Tito 2 - AHYERƐLƐ KRONGRON

Ngyerɛkyerɛ paa

¹ Na wɔ de, ngyerɛkyerɛ sannwuu yeɛ ɔsɛ kyɛ ekyire ɔ.

² Kyirekyire ngɔkoraa nemɔ ma bɛ nye la berɛ, bɛyɛ mmenia bɔ bɛfata anidie ɔ, benya anwohyɛsoɛ, begyina pindinn wɔ gyidie nu, ɔdɔ nu ne animia nu.

³ Sɔ ala yeɛ kyirekyire nworowaa nemɔ ma bɛbɔ bra bɔ ɔte krongron ɔ. Ɔnzɛ kyɛ bedi nzekure anaa bɛyɛ akɔnomnzafoɛ; na mmom ɔsɛ kyɛ bekyirekyire bɔ ɔte paa ɔ,

⁴ amaa ɔnate so bafa batete ndaluwa nemɔ maa bahuro bɛ hu mɔ, ɔne bɛ mma mɔ dwirɛ,

⁵ ná badwene adwene paa, banea bɛ nwo so yé, basiesie b’awuro, bayɛ paa, babrɛ bɛ nwo ase bama bɛ bɔbɔ bɛ hu mɔ, ná mmenia annya edwirɛ tɛɛ banga bamva Nyameɛ dwirɛ ne anwo.

⁶ Na mmerandeɛ nemɔ koso, sɔ ala yeɛ tu bɛ foɛ ma benya anwohyɛsoɛ ɔ.

⁷ Na nningyein mukoraa nu, tu wɔ nwo sie berɛ yɛ yɔleɛ paa nwo nhwɛsoɛ: Wɔ ngyerɛkyerɛ nu, da nahorɛlilɛ ne ahoneserɛ ali,

⁸ edwirɛ paa bɔ bengonya ye nwo dwirɛ bɛngɔhã ɔ; amaa ɔnate so ebiala bɔ ɔne wɔ bɛnyɛ adwene ne ye nyunu agua ase, bɔ ongonya yɛ nwo dwirɛ tɛɛ biala ngɔhã ɔ.

⁹ Ngoaa mɔ koso, tu bɛ foɛ kyɛ bɛbrɛ bɛ nwo ase bɛma bɛ mene mɔ, ná bɛ́sɔ bɛ nye wɔ atee biala so; ɔnzɛ kyɛ bɛyɛ bɛ so nyeyeanoɛ,

¹⁰ anaa bɛyɛ bɛ so awue mmaa mmaa; na mmom ɔsɛ kyɛ bɛda nahorɛ paa amukoraa ali, amaa ɔnate so bama yɛ Ngoadefoɛ Nyameɛ ngyerɛkyerɛ ne wanya anidie wɔ nikyee biala nu.

¹¹ Ofikyɛ Nyameɛ adom bɔ ɔfa ngoalelɛ brɛ adasa mmaa mukoraa ne, waye ye nwo ali.

¹² Na okyirekyire yɛ, kyɛ, yɛ́gyi bra fiɛ ne wiase akɔnnɔ yɛ́gua, kyɛ yɛ́nya anwohyɛsoɛ, ná yɛ́fa tenenee ne nyamesom paa yɛtena wiase he anu,

¹³ wɔ mmerɛ bɔ yɛnwondɛ anyelasoɛ bɔ ɔte saleɛ, bɔ ɔte yɛ Nyameɛ piri ne yɛ Ngoadefoɛ Yesu Kristo animnyam walɛ ne ɔ.

¹⁴ Ye yeɛ ɔfale ye ngoa tole berɛ mane yɛ ɔ, kyɛbɔ okole yɛ kofi amumuyɛɛ amukoraa nu, ná wate yɛ nwo wafa yɛ wayɛ ye bɔbɔ ye mmenia sonongo bɔ bɛbɔ nnwumaa paa nwo mmɔden ɔ.

¹⁵ Fa tumi amukoraa kã ɛhemɔ, tu ye nwo foɛ, ná twi bɛ nyunu. Nnɛma ebiala fa wɔ nyunu twitwi ase.