Yakobo 1 - AHYERƐLƐ KRONGRON

Ahyebisalɛ

¹ Yakobo bɔ nde Nyameɛ ne Awurade Yesu Kristo akoaa, mefa mebrɛ abusua kure buru ne nyɔ bɔ babɔ aya bahɔ maen maen so ne. Mebisa ɛmɔ bisabisa.

Gyidie ne nworɛ

² Nniɛma mɔ, sɛ nzɔhwɛ ahoroɔ toto ɛmɔ a, ɛ́mɔbu ye kyɛ ɔte anigye nikye;

³ ofikyɛ ɛmɔse kyɛ ɛmɔ gyidie nwo nzɔhwɛ yeɛ ɔmaa ɛmɔfa animia begyina ɔ.

⁴ Ɛ́mɔma ɛmɔ animia ne ɔyɔ ye adwuma yie pɛpɛɛpɛ, amaa ɛmɔali mu bɔkɔɔ bɔ siitɔlɛ biala nne ɛmɔ nu ɔ.

⁵ Na sɛ ɛmɔ nu bie tɔ sii nworɛ nu a, maa obisa Nyameɛ bɔ ɔye ye kunu fa ma mmenia, bɔ ɔmva animguaseɛ mmata ye nwo ne, na ɔkɔfa kɔma ye.

⁶ Nakoso maa obisa ye gyidie nu, bɔ ye adwene nyɛ ye naa ɔ; ofikyɛ sona bɔ ye adwene yɛ ye naa ne, ɔte kyɛ ɛpo asorɔkye bɔ mvrama bɔ ye fa ye di akɔneaba ɔ.

⁷ Nnɛma sɔ sona ne dwene kyɛ okonya nikyee bie kofi Awurade berɛ,

⁸ ofikyɛ sona bɔ ye adwene yɛ ye ndaa ndaa ne, ɔngora nzi ye adwene pi wɔ nikyee biala bɔ ɔyɔ nu.

Ehiaa ne anwonyadeɛ

⁹ Ma gyidiniɛ awiɛmvoɛ ɔhoahoa ye nwo wɔ ɛpagyalɛ bɔ bapagya ye ne anu,

¹⁰ yeɛ sikaniɛ koso, wɔ ase bɔ babrɛ ye ne anu, ofikyɛ ɔkɔpɛ nu kɔhɔ kyɛ eburo ndire nyerɛen.

¹¹ Ofikyɛ eyia pukye bɔ gyireingyirein, na ɔyera ndire ne; ye nyerɛen ne poro gua, na ye nyemene sɛkye. Na sɔ ala yeɛ sikaniɛ koso kɔpɛ nu kɔhɔ wɔ bɔ ɔyɔ nu ɔ.

Nzɔhwɛ

¹² Sona bɔ omia ye nye fa nzɔhwɛ nu ne, onya saleɛ; ofikyɛ sɛ ɔkora gyina nzɔhwɛ ne noa a, okonya ngoa abotire bɔ Awurade afa ahyɛ bɛ bɔ bekuro ye dwirɛ bɔ ne.

¹³ Na sɛ béso ebie bɛnea a, nnɛmaa ɔkã kyɛ, “Nyameɛ yeɛ oso me nea ɔ”; ofikyɛ bɔne bie ngora nzo Nyameɛ nnea, yeɛ ye koso onzo sona biala nnea.

¹⁴ Na mmom sona bɔbɔ ye akɔnnɔ yeɛ odiedie ye ná ɔlakalaka ye oso ye nea ɔ.

¹⁵ Na sɛ akɔnnɔ ne ɔnwonzɛ a, ɔwo bɔne; yeɛ sɛ bɔne koso onyi yie a, ɔwo ewue.

¹⁶ Nniɛma mɔ bɔ ɛmɔla m’ahone nwo ɔ, nnɛmɔma bɛlakalaka ɛmɔ.

¹⁷ Akyɛdeɛ paa amukoraa ne akyɛdeɛ bɔ odi mu amukoraa fi nyameɛso, na ofi kanea Baba ne berɛ yeɛ ɔba ase ɔ. Na ye yeɛ ɔngakyi ná ɔnyɛ ye nwo kyɛ wawoɛ bɔ ɔsesã ɔ.

¹⁸ Ɔnate ye bɔbɔ ye pɛ so yeɛ ɔfale nahorɛ dwirɛ ne wole yɛ ɔ, kyɛ yɛyɛ ye abɔdeɛ ne anu nikyee bɔ oli moa ɔ.

Sotie ma saleɛ

¹⁹ Aliɛmaa adɔfo mɔ, ɛ́mɔtie ɛhe yé. Ɔsɛ kyɛ sona biala yɛ ndɛ tie, nnɛmaa ɔpe ndɛen dwudwo, nnɛmaa ɔpe ndɛen fɛ yaa;

²⁰ ofikyɛ sona yaafɛlɛ ɔnyɔ bɔ ɔtengyɛ wɔ Nyameɛ nye so ɔ.

²¹ Yiti ɛ́mɔgyi bra fiɛ ne bɔne yɔleɛ amukoraa bégua, ná ɛ́mɔfa anwobrɛaseɛ betira edwirɛ bɔ balua ye wɔ ɛmɔ nu ne anu, na ye yeɛ ɔkora de ɛmɔ kra ngoa ɔ.

²² Ɛ́mɔyɔ bɔ edwirɛ ne kã ne, na nnɛma ɛmɔyɛ atiefoɛ ngome bɛfa bɛlakalaka ɛmɔ nwo.

²³ Ofikyɛ sɛ ebie te edwirɛ ne tiefoɛ, ná ɔnyɔ bɔ edwirɛ ne kã ne a, ɔte kyɛ sona bɔ ɔnea ye nyunu sue neanu nu ɔ.

²⁴ Onwu ye nwo, na ofi berɛ, na berɛ ne ala ye wora fi kyɛbɔ osi soma ɔ.

²⁵ Nakoso sona bɔ ɔgyene ye nye nea fawɔnwodi mmeraa bɔ odi mu ne anu, ná ɔtena nu, ná wanyɛ tiefoɛ aworafireniɛ, na mmom odi so ɔyɔ nen, bekoyira ye wɔ bɔ ɔyɔ ɔ nu.

²⁶ Sɛ ebie dwene kyɛ ɔte nyamesomniɛ, ná wannea ye dwudwolɛ so yé, ná mmom ɔlakalaka ye nwo a, sɔ sona ne nyamesom te mbaen.

²⁷ Nyameɛsom bɔ ye nwo te bɔ efiɛ nne ye nwo wɔ Baba Nyameɛ nyunu ɛhe: kyɛ ɛkɔɔnea nyisiaa ne akunafoɛ wɔ b’amaneɛnwunɛ nu, ɔne kyɛ ɛkɔhwe wɔ nwo kofi wiase bra basabasa nu ɔ.