Yakobo 4 - AHYERƐLƐ KRONGRON

Ewiase abiɛngoɛfalɛ

¹ Koɛ ne ngondii bɔ ɔwɔ ɛmɔ nu ne, nisua yeɛ ofi ba ɔ? Ɛmɔ akɔnnɔ bɔ ɔne ɛmɔ nwonaen akwaa mɔ bɛko ne, aso nna nu yeɛ ofi ba ɔ?

² Ɛmɔpena, na ɛmɔnnya ye; yiti ɛmɔdi awue; ɛmɔ nye boro kyɛ ɛmɔkonya ye, na ɛmɔngora benya ye; yiti ɛmɔko, na ɛmɔdi ahoɛ. Ɛmɔ sa nga ye, ofikyɛ ɛmɔmmisa.

³ Ɛmɔbisa, na ɛmɔ sa nga ye, ofikyɛ nna adwene paa yeɛ ɛmɔfa bebisa ɔ, kyɛbɔ ɔkɔmaa ɛmɔkɔfa bɛkɔyɔ bɔ ɛmɔ akɔnnɔ kuro ɔ.

⁴ Agyaasɛkyelɛfoɛ! Ɛmɔnze kyɛ sɛ ɛmɔfa wiase abiɛngoɛ a, né ɛmɔpɔ Nyameɛ ɔ? Yiti ebiala bɔ okuro kyɛ ɔfa wiase abiɛngoɛ ne, ɔte Nyameɛ pɔfoɛ.

⁵ Anaakyɛ ɛmɔdwene kyɛ Ahyerɛlɛ ne kã ye mbaen, kyɛ, “Ɔtwe ye sunzum bɔ ɔte yɛ nu ne nwo nungunɛ” ɔ?

⁶ Nakoso adom bɔ ɔfa ma ne, ɔsone pee. Na ye sɔ ati yeɛ Ahyerɛlɛ ne kã kyɛ, “Nyameɛ nye sa anwomasoɛfoɛ, na ɔdo anwobrɛaseɛfoɛ.”

⁷ Yiti ɛ́mɔfa ɛmɔ nwo béwura Nyameɛ bo. Ɛ́mɔyere ɛmɔ nwo bési abɔnzam ate, na ɔkɔnwati kofi ɛmɔ nwo.

⁸ Ɛmɔhwe bepingye Nyameɛ, na ye koso ɔkɔhwe kopingye ɛmɔ. Ɛmɔ, bɔnefoɛ mɔ, ɛ́mɔnwunzi ɛmɔ sa, ná ɛ́mɔte ɛmɔ ahone nu, ɛmɔ bɔ ɛmɔ adwene yɛ ɛmɔ ndaa ndaa ɔ!

⁹ Ɛ́mɔli yealɛ, ɛ́mɔma ɛmɔ wora bɔ, ná ɛ́mɔsu! Ɛ́mɔma ɛmɔ aserekyekye kakyi aworabɔlɛ, ná ɛmɔ ahurusililɛ kakyi anwumvoin anwumvoin.

¹⁰ Ɛ́mɔbrɛ ɛmɔ nwo ase wɔ Awurade nyunu, na ɔkɔma ɛmɔ so.

Nnɛbua ebiɛngo ndɛen

¹¹ Aliɛmaa mɔ, nnɛma ɛmɔkekã ɛmɔ nwo dwirɛ tɛɛ. Na ebiala bɔ ɔkã oliɛngo nwo dwirɛ tɛɛ anaa obua ye ndɛen ne, ɔkã mmeraa ne nwo dwirɛ tɛɛ, na obua mmeraa ne ndɛen. Na sɛ ebua mmeraa ne ndɛen a, né ɛnyɔ bɔ mmeraa ne kã ne, na mmom ɛte ye so ndɛenbualɛniɛ.

¹² Mmeraahyɛlɛniɛ ne ndɛenbualɛniɛ komapɛ yeɛ ɔwɔ berɛ ɔ; ye ole bɔ ɔkora ode ngoa ná ɔsɛkye ne. Yiti wɔ ole nwa bɔ ebua ebiɛngo ndɛen ɔ?

Nnɛfa ɛhema tu wɔ nwo

¹³ Afei ɛ́mɔtie, ɛmɔ bɔ ɛmɔkã kyɛ, “Ɛnɛ anaa ɛhema, yɛkɔhɔ kuro he anaa ɛhene aso yɛkooli berɛ afoɛ ko, yɛkɔtɔ ná yayɛ nningyein atɔen, ná yanya mvasoɛ.”

¹⁴ Nakoso ɛmɔnze bɔ okosi ɛhema ɔ. Ɛmɔ ngoa te nzu? Ofikyɛ ɔte etutue bɔ ɔba mmerɛ kãa bie, ná afei watu wamini ɔ.

¹⁵ Bɔ ɔsɛ kyɛ ɛmɔkã mmom ɛhe: “Sɛ Awurade boka ná yɛte ngoa nu a, yɛkɔyɔ he anaa ɛhene.”

¹⁶ Nakoso ɛmɔhoahoa ɛmɔ nwo wɔ ɛmɔ anwomasoɛ nu; na sɔ anwomasoɛ ne amukoraa te bɔne.

¹⁷ Yiti ebiala bɔ ɔse paa bɔ ɔsɛ kyɛ ɔyɔ, nakoso ɔnyɔ ne, ɔte bɔne ma ye.