Yeremia 17 - AHYERƐLƐ KRONGRON

Yuda bɔne ne asohwenɛ

¹ Bafa buralɛ pɛn yeɛ bahyerɛ Yuda bɔne ɔ. Bafa pɛn ne noa bɔ ɔte dɛngyɛmmoɛ ne yeɛ bakurukyire ye wɔ b’ahone poen so ɔ, ɔne b’afɔleɛ mmokyea mmɛen nemɔ aso ɔ;

² wɔ aberɛ bɔ bɛ mma mɔ bɛkaye b’afɔleɛ mmokyea ne b’Asera dosii wɔ mmakaa monɛ mɔ anwo ne pambaa ndendenn mɔ so ɔ.

³ Ao, me bokaa bɔ ɛwɔ eburo ɔ, ɔnate wɔ bɔne asɔneyɛɛ mɔ bɔ bɛwɔ w’aseɛ ne amukoraa so ne ati, ngɔfa wɔ nningyein ne w’agyapadeɛ amukoraa ngɔmaa bɛkɔfẽ bɛkɔfa.

⁴ Na w’agyapadeɛ bɔ mva mane wɔ ne, okofi wɔ sa, na ngɔmaa ɛkɔso wɔ pɔfoɛ mɔ wɔ aseɛ bɔ ɛnze so ɔ so, ofikyɛ m’ahone bɔ wahu ne, ɛmɔasuso see begua nu maa ogye afebɔɔ ɔ.”

⁵ Bɔ AWURADE kã ɛhe: “Musue to sona bɔ ɔfa ye wora wura sona nu, ná ɔfa ye nwo to sona mmokalɛ so, ná ɔye ye adwene fi AWURADE so ɔ.

⁶ Ɔkɔyɛ kyɛ ɛserɛ so bakaa, na mmerɛ paa ba a, ongonwu ye; ɔkɔtena ɛserɛ so aseɛ katerepee so, ngyee aseɛ bɔ sona biala ɔtte so ɔ so.

⁷ Sona bɔ ye wora wura AWURADE nu, bɔ AWURADE te ye anyelasoɛ ne de, onya saleɛ.

⁸ Ɔkɔyɛ kyɛ bakaa bɔ balua ye asue noa, bɔ ye ndii tende kɔ asue ne anwo ɔ. Sɛ ahuhuro ba a, onzuro, ye nyaa kɔhɔ so kɔyɛ monɛ; afoɛ bɔ wawa kɔpe ne, ɔmva ye nwo, na ɔngɔyakyi mmaasulɛ le.”

⁹ Ahone te nnakannaka tra nikyee biala, ɔte kanda paa. Na nwa yeɛ okonwu nu dwirɛ ɔ?

¹⁰ Me AWURADE, me yeɛ mepɛnzɛpɛnzɛ adwene nu, ná meso ahone menea ɔ, kyɛ metua ebiala so kerɛ kyɛbɔ ye atee si te ɔ, ɔne kyɛbɔ ye yɔleɛ si te ɔ.

¹¹ Ebiala bɔ ɔpena anwonya bɔ wamva atee paa so ne, ɔte kyɛ akɔkɔhwereɛ bɔ obutu ngyiremvua bɔ nna ye yeɛ ɔtole ɔ so ɔ; onyi ɔkɔ ye nyunu kãa a, okofi ye sa, na ye ayieleɛ nu ɔkɔyɛ kwaseaa.

¹² Animnyam ahennie bia bɔ bama so fi ahyɛaseɛ yeɛ ɔte yɛ nekaa krongron ɔ!

¹³ Ao AWURADE, Yisrael anyelasoɛ! Ebiala bɔ ɔpo wɔ ne, ye nyunu kogua ase; bɛ bɔ bɛkakyi bɛ si bɛma me ne, bɛkɔhyerɛ bɛ dumaa wɔ aseɛ so, ofikyɛ bapo AWURADE bɔ ɔte ngoa asue ti ne.

Yeremia pena AWURADE mmokalɛ

¹⁴ Ao AWURADE, sa me anwonyerɛ, na ngɔte apɔ; pepɛ de me, na ngonya ngoa, ofikyɛ wɔ yeɛ ɛte m’ayɛyelɛ ɔ.

¹⁵ Nea bɔ bɛkã bekyire me ɔ! Bɛnwa: “AWURADE dwirɛ ne, ɔwɔ nisua? Maa ɔbra e!”

¹⁶ Nakoso me de, neafoɛ adwuma bɔ ɔkɔmaa ngoli wɔ si ne, mannwati mamvi ye nwo, yeɛ musue kyẽa ne, nnneane ye ate; wɔ bɔbɔ ɛse. Bɔ ofi me noa wale ne, ɔla wɔ nyunu.

¹⁷ Nnɛyɛ wɔ nwo ebie bɔ onwunanwuna me ɔ; amaneɛnwunɛ kyẽa nu, wɔ yeɛ ɛte m’afealeɛ ɔ.

¹⁸ Bɛ bɔ bɛtane me nye ne, ma bɛ nyunu ogua ase, nakoso me de, nnɛma me nyunu gua ase; ma ahunundetelɛ tɔ bɛ so, nakoso me de, nnɛma ahunundetelɛ tɔ me so; ma musue kyẽa ne ɔto bɛ, ná bubu bɛ nu gyeingyein!

Afofikyẽalilɛ

¹⁹ Bɔ AWURADE sele me ɛhe, “Maen Mmaa Pambim bɔ Yuda ahemvo bɛfa nu bedi akɔneaba, ɔne Yerusalem pambim nemɔ amukoraa, kogyina nu berɛ,

²⁰ ná se bɛ kyɛ, ‘Ɛmɔ Yuda ahemvo ne Yudafoɛ amukoraa, yeɛ Yerusalemfoɛ amukoraa bɔ ɛmɔfa pambim nemɔ anu bewura kuro ne anu ɔ, ɛ́mɔtie AWURADE dwirɛ.

²¹ Bɔ AWURADE kã ɛhe: Ɛ́mɔnea ɛmɔ nwo yé ná ɛmɔanzoa nningyein afofikyẽa, anaa ɛmɔamva nningyein bamva Yerusalem pambim nemɔ anu bamma nu.

²² Nnɛma ɛmɔsoa nningyein befi ɛmɔ awuro mɔ nu afofikyẽa, yeɛ nnɛma ɛmɔyɔ adwuma biala, na mmom ɛ́mɔsie afofikyẽa ne krongron, kyɛbɔ nhyehyɛle mane ɛmɔ nana mɔ ne.

²³ Nakoso bandie, yeɛ banyɛ asoɛ bamma me; bɛsoale bɛ kɔme so, kyɛbɔ ɔkɔyɛ bɔ bengotie anaa bengole foɛtulɛ bɛngɔto nu ɔ.

²⁴ “ ‘Nakoso AWURADE nwa nyoo: Sɛ ɛmɔtie me dwirɛ nahorɛ nu, ná ɛmɔamva nningyein bamva kuro ye pambim nemɔ anu banwura nu afofikyẽa, na mmom ɛmɔsie afofikyẽa ne krongron, ná ɛmɔanyɔ adwuma biala sɔ kyẽa ne a,

²⁵ ye de, ahemvo ne nnehyeɛ bɔ bɛte Dawide bia so ne, bɛkɔfa pambim ye mɔ anu bekowura kuro ye anu bɔ bɛtete teaseɛnam mɔ nu ne mbɔngɔ so ɔ; bɛ ne bɛ nnehyeɛ mɔ ne Yudafoɛ ne Yerusalemfoɛ. Na mmenia kɔtena kuro ye aso afebɔɔ.

²⁶ Na mmenia kofi Yuda nguro mɔ so, nguro bɔ bapɛ Yerusalem nwo bayia nemɔ so, Benyamin aseɛ so, aseɛ frɛtɛɛ ne aso, mmokaa aseɛ nemɔ aso ne ngwaen dɔ aseɛ ne aso bɛkɔfa naen yeralɛ afɔleɛ, afɔleɛ mɔ, aburoo afɔleɛ, ayirefona, ɔne ayɛyelɛ afɔleɛ bɛkɔwa AWURADE awuro.

²⁷ Nakoso sɛ ɛmɔandie me dwirɛ, ná ɛmɔanzie afofikyẽa ne krongron, ná mmom sɛ ɛmɔsoa nningyein bɛfa Yerusalem pambim nemɔ anu afofikyẽa a, ye de ngɔto ye pambim nemɔ anu see, na ɔkɔyera Yerusalem ahemvie mɔ bɔ see ne ngonua ɔ.’ ”