Yeremia 10 - AHYERƐLƐ KRONGRON

Bosoensolɛ ne Nyameɛ sɔnenɛ

¹ Ao Yisrael awuro ama, ɛ́mɔtie edwirɛ bɔ AWURADE ɔ́kã kyire ɛmɔ ne.

² Bɔ AWURADE kã hɔ ɛhe: “Nnɛma ɛmɔsuasua amaen maen mɔ bɛ yɔleɛ nemɔ, yeɛ nnɛmɔma ewienu nzɛngyerɛnneɛ ne yɛ ɛmɔ suro, ofikyɛ maen maen nemɔ yeɛ ɔyɛ bɛ suro ɔ.

³ Maen maen nemɔ, b’amammerɛ nemɔ te nnakannaka. Ofikyɛ bebu ɛhɔayeɛ nu bakaa, na adwiililɛniɛ fa buralɛ ose.

⁴ Bɛfa ɛdwetɛ ne esikaa kɔkorɛ bɛboro ye nwo; bɛfa bɔsobaka ne nnadowaa bɛbobɔ nu, amaa wandutu wangua.

⁵ Bɛ mmosoen nemɔ, bɛte kyɛ kakaammotobi bɔ bɛfa benwunanwuna fieso nnomaa ɔ; bendwudwo; odi kyɛ bɛsoa bɛ, ofikyɛ bɛngora nate. Nnɛma ɛmɔsuro bɛ, ofikyɛ bɛngɔhora bɛngɔyɔ ɛmɔ bɔne biala, yeɛ bɛngora bɛnyɔ nikye paa biala.”

⁶ Ao AWURADE, ebiala nne berɛ bɔ ɔte kyɛ wɔ ɔ; ɛte piri, wɔ dumaa te piri, na tumi wɔ nu.

⁷ Ao maen maen mɔ Hene, nwa yeɛ onzuro wɔ ɔ? Ofikyɛ wɔ yeɛ ɛhe fata wɔ ɔ. Amaenmaenso nworɛfoɛ amukoraa nu, yeɛ b’ahennie amukoraa nu, ebiala nne berɛ bɔ ɔte kyɛ wɔ ɔ.

⁸ Bɛ mukoraa bagyimi, yeɛ bɛte ngwaseafoɛ; mmosoen mɔ ngyerɛkyerɛ te mbaen.

⁹ Bɛfa ɛdwetɛ bɔ baboro ye taataa ɔ befi Tasise, yeɛ esikaa kɔkorɛ bɔ ofi Yufase ɔ bɛba. Bɛte adwiililɛfoɛ ne esikaa kɔkorɛ dwumvoɛ bɛ sa noa adwuma. Bɛ ndaadeɛ te bibire ne koogyan, ye mukoraa te adwiililɛfoɛ bɛ sa noa adwuma.

¹⁰ Nakoso AWURADE yeɛ ɔte nahorɛ Nyameɛ ne ɔ; ye yeɛ ɔte Nyameɛ teasefoɛ ne Ɛhene afebɔɔ ne ɔ. Sɛ ye ahone hu a, aseɛ woso, na amaen maen mɔ bɛngora ye yaafɛlɛ noa gyina.

¹¹ Yiti ɛmɔhã behyire bɛ kyɛ, nyameɛ mɔ bɔ nna bɛ yeɛ bɛbɔle anwuro ne aseɛ ne, bɛ boso kotu komini kofi aseɛ ye aso ne ewienu abo.

¹² Ye yeɛ ole ye tumi bɔle aseɛ ɔ, ɔnate ye nworɛ so fale wiase timuni berɛ, na ɔnate ye nimdeɛ so yeɛ ɔtrɛle ewienu nu ɔ.

¹³ Ɔma ye komvi so a, esue bobɔ nu wɔ ewienu, ɔma tutue fi aseɛ noa dɔ tu kɔ anwuro; esue tɔ a, ɔma agralaa tete, na ɔma mvrama tu fi nekaa bɔ osie ye nningyein ne.

¹⁴ Ebiala te kwaseaa, na olle nimdeɛ; esikaa kɔkorɛ dwumvoɛ biala ye mmosoen mɔ gua ye nyunu ase, ofikyɛ ye mmosoen mɔ te nnakannaka, na nwomeɛ biala nne bɛ nu.

¹⁵ Mvasoɛ nne bɛ so, bɛte nnakannaka adwuma; na b’asohwenɛ mmerɛ ne dwu a, bɛkɔsɛkye bɛ.

¹⁶ Ye bɔ ɔte Yakob kyɛfa ne, ye de ɔtte kyɛ bɛ, ofikyɛ ye yeɛ ɔbɔle nningyein amukoraa ɔ; Yisrael te maen bɔ ɔte ye agyapadeɛ ɔ, na ye dumaa ole Asafo AWURADE.

Nnurehyelɛ bɔ ɔba ɔ

¹⁷ Wɔ bɔ ɛte kuro bɔ batua ye nu ɔ, boaboa wɔ nningyein noa fi aseɛ ne aso!

¹⁸ Ofikyɛ bɔ AWURADE kã ɛhe: “Tie, ngofindi aseɛ ne aso ama ngofi aseɛ ne aso ngogua wɔ mmerɛ ye anu, na ngɔma amaneɛ kɔwa bɛ so maa bɛkɔte ye yealɛ.

¹⁹ Me puralɛ ne ati, edwirɛ ato me oo! Me kena ne te piri. Nakoso ngane kyɛ, “Amba m’asohwenɛ ɛhe, na medi sɔ.”

²⁰ Me tena sua ne asɛkye, na me nyamaa amukoraa nu atete. Me mma mɔ bayakyi me berɛ bahɔ, na bɛnne wa ko. Ebiala nne berɛ bɔ okosa kɔpagya me tena sua ne kosie berɛ, ná wasa wasinze me mbɛmuɛ tena nemɔ ɔ.

²¹ Ofikyɛ neafoɛ nemɔ bagyimi, na bɛmbena AWURADE si ate; yiti wanyie bɛ yé, na bɛ mmoaen amukoraa babɔ aya.

²² Tie, dede bie! Nea, ɔ́ba! Basabasa kandinga bie fi sorɔ dɔ aseɛ ne aso ɔ́ba, bɔ ɔbaama Yuda nguro mɔ bɛkakyi kurofoen ne ɛserɛ so ngyea atenaleɛ ɔ.

²³ Ao AWURADE, mese kyɛ kuro sona ye asetena nu dwirɛ, ɔnne ye bɔbɔ ye sa nu; kyɛ kuro sona biala ye asetena nu, olle ye nwo.

²⁴ Ao AWURADE, tea me, nakoso nnɛmaa ɔbo so; nnɛfɛ yaa fa tea me, wanyɛ sɔ a, ebie ngɔha me nu.

²⁵ Maen maen bɔ benze wɔ ne, ɔne mmenia bɔ bɛmmɔ wɔ dumaa bɛnzɔne wɔ ne, ma wɔ yaa piri ne ɔbra bɛ so, ofikyɛ bahu Yakob batete ye nu pasapasa; bannua ye boso, na bakakyi ye atenaleɛ kurofoen.