Sefania 3 - AHYERƐLƐ KRONGRON

Yerusalem, wɔ yaakɔ!

¹ Ye yaakɔ, kuro bɔ wayɛ lɔen bɔ ye nwo agua fiɛ ɔ, nhyɛsoɛ kuro ne!

² Wandie AWURADE dwirɛ ne, wandie foɛtulɛ, wamva ye wora wanwura AWURADE nu, wandwe wambingye ye Nyameɛ.

³ Nu mbanyi mɔ bɛte gyata mɔ bɔ bɛbobɔ nu ɔ; ye maenbulɛfoɛ bɛte nɔsoa mbataku bɔ bɛnyakyi bowue po mma aleɛ ngye so ɔ.

⁴ Ye ngɔmhyɛlɛfoɛ bɛte anwohoahoafoɛ, nnakannaka mmenia, ye asɔfo mɔ begua nekaa krongron berɛ nwo fiɛ, na bɛmva mmeraa ne bɛnyɛ huu.

⁵ AWURADE bɔ ɔwɔ ye nu de, ɔte teneneeniɛ, ɔnyɔ bɔ ɔtte mayee ɔ, ngyerɛmɔ biala ɔda ye pɛpɛɛpɛyɛlɛ ali, bɔ ɔnyakyi ye yɔlɛ koraa ɔ; nakoso bɔnefoɛ mɔ de, bɛnze nyanzoen.

⁶ “Mabɔ maen maen mɔ pasaa, b’abandenden nemɔ adwiri agua, mama bɛ dwaa nemɔ so ayɛ bɔfonn bɔ ebiala mva so ɔ; mabɔ bɛ nguro nemɔ tɔɔ bɔ sona biala anga, bɔ ebiala ɔtte nu ɔ.

⁷ Ngane kyɛ, ‘Esurolɛ yeɛ odi kyɛ esuro me ɔ, me ngyerɛkyerɛ yeɛ odi kyɛ etie ɔ, amaa ɔnate so mannua wɔ boso wɔ bɔ mahyehyɛ mama wɔ amukoraa nwo; nakoso ɛmɔkɔ so bɛma ɛmɔ yɔleɛ amukoraa yɛ bɔne.”

Nyameɛ kɔpepɛ kole Yerusalem

⁸ “Yiti odi kyɛ ɛmɔnea me ate maa okodwu kyẽa bɔ ngodwɔso ngɔɔbɔ kwaadu ne, ofikyɛ ɔte me nhyehyɛleɛ kyɛ ngɔboaboa maen maen mɔ noa, kyɛ ngɔboaboa ahennie mɔ noa, ná ngɔma me yaafɛlɛ ne m’ahonehulɛ amukoraa kɔwa bɛ so ɔ; ofikyɛ me nungunɛ see ne, ɔkɔyera aseɛ amukoraa motoo,” AWURADE noa dwirɛ ɛne.

⁹ “Sɔ mmerɛ ne, ngɔma maen maen mɔ bɛ noa dwirɛ kɔyɛ krongron, amaa ɔnate so bɛ mukoraa babɔ AWURADE dumaa, ná bayɛ ko baso ye.

¹⁰ Na me mmenia bɔ bɛsɔne me, bɔ babɔ aya bahɔ Yitiopia asue mɔ si dɔ ne, bɛkɔfa m’afɔleɛ bɛkɔbrɛ me.

¹¹ “Sɔ mmerɛ ne, w’animguaseɛ yɔleɛ amukoraa bɔ ɛfa tole me mmeraa ne, ngɔye ngofi berɛ, na bɛ bɔ bedi anwomasoɛ nu ahurusi ne, ngotu bɛ bo ngofi wɔ nu, na ɛngɔyɛ ahandaen ko wɔ me bokaa krongron ne aso.

¹² Anwumvoin mmenia ne awiɛmvoɛ mmenia yeɛ ngɔmaa bɛkɔha wɔ wɔ nu ɔ, na AWURADE dumaa yeɛ bɛkɔfa bɛ wora bekowura nu ɔ.

¹³ Na mmenia bɔ bɛkɔha wɔ Yisrael ne, bɛngɔyɔ amumuyɛɛ biala, bɛngɔhã ngondombo dwirɛ biala, yeɛ nnakannaka dwirɛ biala ngofi bɛ noa; ofikyɛ bɛ de, bekoodidi ná balela berɛ, bɔ ebiala ngonwunanwuna bɛ ɔ.”

Sion ngoalelɛ ahurusi dwein

¹⁴ O Sion awa brasua, to ahurusi dwein, O Yisrael, bɔ ese! Ma wɔ nye gye ná fa w’ahone amukoraa di ahurusi, O Yerusalem awa brasua!

¹⁵ AWURADE aye ndɛenbualɛ ne wafi wɔ so, wapia wɔ pɔfoɛ mɔ wagua dɔ. AWURADE, Yisrael hene ne, ɔte wɔ nu, engosuro amaneɛ biala ko.

¹⁶ Sɔ mmerɛ ne anu, bekose Yerusalem kyɛ, “O Sion, nnɛsuro, nnɛma w’abasa nu yɛ hodwoo.

¹⁷ AWURADE wɔ Nyameɛ ne ɔte wɔ nu, ɔte katakyie ne defoɛ, ɔkɔfa anigye koli wɔ nwo ahurusi, ɔkɔfa ye ɔdɔ ne kɔyɛ wɔ foforɛ, na ɔkɔfa anigye kɔto wɔ nwo dwein.

¹⁸ Bɛ bɔ bedi aworabɔlɛ ne, ngɔboaboa bɛ noa maa bekosa bekoli aluolue ne, amaa ɔnate so animguaseɛ anga wɔ ko.

¹⁹ Tie, sɔ mmerɛ ne, me ne bɛ bɔ bɛhyɛ wɔ so ne yɛkoli. Ngɔpepɛ ngole wɔ mmubuafoɛ nemɔ, ngɔboaboa bɛ bɔ babɔ aya nemɔ noa, na ngɔmaa bekonya animnyam ne dumaa wɔ aseɛ amukoraa bɔ bagua bɛ nyunu ase wɔ so ne aso.

²⁰ Sɔ mmerɛ ne, ngɔfa ɛmɔ ngosa ngɔwa, wɔ mmerɛ bɔ ngɔboaboa ɛmɔ noa ne anu. Ngɔma ɛmɔ konya dumaa ne animnyam wɔ aseɛ so maen maen amukoraa nu, mmerɛ bɔ ngɔfa ɛmɔ mmenia bɔ bahye bɛ nnure ngosa ngɔwa bɔ ɛmɔ nye tua ne,” AWURADE noa dwirɛ ɛne.