Yeremia 13 - AHYERƐLƐ KRONGRON

Yisrael asoserɛ nwo anyandera

¹ Edwirɛ bɔ AWURADE sele me ɛhe, “Kɔ ná kɔtɔ nwera abɔsoɛ, na fa bɔ wɔ yaase; nakoso nnɛfa wura nzue nu.”

² Yiti ngyinane AWURADE dwirɛ ne aso ngɔndɔle abɔsoɛ, na mva mmɔle me yaase.

³ Na AWURADE lale ye dwirɛ ali hyirele me ye pɛen nyɔ so kyɛ,

⁴ “Abɔsoɛ bɔ aatɔ bɔ ɔbɔ wɔ yaase ne, dwɔso fa kɔ asue Yufreti noa, ná kɔfa fea nyɔbotaen tokuro bie anu wɔ dɔ.

⁵ Yiti ngɔle, na mva ngɔmveale Yufreti noa, kyɛbɔ AWURADE fale ahyɛdeɛ mane me ne ala.

⁶ Na ɔwale kyɛ, ngyẽa pee asi ne, AWURADE sele me kyɛ, “Kɔ asue Yufreti noa, na abɔsoɛ bɔ mvale ahyɛdeɛ mmane wɔ maa ɛfa ɛɛfeale dɔ ne, kɔ ye fi dɔ.”

⁷ Yiti ngɔle Yufreti noa, na nduli abɔsoɛ ne mvili nekaa bɔ mvu nwurale ne. Na yieee, né abɔsoɛ ne wakuko bɔ bɛfa bɛyɛ hwee a ɔnyɛ yee ɔ.

⁸ Yeɛ AWURADE lale ye dwirɛ ali hyirele me kyɛ,

⁹ “Bɔ AWURADE kã ɛhe: Sɔ ala yeɛ Yuda anwomasoɛ ne Yerusalem anwomasoɛ kandinga ne, ngɔsɛkye ye ɔ.

¹⁰ Bɔnefoɛ maen he, bɔ benguro kyɛ bekotie me dwirɛ, bɔ bedi bɛ bɔbɔ bɛ ti piri, bɔ bedi nyameɛ foforɛ mɔ si bɛso bɛ bɛsɔne bɛ ne, bɛkɔyɛ kyɛ sɔ abɔsoɛ he bɔ bɛfa bɛyɛ hwee a ɔnyɛ yee ne.

¹¹ Ofikyɛ kyɛbɔ abɔsoɛ mata sona yaase ne, sɔ ala yeɛ mmane Yisrael awuro ama amukoraa ne Yuda awuro ama amukoraa bɛmatane me ɔ, amaa ɔnate so bayɛ me maen, me dumaa, m’ayɛyelɛ ne m’animnyam. Nakoso bandie. AWURADE noa dwirɛ ɛne.

Nzaa ngomvo nemɔ

¹² “Yiti kã sɔ dwirɛ he kyire bɛ kyɛ, bɔ AWURADE Yisrael Nyameɛ kã ɛhe, ‘Nzaa ngomvo biala bɛfa nzaa begua nu maa oyi.’ Na bekose wɔ kyɛ, ‘Aso yɛnze kyɛ bɛfa nzaa begua nzaa ngomvo biala nu maa oyi ɔ?’

¹³ Na ekose bɛ kyɛ, bɔ AWURADE kã ɛhe: Tie, ngɔfa nzaabolɛ ngɔto aseɛ ye aso ama amukoraati so: ahemvo bɔ bɛte Dawide ahennie bia so ɔ so, asɔfo so, ngɔmhyɛlɛfoɛ so ne Yerusalemfoɛ amukoraati so.

¹⁴ Na ngɔkekã bɛ ti ngɔbobɔ nu, seɛ mɔ ne mmaa mɔ po, AWURADE noa dwirɛ ɛne. Mengonwu bɛ anwumvoin, mengɔma bengonya bɛ ti bengodidi nu, yeɛ me kunu ngɔtete me ngɔma bɛ, na mmom ngohũhũ bɛ.’ ”

Bɛkɔpɛ bɛ asue

¹⁵ Ɛ́mɔtie ná ɛ́mɔyɛ asoɛ, nnɛma ɛmɔyɛ anwomasoɛ, ofikyɛ AWURADE wadwudwo.

¹⁶ Ɛ́mɔfa animnyam bɛ́ma AWURADE ɛmɔ Nyameɛ koraka né wama awosii awa, koraka né ɛmɔasoti mmokaa so wɔ awosii nu; na aberɛ bɔ ɛmɔpena kanea ne, ɔkɔmaa ɔkɔkakyi ewue wawoɛ, na ɔkɔmaa ɔkɔkakyi awosii kabii.

¹⁷ Nakoso sɛ ɛmɔngotie de a, ɔnate ɛmɔ anwomasoɛ ti, me kra kosũ wɔ mvealeɛ nu; me nye kohwi moen pupuropupuro, na me nye kɔporo moen, ofikyɛ bahye AWURADE mmoaen kure ne nnure bahɔ.

¹⁸ Kã kyire ɛhene ne ɛhemmaa ne kyɛ, “Ɛ́mɔbrɛ ɛmɔ nwo ase, ɛ́mɔtena ase, ofikyɛ ɛmɔ ahennie ne kɔtɔ ase, ɛmɔ animnyam ahennie abotire nyemene ne, ɔkɔtɔ ase.”

¹⁹ Ngwaen dɔ nguro nemɔ, bɛkɔtoto nu, bɔ ebiala nne berɛ bɔ okobukye ɔ; Yuda amukoraa bɛkɔhye bɛ nnure, bɛkɔhye bɛ mukoraa nnure bɛkɔhɔ.

²⁰ “Ma wɔ nye so ná nea mmenia bɔ befi sorɔ dɔ bɛ́ba ne. Mmoaen kure bɔ bɛfa bewurale wɔ sa ne, ɔwɔ nisua, wɔ mmoaen kure nyemenenyemene ne?

²¹ Sɛ ɔtwe wɔ so a, nzikyɛ dwirɛ yeɛ ɛkɔhã ɔ? Ofikyɛ atete bɛ maa bayɛ safohene mɔ ɔne wɔ so panyi. Aso ɛngɔte yealɛ kyɛ brasua bɔ wafo aworɛ so ɔ?

²² Na sɛ ɛkã ye wɔ wɔ ti anu kyɛ, ‘Nzu ati yeɛ ɛhemɔ atoto me e?’ a, ɔnate w’amumuyɛɛ piri ne ati yeɛ wɔ nwo apa ma wɔ nziaseɛ nwo ala berɛ ɔ, ná baye wɔ gya bagua ase ye.

²³ Aso Yitiopianiɛ kɔhora kɔsesã ye wereɛ, anaa aboa kɔhora kɔsesã ye nwo kyerekyerɛɛ ne? Ahaa ye de, ɛmɔ bɔ bɔne ali ɛmɔ ti ne, ɛmɔ koso ɛmɔkɔhora bɛkɔyɔ bɔ ɔte paa ɔ.

²⁴ Yiti ngɔbɔ ɛmɔ ngɔsande kyɛ afafu bɔ ɛserɛ so mvrama ɔbɔ ye kɔ ɔ.

²⁵ Wɔ kyɛfa deɛ ɛhe, wɔ bue deɛ bɔ masusu mama wɔ hɔ ɛne, ofikyɛ wɔ wora afi me, na afa wɔ wora awura ngondombo nu, AWURADE noa dwirɛ ɛne.

²⁶ Me bɔbɔ ngɔpagya wɔ nziaseɛ ne ngɔfa ngomundu wɔ nyunu, na bekonwu wɔ animguaseɛ ne.

²⁷ Manwu w’agyaasɛkyelɛ ne, wɔ ehurolɛ nu ndeateamuɛ ne, w’animguaseɛ gyandera ne, yeɛ w’akyiwadeɛ yɔleɛ wɔ eburo mmokaa nemɔ aso ne. Ao Yerusalem, wɔ yaakɔ! Ɔkwaadwu kyinzu koraka né wɔ nwo ate.