Yeremia 1 - AHYERƐLƐ KRONGRON

Yeremia

¹ Yeremia bɔ ye baba ole Hilkia bɔ ɔte asɔfo mɔ bɔ bɛwɔ Anatote wɔ Benyamin aseɛ so nemɔ anu ko ne, ye noa dwirɛ ɛhe.

² Ye yeɛ AWURADE lale ye dwirɛ ali hyirele ye, wɔ Yosia bɔ ye baba ole Yuda hene Amon ne, ye ahennie afoɛ bɔ ɔtɔ so buru ne nza ne anu ɔ.

³ Edwirɛ ne sa wale ye berɛ wɔ Yehoakim bɔ ye baba ole Yuda hene Yosia n’aberɛ so, kɔpem Sedekia bɔ ye baba ole Yuda hene Yosia n’ahennie afoɛ bɔ ɔtɔ so buru ne ko n’ayieleɛ, maa oodwuli kyɛ bɛhyele Yerusalem nnure bɛhɔle wɔ bosome nnu ne anu ɔ.

Nyameɛ frɛ Yeremia

⁴ Na ɔwale kyɛ, AWURADE lale ye dwirɛ ali hyirele me kyɛ,

⁵ “Anzana mebaanwo wɔ wɔ bɛ kunu ne, né mese wɔ, anzana ɛbaafi bɛ kunu ba ne, né mate wɔ nwo; na nduli wɔ nziele berɛ nyɛle wɔ ngɔmhyɛlɛniɛ mane Amaenmaensofoɛ.”

⁶ Yeɛ ngane kyɛ, “Yieee, AWURADE Nyameɛ! Nahorɛ nu, menze dwudwo, ofikyɛ nde akwadaa.”

⁷ Nakoso AWURADE sele me kyɛ, “Nnɛkã kyɛ, ‘Nde akwadaa’, ofikyɛ bɛ bɔ ngɔsoma wɔ wɔ bɛ berɛ ne amukoraa, odi kyɛ ɛkɔ ɔ, na edwirɛ biala bɔ ngɔfa ngɔsoma wɔ ne, odi kyɛ ɛkã ɔ.

⁸ Nnɛsuro bɛ nyunu, ngyi wɔ si, na ngɔpepɛ ngole wɔ,” AWURADE noa dwirɛ ɛne.

⁹ Afei, AWURADE tengyɛle ye sa fa hane me noa. Na AWURADE sele me kyɛ, Tie, mafa me dwirɛ matua wɔ noa.

¹⁰ Tie, ɛnɛ kyẽa ye, mama wɔ tumi wɔ maen maen ne ahennie mɔ so, kyɛ etutu bɛ bo ná edwiri bɛ gua ase, kyɛ ɛsɛkye bɛ ná ɛhã bɛ gua, kyɛ esi ná elua.”

¹¹ Afei, AWURADE lale ye dwirɛ ali hyirele me kyɛ, “Yeremia, bɔ enwu ye e, nzikyɛ ɛne?” Na mmuale kyɛ, “Menwu atonwaa bakaa ye mmaen.”

¹² Yeɛ AWURADE sele me kyɛ, “Anwu ye amba. Ofikyɛ ngɔnea kyɛ me dwirɛ ne kɔyɔ adwuma ɔ.”

¹³ AWURADE lale ye dwirɛ ali hyirele me ye pɛen nyɔ so, na obisale me kyɛ, “Bɔ enwu ye e, nzikyɛ ɛne?” Na mmuale kyɛ, “Menwu kukue bɔ ohu, bɔ ye noa kyire sorɔ dɔ ɔ.”

¹⁴ Yeɛ AWURADE sele me kyɛ, “Sorɔ dɔ yeɛ musue kofi kɔwa aseɛ ne aso ama mukoraa bɛ so ɔ.

¹⁵ Ofikyɛ, tie, ngɔto me sa ngɔfrɛ sorɔ dɔ ahennie nemɔ bɛ mmusua ne amukoraa, AWURADE noa dwirɛ ɛne. Bɛkɔwa, na ebiala kɔfa ye ahennie bia koosie Yerusalem pambim ne noa, ɔne ye fasue ne amukoraa nwo kɔbra koyia, ɔne Yuda nguro amukoraa nwo.

¹⁶ Na ɔnate b’amumuyɛɛ amukoraa bɔ bayɔ ne ati, ngobua bɛ ndɛen, ofikyɛ bapo me, bayera ɛyɛɛ bama mmosoen mɔ, na basɔne bɛ bɔbɔ bɛ sa noa nnwumaa.

¹⁷ Nakoso wɔ de, bɔ w’abɔsoɛ ná dwɔso, na kã bɔ ngɔhyɛ wɔ kyɛ ɛhã ne amukoraa kyire bɛ. Nnɛma wɔ nwo wosowoso wɔ wɔ bɛ nyunu, anyɔ sɔ a, ngɔma wɔ nwo kɔwosowoso wɔ wɔ bɛ nyunu.

¹⁸ Tie, ɛnɛ kyẽa ye, mafa wɔ mayɛ kuro bɔ babɔ ye nwo waen ɔ, buralɛ bonima ne kɔɔbere fasue matia maen ne amukoraa: Yuda ahemvo, ye atitire mɔ, ye asɔfo mɔ ne aseɛ ne aso ama.

¹⁹ Bɛkɔho bekotia wɔ, nakoso bɛngɔhora bengoli wɔ so ngonim, ofikyɛ ngyi wɔ si, na ngɔpepɛ ngole wɔ, AWURADE noa dwirɛ ɛne.