Yeremia 15 - AHYERƐLƐ KRONGRON

Musue kɔto Yudafoɛ

¹ Na AWURADE sele me kyɛ, “Sɛ Mose ne Samuel po bɛbagyina me nyunu bɛpa kyerɛ a, me kra ngonwu maen he anwumvoin. Foa bɛ fi me nye so maa bɛhɔ!

² Na sɛ bebisa wɔ kyɛ, ‘Nisua yeɛ yɛhɔ ɔ?’ a, bua bɛ kyɛ, bɔ AWURADE kã ɛhe: Bɛ bɔ odi kyɛ ewue anwonyerɛ ku bɛ ne, okohu bɛ, bɛ bɔ odi kyɛ bɛtotɔ ngrandɛ noa ne, bɛkɔtotɔ ngrandɛ noa, bɛ bɔ odi kyɛ ɛhɔen kũkũ bɛ ne, okohũhũ bɛ, yeɛ bɛ bɔ odi kyɛ bɛkye bɛ nnure ne, bɛkɔhye bɛ nnure.’

³ “Na ɛhawo ahoroɔ nna yeɛ ngɔprapra ngogua bɛ so ɔ, AWURADE noa dwirɛ ɛne. Bɛ ole ngrandɛ bɔ okohũhũ bɛ ɔ, ngyea bɔ bɛkɔtete bɛ naen ɔ, yeɛ ewienu nnomaa ne aseɛ so ngaka aboyaa bɔ bekohũhũ mmenia ná bɛkɔtete bɛ naen ɔ.

⁴ Na ngɔma aseɛ ye aso ahennie amukoraa bɛ nwo kodwiri bɛ wɔ bɛ nwo, ɔnate bɔ Yuda hene Hesekia awa Manase ɔyɔle ye wɔ Yerusalem ne ati.

⁵ “Ao Yerusalem, nwa yeɛ okonwu wɔ anwumvoin ɔ, anaakyɛ nwa yeɛ ɔkɔdodo wɔ ɔ? Nwa yeɛ ɔkɔpɛne ye nye kobisa wɔ kyɛbɔ wɔ nwo si te ɔ?

⁶ Apo me, AWURADE noa dwirɛ ɛne. Asa wɔ si, yiti matengyɛ me sa wɔ wɔ so, na masɛkye wɔ’; manwu wɔ anwumvoin mafɛ.

⁷ Mafa huhuamoa mahuhu bɛ so wɔ aseɛ ne aso pambim nemɔ anu; mahũhũ bɛ mma mɔ, masɛkye me maen ne; ofikyɛ banza bɛ si bamvi bɛ yɔleɛ anwo.

⁸ Mama b’akunafoɛ mmrasua mɔ basone pee batra mboanoa anweaa; mama bɛ bɔ bekũkũ mmenia ne, bahɔ mmerandeɛ mɔ bɛ ni mɔ so eyiagyina. Mama aworabɔlɛ ne ahunundetelɛ atɔ bɛ so mvum nu.

⁹ Braa bɔ wawo nzoo ne, wayɛ hodwoo, ye nye so aburu ye, ye anyelasoɛ atu amini wɔ aberɛ bɔ aleɛ onnya ɔssane ɔ, bagua ye nyunu ase basopa ye; na bɛ ngaa nemɔ, ngɔmaa bɛkɔtotɔ ngrandɛ noa wɔ bɛ pɔfoɛ mɔ anyunu, AWURADE noa dwirɛ ɛne.

Yeremia fa ye dwirɛ to Nyameɛ nyunu

¹⁰ Mooni ee! Edwirɛ ato me oo, kyɛ ɛwole me, kyɛ sona bɔ aseɛ ye aso ama amukoraa bɛ ne me di apereapereɛ, ná bɛko betia me ɔ! Mmmɔle ebie bosea nnnele nzihoɛ, yeɛ nnnele ebie bosea nnduale nzihoɛ, nakoso bɛ mukoraa bɛnoma me.

¹¹ Yeɛ AWURADE sele kyɛ: Amba, ngɔpepɛ ngole wɔ maa okoyie wɔ yé. Amba, ngɔma pɔfoɛ nemɔ bɛkɔkoto bɛkɔsrɛ wɔ wɔ amaneɛnwunɛ mmerɛ nu ne anwokyere mmerɛ nu.

¹² Aso buralɛ kɔhora kobubu sorɔ dɔ buralɛ ɔne kɔɔbere nu anaa?

¹³ “Ɔnate wɔ bɔne amukoraa bɔ ayɔ ye wɔ w’aseɛ ne aso amukoraa ne ati, ngɔfa w’anwonyadeɛ ne wɔ sikaa ngɔhyɛ maa bɛkɔfẽ ye mbaen.

¹⁴ Ngɔfa wɔ ne wɔ pɔfoɛ mɔ ngɔhɔ aseɛ bɔ ɛnze so ɔ so, ofikyɛ see bɔ wasɔ wɔ me yaafɛlɛ ne anu ne, ngɔmaa okogye kɔyera ɛmɔ.”

¹⁵ Ao AWURADE, wɔ de ɛse; kaye me ná baaboka me, na bɛ bɔ bɛtane me nye ne, tɔ bɛ so wereɛ ma me. W’aboterɛ ne ati, nnɛye me fi berɛ; nwu ye kyɛ ɔnate wɔ ti, bagua me nyunu ase.

¹⁶ Nwuni wɔ dwirɛ ne, na ɔyɛle m’aleɛ, wɔ dwirɛ ne yɛle me anika, na ɔma m’ahone tɔle me kunu ofikyɛ wɔ, AWURADE Asafo Nyameɛ, wɔ dumaa yeɛ ɔla me so ɔ.

¹⁷ Mandena ngorohoɛfoɛ bɛ dwaa bɔ bɛbɔ nu, yeɛ manni ahurusi, na ɔnate kyɛ wɔ sa la me so ne ati, ndele me nwo ndenane nekaa bie, ofikyɛ afa ɛyaafɛlɛ ayi me nu to.

¹⁸ Nzu ati yeɛ m’amaneɛnwunɛ ye bo ɔmbɛ ye, bɔ me kena ɔngɔ ye, bɔ wayɛ koangɔ ye? Aso ɛ́yɛ kyɛ nnakannakaniɛ ma me, ɛ́yɛ kyɛ abura bɔ odi ngasi ɔ?

¹⁹ Yiti bɔ AWURADE kã ɛhe: “Sɛ esa wɔ si ɛba a, ngosa ngole wɔ, na ekoogyina me nyunu. Sɛ ɛkã edwirɛ bɔ odi mu, ná angekã edwirɛ mbaen mbaen a, ye de, ɛkɔyɛ kyɛ me kyeame. Bɛ yeɛ bekosa bɛkɔwa wɔ berɛ ɔ, nna wɔ yeɛ ɛkɔhɔ bɛ dɔ ɔ.

²⁰ Na ngɔfa wɔ ngogyina berɛ kyɛ kɔɔbere fasue bɔ nu amia ɔ ngɔma maen he. Bɛkɔho bekotia wɔ, nakoso bengoli wɔ so ngonim, ofikyɛ ngyi wɔ si, kyɛ mede wɔ ngoa ná mepepɛ mede wɔ, AWURADE noa dwirɛ ɛne.

²¹ Ngɔpepɛ ngole wɔ ngofi bɔnefoɛ mɔ sa nu, na ngɔpɔ wɔ ngofi atianuserɛfoɛ bɛ sa nu.