pɔfoɛ mɔ bɔ bɛpena bɛ beku bɛ ne, bamaa wato bɛ ne ati.’

¹⁰ “Na afei, bɛ bɔ bɛboka wɔ so bɛ ne wɔ bɛ́kɔ ne, bɔ kulie ne wɔ bɛ nyunu,

¹¹ ná se bɛ kyɛ, ‘Bɔ Asafo AWURADE kã ɛhe: Kyɛbɔ sona ɔbɔ ngukuenwonɛniɛ ye bua bɔ bɛngora bɛnwo ye yé ko ne, sɔ ala yeɛ ngɔbɔ maen he ne kuro he ɔ. Bekosie mmenia wɔ Tofete alaa kɔpem kyɛ bengonya aseɛ bengosie bɛ ko ɔ.

¹² Yiti AWURADE nwa nyoo: sɔaa yeɛ ngɔfa ngɔyɛ ɛwa sɔa ɔne so ama ɔ, na ngɔkakyi kuro ye kyɛ Tofete.

¹³ Na Yerusalem awuro mɔ ne Yuda ahemvo mɔ awuro mɔ, bɛ nwo kogua fiɛ te kyɛ Tofete berɛ, ɔnate awuro amukoraa bɔ bayera ɛyɛɛ wɔ bɛ ti afia bama ewienu nzramaa amukoraa, ɔne anonneɛ afɔleɛ bɔ babɔ bama nyameɛ foforɛ mɔ ne ati.’ ”

¹⁴ Yeɛ Yeremia fili Tofete, nekaa bɔ AWURADE asoma ye kyɛ ɔɔhyɛ ngɔm ne ɔwale, na oogyinane AWURADE awuro ne aluo berɛ osele maen ne amukoraa kyɛ,

¹⁵ “Bɔ Asafo AWURADE Yisrael Nyameɛ kã ɛhe: Tie, musue bɔ ngane kyɛ ngɔprapra ngogua kuro ye ne ye nwo nguro amukoraa so ne, ngɔmaa ɔkɔwa bɛ so, ɔnate kyɛ basoa bɛ kɔme so kyeinn bɔ bandie me dwirɛ ɔ.”