Yeremia 16 - AHYERƐLƐ KRONGRON

AWURADE fa ahyɛdeɛ ma Yeremia

¹ Na AWURADE lale ye dwirɛ ali hyirele me kyɛ,

² “Nnɛgya braa, yeɛ nnɛwo mmaa mmienzua anaa mmaa mmrasua wɔ wa.

³ Ofikyɛ mmaa mmienzua ne mmaa mmrasua bɔ bawo bɛ wɔ wa, ɔne bɛ maame mɔ bɔ bɛwole bɛ, yeɛ bɛ baba mɔ bɛwole bɛ wɔ aseɛ ye aso ne, bɔ AWURADE kã fa bɛ nwo ole kyɛ:

⁴ Ewue anwonyerɛ kohũhũ bɛ. Bengosu bɛ, yeɛ bengosie bɛ; bɛkɔyɛ kyɛ fofoɛ wɔ aseɛ ye aso. Ngrandɛ ne ɛhɔen yeɛ okohũhũ bɛ ɔ, na bɛ fuin kɔyɛ ewienu nnomaa ne aseɛ ye aso ngaka aboyaa b’aleɛ.

⁵ “Ofikyɛ bɔ AWURADE kã ɛhe: Nnɛkɔ awuro bɔ bɛyɛ sɛen wɔ nu ne anu, yeɛ nnɛkɔ dɔ kosũ, anaa nnɛkɔyɛ bɛ yaakɔ; ofikyɛ maye m’asomdwee mafi maen he aso, yeɛ me dɔ bɔ onni ngasi ne m’anwumvoinnwunɛ koso maye mafi bɛ so, AWURADE noa dwirɛ ɛne.

⁶ Atitire mɔ ne kwahweabaa mɔ, bekowuwu wɔ aseɛ ye aso. Bengosie bɛ, bengosu bɛ, yeɛ bengogyina bɛ wue ne aso bɛngɔtete bɛ nwonaen anaa bɛngɔbɔ tikwa.

⁷ Ebiala ngɔnea awufoɛ nemɔ anwo ngɔma ɛsɛenvoɛ nemɔ aleɛ maa bɛngɔfa bɛngɔkyekye bɛ wora, yeɛ ebiala ngɔnea bɛ se ne bɛ ni mɔ wue anwo ngɔma bɛ nzaa ma bɛngɔno bɛngɔkyekye bɛ wora.

⁸ Nnɛkɔ awuro bɔ bɛto poen wɔ nu ɔ nu ɛne bɛ kɔtena ase bedidi bɛno.

⁹ Ofikyɛ bɔ Asafo AWURADE Yisrael Nyameɛ kã ɛhe: Ngɔma ahurusililɛ nwo nga, anigye nwo nga, atɔmvorɛ biaa nwo nga, yeɛ atɔmvorɛ braa nwo nga, ye bo kɔpɛ wɔ wa wɔ ɛmɔ aberɛ so, bɔ ɛmɔ nye tua ɔ.

¹⁰ Na ɔkɔwa kyɛ, sɛ ɛkã sɔ dwirɛ ne amukoraa kyire maen ne, ná sɛ bebisa kyɛ, ‘Nzu ati yeɛ AWURADE wahã sɔ musue dwirɛ kandinga he wagua yɛ so ye? Yɛ amumuyɛɛ ole sɛɛ? Bɔne beni yeɛ yayɔ yatia AWURADE yɛ Nyameɛ ɔ?’ a,

¹¹ ye de se bɛ kyɛ, ‘Ɔnate kyɛ ɛmɔ nana mɔ apo me, AWURADE noa dwirɛ ɛne; baali nyameɛ foforɛ mɔ si baso bɛ basɔne bɛ, na bapo me, yeɛ banni me mmeraa so,

¹² na ɔnate kyɛ ɛmɔayɔ bɔne batra ɛmɔ nana mɔ ne ati ɔ. Na afei ɛ́mɔtie, ɛmɔ amukoraati ɛmɔdi ɛmɔ ti piri bɔ ɛmɔndie me dwirɛ ɔ.

¹³ Yiti ngotu ɛmɔ bo ngofi aseɛ ye aso ngɔhɔ aseɛ bɔ ɛmɔ ne ɛmɔ nana mɔ bɛnze so ɔ so, na berɛ yeɛ ɛmɔkɔso nyameɛ foforɛ mɔ eyia ne kɔngɔen ɔ, ofikyɛ mengonwu ɛmɔ anwumvoin.’

Yisraelfoɛ kofi nnurehyelɛ nu kosa kɔwa

¹⁴ “Yiti, tie, AWURADE nwa nyoo: Mmerɛ bie ɔ́ba bɔ bɛngɔhɔ so bɛngɔhã kyɛ, ‘AWURADE bɔ ɔyele Yisraelfoɛ fili Misraim aseɛ so ne, kyɛ ɔte ase ye de,’

¹⁵ na mmom bɛkɔhã kyɛ, ‘AWURADE bɔ ɔyele Yisraelfoɛ fili sorɔ dɔ aseɛ so, ɔne aseɛ amukoraa bɔ ɔfoane bɛ ooguale so ne, kyɛ ɔte ase ye de.’ Ofikyɛ ngosa ngɔfa bɛ ngɔwa b’aseɛ bɔ mva mane bɛ nana mɔ ne aso.

¹⁶ “Tie, ngɔsoma maa bɛkɔɔfrɛ mmenia pee bɔ bɛkye nzue nu naen ɔ bɛkɔwa, AWURADE noa dwirɛ ɛne, na bɛkɔɔhye bɛ. Na afei ngɔsoma maa bɛkɔɔfrɛ bɔfoɛ mɔ pee bɛkɔwa, na bɛkɔhyehye mmenia ne wɔ bokaa biala so ne pambaa biala so ne nyɔbotaen nu ndokuro ngumaa nu.

¹⁷ Ofikyɛ me nye tua bɛ yɔleɛ amukoraa. Bɛmvea wɔ me nyunu, yeɛ b’amumuyɛɛ koso, so ɔngata wɔ me nye so.

¹⁸ Na ngoli moa ngotua bɛ b’amumuyɛɛ ne bɛ bɔne so kerɛ mmɔhoɛ nyɔ, ofikyɛ bagua m’aseɛ nwo fiɛ, na bafa bɛ nningyein fiɛ ne b’akyiwadeɛ mɔ fuin bayi m’agyapadeɛ ne aso to.”

¹⁹ Ao AWURADE, m’anwoserɛ ne m’anwoserɛ afealeɛ, me nwo adwaabɔlɛ nekaa wɔ amaneɛnwunɛ kyẽa nu, wɔ berɛ yeɛ amaen maen bekofi aseɛ noa kɔkã ye noa bɛkɔwa bɛkɔɔhã kyɛ, “Amba, ngondombo yeɛ ɔte anwonyadeɛ bɔ yɛ nana mɔ benyane ye ɔ: ɔne nningyein mbaen mbaen bɔ mvasoɛ nne so ɔ.

²⁰ Aso sona kɔhora kɔyɔ nyameɛ mɔ kɔfa? Asua! Ɛhemɔ bɛte nyameɛ mɔ!”

²¹ “Yiti, tie, ngɔmaa bekonwu ye pɛen ko, ngɔmaa bekonwu me tumi ne m’anwoserɛ ne, na bekonwu kyɛ me dumaa ole AWURADE.”