Yakobo 3 - AHYERƐLƐ KRONGRON

Edwudwolɛ nu anwohyɛsoɛ

¹ Aliɛmaa mɔ, nnɛmɔma ɛmɔ nu somaa yɛ akyerɛkyerɛfoɛ, na ɛmɔse kyɛ bekobua yɛ foɛ piri mmom.

² Ofikyɛ yɛ mukoraa yɛfõ wɔ atee pee so. Na sɛ ebie nyɔ mvomsoɛ wɔ bɔ ɔkã nu a, né ɔte sona bɔ odi mu, bɔ ɔkora hyɛ ye nipadua amukoraa so ɔ.

³ Yɛfa buralɛ yɛwura mbɔngɔ noa nu maa betie yɛ, na yɛtengyɛtengyɛ bɛ maa bɛfa yɛ bɛkɔ nekaa biala bɔ yɛkuro ɔ.

⁴ Ɛ́mɔnea ɛlɛen mɔ koso. Ɔwɔ nu kyɛ bɛte mbiri paa, bɔ mvrama piri yeɛ ɔfa bɛ kɔ ɔ de, nakoso bɛfa tabɔnga kaaba bie yeɛ bɛtengyɛtengyɛ bɛ maa bɛkɔ nekaa bɔ ɛlɛenhanɛniɛ ne kuro ɔ.

⁵ Sɔ ala yeɛ temverema koso ɔte nipadua akwaa kaaba bie ɔ, nakoso ɔkekã edwirɛ mbiri mbiri hoahoa ye nwo. Ɛ́mɔtie, see kaaba bie yeɛ ɔyera ɛhɔayeɛ too ɔ!

⁶ Temverema koso te see. Temverema te ewiase bɔ ɔndengyɛ bɔ wafra y’akwaa mɔ nu ɔ; ɔbɔ musue maa ɔkã nipadua ne amukoraa, ɔfa see to mmenia asetena nu, na abɔnzam see nu yeɛ onya ye see ne fi ɔ.

⁷ Na ngaka aboyaa ne nnomaa ne ngaka bɔ bɛkongo ne ɛpo nu ngaka amukoraa, sona kora tete bɛ brɛ bɛ ase, na wabrɛ bɛ ase maa batie ye.

⁸ Nakoso temverema de, sona biala ngora mmrɛ ye ase; ɔte busueniɛ bɔ bɛmmɔ ye kyɛnn so ɔ, na ɛborɔ bɔ ye noa yɛ hye yeɛ wayi ye tɛkyɛ ɔ.

⁹ Ye yeɛ yɛfa yɛyirayira yɛ Nyameɛ ne Baba ne; na ye komapɛ ne ala yeɛ yɛfa yɛnoma kuro mmenia bɔ Nyameɛ abɔ bɛ kyɛ ye sɛso ɔ.

¹⁰ Noa komapɛ ne anu yeɛ saleɛ ne amoenwaa fi ɔ. Aliɛmaa mɔ, ɔnzɛ kyɛ ɔba ye sɔ ɔ!

¹¹ Asue ti komapɛ ne, aso opu nzue bɔ ɔyɛ fɛ ne bɔ ɔyɛ wee ɔ?

¹² Aliɛmaa mɔ, aso borɔdoma bakaa kora su olive mmaa? Anaakyɛ bobe kora su borɔdoma mmaa? Sɔ ala yeɛ asue ti komapɛ ne ngora mbu nzue ngyee ngyee ne nzue paa ɔ.

Nyameɛso nworɛ

¹³ Ɛmɔ nu nwa yeɛ ɔte nworɛniɛ ne nimdeɛniɛ ɔ? Maa ɔfa bra paa ohyire ye nnwumaa wɔ anwobrɛaseɛ bɔ nworɛ wɔ nu ɔ nu.

¹⁴ Nakoso sɛ anyeboroborolɛ tɛɛ ne pɛsɛmangomenya wɔ ɛmɔ ahone nu a, ye de nnɛma ɛmɔhoahoa ɛmɔ nwo, yeɛ nnɛma ɛmɔpɛ ngondombo betia nahorɛ ne.

¹⁵ Sɔ nworɛ he de, nna anwuro yeɛ ofi ɔ, na mmom ɔte aseɛ so deɛ; nna sunzum nu deɛ ɔ, na ɔte sunzummɔne mɔ deɛ.

¹⁶ Ofikyɛ nekaa bɔ anyeboroborolɛ ne pɛsɛmangomenya wɔ ne, berɛ yeɛ basabasa ne bɔne yɔleɛ amukoraa wɔ ɔ.

¹⁷ Nakoso nworɛ bɔ ofi anwuro ne de, bɔ oli moa ɔ, ye nwo te, okuro asomdwee, ye nwo dwo, ye so yɛ mmerɛ, anwumvoinnwunɛ ne bra paa ayi ye tɛkyɛ, na nyeyemuɛ anaa nyaatwom nne nu.

¹⁸ Na bɛ bɔ bɛpena asomdwee si atee, bɔ bedua ye asomdwee nu ne, bɛte tenenee mmaa.