Sefania 1 - AHYERƐLƐ KRONGRON

AWURADE ndɛenbualɛ kyẽa ne

¹ Yuda hene Yosia bɔ ɔte Amon awa ne, ye aberɛ so, AWURADE dwirɛ bɔ ɔlale ye ali hyirele Sefania bɔ ye baba ole Kuse bɔ ye baba ole Gedalia bɔ ye baba ole Amaria bɔ ye baba ole Hesekia ne, ye ɛhe:

² “Ngɔpra nikyee biala boso bɔkɔɔ ngofi aseɛ so,” AWURADE noa dwirɛ ɛne.

³ “Ngonua mmenia ne ngaka boso; ngonua ewienu nnomaa ne ɛpo nu naen boso, bɛ ne sundidua mɔ ne bɔnefoɛ mɔ. Ngonua kuro sona boso ngofi aseɛ so,” AWURADE noa dwirɛ ɛne.

⁴ “Ngɔtengyɛ me sa ngɔhwe Yuda so, yeɛ Yerusalemfoɛ amukoraa bɛ so; na ngokyikyi Baal nwo nikyee biala bɔ waha ɔ ye boso, ɔne ahɔmeɛ ne asɔfo bɔ bɛso bosoen ɔ bɛ dumaa boso ngofi wa;

⁵ yeɛ bɛ bɔ bɛsɔne anwuro abɔdeɛ mɔ wɔ sua ti afia; yeɛ bɛ bɔ bɛsɔne AWURADE bɛfa ye bɛta ndaen, nakoso bɛfa bosoen Milkom bɛta ndaen ɔ;

⁶ yeɛ bɛ bɔ bayakyi AWURADE sililɛ, bɛ bɔ bɛmbena AWURADE si atee bɔ bɛmva bɛ dwirɛ bɛndo ye nyunu ɔ.”

⁷ Ɛ́mɔyɛ konn wɔ AWURADE Nyameɛ nyunu! Ofikyɛ AWURADE kyẽa ne wapingye, yoo, AWURADE asiesie afɔleɛ, na wate bɛ bɔ wato ye sa wafrɛ bɛ nemɔ anwo.

⁸ AWURADE afɔleɛ kyẽa ne dwu a, ngɔhwe atitirefoɛ mɔ ne ɛhene mma nemɔ bɛ so, bɛ ne bɛ bɔ bewura maen bie sofoɛ mɔ bɛ ndaadeɛɔ.

⁹ Sɔ kyẽa ne, ebiala bɔ ohuru fa aponnwaa so ne, ngɔhwe ye so, bɛ ne bɛ bɔ bɛfa aminɛ ne apoo nningyein beyi bɛ mene awuro to ɔ.”

¹⁰ AWURADE nwa nyoo, “Sɔ kyẽa ne, bɛkɔte esuɛ bekofi Tire Pambim ne anu, bɛkɔte awuye bekofi borɔnoɛ bɔ ɔtɔ so nyɔ ne aso, yeɛ bɛkɔte nningyein sɛkyelɛ piri paa bekofi pambaa nemɔ aso.

¹¹ Ɛ́mɔbɔ awuye, ɛmɔ bɔ ɛmɔtete nekaa bɔ bɛfrɛ berɛ Mɔɔta ɔ, ofikyɛ banua dwadifoɛ nemɔ amukoraa bɛ boso, banua bɛ bɔ bɛkari ɛdwetɛ ne amukoraa bɛ boso.

¹² Sɔ mmerɛ ne, ngɔfa kanea ngohyini ngɔneanea Yerusalem nu, na ngɔhwe bɛ bɔ bafa bɔne bayɛ bɛ nwo buru ne nnu nemɔ bɛ so, bɛ bɔ bɛkã ye bɛ ti anu kyɛ, ‘AWURADE ngɔyɔ ye nwo huu, kyɛ paa oo, anaa tɛɛ oo.’

¹³ Yiti bɛ nningyein kɔkakyi nningyein bɔ mmenia kɔfẽ kɔfa ɔ, na b’awuro mɔ kɔkakyi dandue. Bekosisi sua de, nakoso bɛngɔtena nu; bɛkɔyɔ bobe boo mɔ de, nakoso bɛngɔno ye nzaa ne bie.”

¹⁴ AWURADE kyẽa piri ne wapingye, wapingye, na ɔpe ndɛen paa; esuɛ bɔ bɛkɔte ye AWURADE kyẽa ne nen, ɔkɔyɛ aworabɔlɛ kyɛ! Katakyie mɔ kosũ hahii.

¹⁵ Sɔ kyẽa ne, ɔte ahonehulɛ kyẽa, amaneɛ ne ahunundetelɛ kyẽa, ɛsɛkyelɛ ne ehunɛ kyẽa, awosii ne aworabɔlɛ kyẽa, munungum ne awosii kabii kyẽa,

¹⁶ totorobɛndohulɛ ne koɛ nu ndeateamuɛ kyẽa bɔ ɔ́ba nguro bɔ bato bɛ nwo fasue ɔne abandenden ndendenn mɔ so ɔ.

¹⁷ Ngɔma aworabɔlɛ kɔto mmenia bɔ ɔkɔmaa bɛkɔnate kyɛ anyesiniwaafoɛ ɔ, ofikyɛ bayɔ bɔne batia AWURADE; bekogyi bɛ mogya bekogua kyɛ mvuture, na bekogyi bɛ nwonaen ne bekogua kyɛ bondua.

¹⁸ B’ɛdwetɛ anaa bɛ sikaa kɔkorɛ, ɔngɔhora ngɔpepɛ ngole bɛ wɔ AWURADE ahonehulɛ kyẽa ne. Aseɛ amukoraa kɔyera wɔ ye nungunɛhwenɛ see ne anu, ofikyɛ ɔbaanua aseɛ ne aso ama mukoraa bɛ boso mvum nu.