Yeremia 18 - AHYERƐLƐ KRONGRON

Ngukuenwonɛniɛ nwo anyandera

¹ AWURADE dwirɛ bɔ ɔlale ye ali hyirele Yeremia ɛhe:

² “Dwɔso kɔ ngukuenwonɛniɛ n’awuro, na ngɔmaa ɛkɔte me noa dwirɛ wɔ dɔ.”

³ Yiti nzili nu ngɔle ngukuenwonɛniɛ n’awuro, na nwuni kyɛ ole ye nningyein ɔyɔ ye adwuma.

⁴ Na ngukuenwonɛniɛ ne, bua bɔ né ole ɛfaa ɔnwo ne, sɔ bua ne sɛkyele wɔ ye sa nu. Na ngukuenwonɛniɛ ne, osa fa nwone bua foforɛ, kyɛbɔ okuro kyɛ ɔyɔ ye ɔ.

⁵ Yeɛ AWURADE lale ye dwirɛ ali hyirele me kyɛ,

⁶ “Ao, Yisrael awuro ama, kyɛbɔ ngukuenwonɛniɛ ne wayɔ ne, aso mengɔhora mengɔyɛ ɛmɔ sɔ anaa? AWURADE noa dwirɛ ɛne. Ao, Yisrael awuro ama, ɛ́mɔtie! Kyɛbɔ ɛfaa ne, ɔte wɔ ngukuenwonɛniɛ ne sa nu ne, sɔ ala yeɛ ɛmɔte wɔ me sa nu ɔ.

⁷ Sɛ ɔba ye kyɛ, mekã mefa maen bie anaa ahennie bie anwo kyɛ ngotutu ná mabubu ná masɛkye ye,

⁸ nakoso sɔ maen ne bɔ mahã ye nwo dwirɛ ne, onu ye nwo fi ye bɔne nwo a, ye de ngɔsesã m’adwene wɔ musue bɔ mayɛ kyɛ ngɔprapra ngogua ye so ne anwo.

⁹ Na sɛ ɔba ye kyɛ mekã mefa maen bie anaa ahennie bie anwo kyɛ ngɔkyekye ná ngɔmaa okogyina,

¹⁰ nakoso ɔyɔ bɔne wɔ me nye so, bɔ ondie me dwirɛ a, ye de ngɔsesã m’adwene wɔ ngɔsoɛ bɔ nyɛle kyɛ ngɔmaa okonya ne anwo.

¹¹ Yiti afei, kɔ Yuda mmienzua ne Yerusalemfoɛ berɛ kose bɛ kyɛ, ‘Bɔ AWURADE kã ɛhe: Tie, medwene ɛmɔ nwo adwene tɛɛ, yeɛ mesusu tɛɛ mefa ɛmɔ nwo. Yiti odi kyɛ ɛmɔ amukoraa ɛmɔsakyera befi ɛmɔ bɔne atee ne anwo, ná ɛmɔsesã ɛmɔ atee ne ɛmɔ yɔleɛ maa ɔyɛ paa.

Yisrael po Nyameɛ

¹² “Nakoso bɛnwa, ‘Anyelasoɛ biala nne berɛ! Yɛ bɔbɔ yɛ ti anu dwirɛ yeɛ yɛkoli so ɔ, na yɛ nu biala kɔbɔ ye bra kyɛbɔ ye ti anu adwene tɛɛ ne kyire ye ɔ.’

¹³ “Yiti bɔ AWURADE kã ɛhe: Ɛ́mɔbisa amaenmaen nemɔ: Nwa yeɛ wate edwirɛ he bie le ɔ? Ababunu Yisrael wayɔ nikyee bɔ ɔyɛ suro paa.

¹⁴ Lebanon asukɔtwea, aso ɔyakyi Sirion nyɔbotaen so falɛ anaa? Ye nzue yurukuku bɔ ɔtengyɛ fi dedeede ba ne, aso ɔwewe anaa?

¹⁵ Nakoso me maen de, ye wora afi me, bɛyera ɛyɛɛ mɔ bɛma mmosoen mbaen mbaen mɔ; bamaa basoti wɔ b’atee mɔ so, bafi atimbire daa nemɔ aso, bafa makyebu atee mɔ so, bɔ nna atimbire ahɔ ɔ.

¹⁶ Bama b’aseɛ ne aso ayɛ pralaa, na wayɛ nikyee bɔ mmenia sobi bɛ noa begua so afebɔɔ ɔ. Ebiala bɔ ɔpɛ nu berɛ ne, ye nwo kodwiri ye, na okopusu ye ti.

¹⁷ Ngɔyɛ kyɛ eyia afiteleɛ mvrama ngɔbɔ bɛ ngɔsande wɔ pɔfoɛ ne nyunu.” B’amaneɛnwunɛ kyẽa ne ngɔfa me si yeɛ ngɔma bɛ ɔ, na nna me nyunu ɔ.

Bɛbɔ Yeremia nwo porɛ

¹⁸ Yeɛ besele kyɛ, “Ɛmɔbra maa yɛbɔ Yeremia nwo porɛ, ofikyɛ mmeraa ne ngotu ngomini ngofi ɔsɔfo berɛ, foɛtulɛ ngotu ngomini ngofi nworɛniɛ berɛ, yeɛ edwirɛ ne koso, ongotu ngomini ngofi ngɔmhyɛlɛniɛ berɛ. Ɛmɔbra maa yɛpɛ dwirɛ yɛto ye so, na nnɛmɔmaa yɛtie ye dwirɛ biala.”

¹⁹ Ao AWURADE, tie me dwirɛ, ná tie bɔ me pɔfoɛ mɔ bɛkekã ɔ!

²⁰ Aso bɔne yeɛ bɛfa betua paa so kerɛ ɔ? Nakoso bɛ de, batu kumaa kyɛ me kra ɔte tɔ nu. Kaye kyɛ ngyinane wɔ nyunu kyɛ mekã paa mema bɛ, bɔ ɔkɔma w’ahone kɔtɔ nzue nu wɔ bɛ nwo ɔ.

²¹ Yiti maa ɛhɔen ohũhũ bɛ mma mɔ, maa bɛtotɔ ngrandɛ noa, bɛ ye mɔ, ma bɛ mma fi bɛ sa, maa bɛyɛ kunafoɛ. Ma ewue anwonyerɛ ohũhũ bɛ hu mɔ; ma bɛ mmerandeɛ mɔ totɔ ngrandɛ noa wɔ koɛ nu.

²² Ma mmenia bɛte esuɛ befi b’awuro mɔ anu, wɔ mmerɛ bɔ ɛfa koɛhonɛfoɛ kure ba bɛ so mvum nu ɔ, ofikyɛ batu kumaa kyɛ nde ndɔ nu, yeɛ basua ngaen kyɛ ɔhye me.

²³ Nakoso, ao AWURADE, ɛse bɛ porɛ amukoraa bɔ babɔ kyɛ bekohũ me ɔ. Nnɛfa b’amumuyɛɛ kyɛ bɛ, yeɛ nnɛkyikyi bɛ bɔne fi wɔ nyunu. Na mmom maa befi ase wɔ wɔ nyunu; ɛne bɛ li wɔ wɔ yaafɛlɛ mmerɛ nu.