Yakobo 2 - AHYERƐLƐ KRONGRON

Nnɛma ɛmɔyɛ nyeyemuɛ

¹ Aliɛmaa mɔ bɔ ɛmɔtira y’Awurade Yesu Kristo bɔ ɔte animnyam Hene ne gyidie nu ɔ, nnɛma ɛmɔfa nyeyemuɛ bɛbata ye nwo.

² Na sɛ ebie bɔ owura sikaa kɔkorɛ mbɛteaa ne ataadeɛ nyemene ba ɛmɔ nyianu sua nu, ná sɛ ehianiɛ koso bɔ owura ataadeɛ turuwaa koso ba berɛ bie,

³ ná sɛ ɛmɔfa anidie bɛma bɔ owura ndaadeɛ nyemene ne, ná ɛmɔkã bekyire ye kyɛ, “Tena bia paa he aso,” ná ɛmɔkã bekyire ehianiɛ ne koso kyɛ, “Wɔ de, gyina dɔ” anaakyɛ “Tena ase wɔ me gya bo wa” a,

⁴ aso né ɛhe ngyire kyɛ ɛmɔayɔ nyeyemuɛ, bɔ ɔmɔayɛ adwenemmɔne ndɛenbualɛfoɛ ɔ?

⁵ Nniɛma mɔ bɔ ɛmɔla m’ahone nwo ɔ, ɛ́mɔtie! Aso Nyameɛ ɔnneneane nu ɔyyele wiase ahiafoɛ kyɛ bɛyɛ gyidie nu anwonyafoɛ, ná benya agyapadeɛ wɔ ahennie ne anu, ahennie bɔ wafa wahyɛ bɛ bɔ bekuro ye dwirɛ ne bɔ ne?

⁶ Nakoso ɛmɔbu ehianiɛ animtia! Aso nna sikafoɛ yeɛ bɛhyɛ ɛmɔ so ɔ, aso nna bɛ yeɛ bɛtwe ɛmɔ bɛkɔ badwafoɛ nyunu ɔ?

⁷ Aso nna bɛ yeɛ bɛkã musue dwirɛ betia animnyam dumaa bɔ bɛfa bɛfrɛ ɛmɔ ne?

⁸ Yiti sɛ ɛmɔdi dehyeɛ mmeraa ne aso nahorɛ nu, kyɛbɔ Ahyerɛlɛ ne kã kyɛ, “Kuro ebiɛngo dwirɛ kyɛ wɔ bɔbɔ wɔ nwo” ne a, ye de né ɛmɔayɛ nikye.

⁹ Nakoso sɛ ɛmɔnea sona nyunu bɛyɛ nyeyemuɛ a, né ɛmɔayɔ bɔne, na mmeraa ne bua ɛmɔ ndɛen kyɛ mmeraatolɛfoɛ.

¹⁰ Na sona bɔ okoli mmeraa ne aso, ná ɔkɔto nu komapɛ po nen, né wali ye mukoraati nwo fɔ.

¹¹ Ofikyɛ, bɔ ɔhane kyɛ, “Nnɛsɛkye agyaa” nen, ye ala yeɛ ɔhane kyɛ, “Nnɛdi awue” ɔ. Na sɛ anzɛkye agyaa, nakoso edi awue a, né ayɛ ebie bɔ wato mmeraa ne ɔ.

¹² Yiti bɔ ɛmɔkã ne, ɛ́mɔyɔ sɔ, kyɛ mmenia bɔ bɛkɔfa fawɔnwodi mmeraa ne aso bekobua bɛ ndɛen ɔ.

¹³ Ofikyɛ anwumvoinnwunɛ nne ndɛenbualɛ nu mma bɔ wannwu anwumvoin ɔ; na anwumvoinnwunɛ hoahoa ye nwo di ndɛenbualɛ so ngonim.

Gyidie ne nnwumaa

¹⁴ Nniɛma mɔ, sɛ ebie kã kyɛ ole gyidie, nakoso olle nnwumaa a, né mvasoɛ beni yeɛ ɔwɔ so ɔ? Sɔ gyidie ne, ɔkɔhora kole ye ngoa anaa?

¹⁵ Sɛ aliɛmaa bienzua anaa aliɛmaa brasua bie nwo la so, ná ye noa aleɛ abɔ ye,

¹⁶ ná ɛmɔ nu ko kã kyire bɛ kyɛ, “Ɛ́mɔfa asomdwee bɛhɔ oo, ɛ́mɔnya tena bɛ́kata ɛmɔ nwo oo, ná ɛmɔ ko yi oo,” nakoso ɛmɔamma bɛ nningyein bɔ nipadua ne hia a, mvasoɛ beni yeɛ ɔwɔ so ɔ?

¹⁷ Sɔ ala yeɛ gyidie ngome koso ɔte ɔ. Sɛ nnwumaa nne nu a, ɔte wuruwaa.

¹⁸ Amba, ebie kɔhã kyɛ, “Ele gyidie, yeɛ me wora nne nnwumaa.” “Kyire me wɔ gyidie bɔ nnwumaa nne nu ɔ, na me koso ngɔfa me nnwumaa ngohyire wɔ me gyidie.”

¹⁹ Yeɛ ede di kyɛ Nyameɛ te komapɛ? Ayɔ nikye, sunzummɔne mɔ po bede bedi, na bɛ nwo wosowoso bɛ.

²⁰ Wɔ bɔ wadwene te kãa ɔ! Ɛpena kyɛ bɛkã bekyire wɔ kyɛ gyidie bɔ nnwumaa nne nu ne ɔte wuruwaa anaa?

²¹ Aso nna nnwumaa so yeɛ begyina bebuale yɛ nana Abraham be, mmerɛ bɔ ɔfale ɔwa Yisake tole afɔleɛ bokyea ne aso kyɛ ɔfa ye bɔ afɔleɛ ne?

²² Yeɛ anwu kyɛ ye gyidie ne ye nnwumaa bɛbɔle nu bɛyɔle adwuma, na ɔnate nnwumaa ne aso yeɛ gyidie ne lili mu ɔ.

²³ Na ɛhe mane Ahyerɛlɛ ne wale nu kyɛ, “Abraham lele Nyameɛ lili, na obuli sɔ tenenee mane ye”; na bɛfrɛle ye Nyameɛ damvo.

²⁴ Na ɛhe ma ɛmɔnwu ye kyɛ begyina sona nnwumaa so yeɛ bebua ye be ɔ, na bengyina ye gyidie ngome so.

²⁵ Na sɔ ala koso, aso nna nnwumaa so yeɛ begyina bebuale adwamanbɔlɛniɛ Rahabo be ɔ, mmerɛ bɔ olele ɛbɔfoɛ nemɔ, ná ɔmaa bɛfale atee foforɛ so bɛhɔle ne?

²⁶ Na kyɛbɔ nipadua bɔ sunzum nne nu ne ɔte wuruwaa nen, sɔ ala yeɛ gyidie bɔ nnwumaa nne nu ne ɔte wuruwaa ɔ.