Sakaria 9 - AHYERƐLƐ KRONGRON

¹ AWURADE dwirɛ ne ɔko tia Hadrake aseɛ, na ɔkɔho kotia Damasko koso. Na adasa mmaa bɛ nye kɔkakyi kɔwa AWURADE berɛ, kyɛbɔ Yisrael mmusua kure amukoraa bɛ nye kɔkakyi kɔwa ye berɛ ne.

² Hamate bɔ ɔwɔ ɛwɛen so dɔ ne koso edwirɛ ne ko tia ye; Tiro ne Sidon koso sɔ ala, ɔwɔ nu kyɛ besusu kyɛ bɛse nworɛ.

³ Tiro sili anwoserɛ afealeɛ fale, ɔboaboale ɛdwetɛ noa kyɛ mvuture, ɔne sikaa kɔkorɛ paa noa kyɛ mmorɔnoɛ so nnɛterɛ.

⁴ Tie, AWURADE kole ye anwodeɛ ne kofi ye sa nu, ɔkɔsɛkye ye tumi ne wɔ ɛpo nu, na see yeɛ ɔkɔyera ye motoo ɔ.

⁵ Asekelɔn konwu ye, na ɛserɛ kɔhã ye, Gasa koso sɔ ala, na ahunundetelɛ kɔtɔ ye so, yeɛ Ekron, ofikyɛ ye anyelasoɛ kɔyɛ basaa. Ɛhene ne kowu kofi Gasa, na Asekelɔn kɔkakyi kurofoen.

⁶ Mmenia firaman firaman yeɛ bɛkɔtena Asedɔde ɔ, na ngotu Filistia b’anwomasoɛ ne abo.

⁷ Ngɔye ye naen mogya mogya ne ngofi ye noa nu, ɔne ye nikyee bɔ ɔte akyiwadeɛ ne ngofi ye gye nemɔ b’afia. Na mmenia bɔ bɛkɔha ne, bɛkɔyɛ yɛ Nyameɛ ye deɛ, bɛkɔyɛ kyɛ Yuda nu mbanyi nemɔ bie, na Ekron kɔyɛ kyɛ Yebusifoɛ.

⁸ Afei ɔnate ɛlɔen ne ati, ngɔto waen ngɔfa m’awuro ne anwo, ɔnate mmenia bɔ bɛpɛ nu berɛ bɛkɔ, ɔne bɛ bɔ besa bɛba ne ati, na nhyɛsoɛniɛ biala ngɔpɛ nu ngɔfa bɛ nu berɛ ko, ofikyɛ afei de, mefa me nye menea.

⁹ O Sion awa brasua, di ahurusi paa! O Yerusalem awa brasua, bɔ ese! Tie, wɔ Hene ne ɔ́ba wɔ berɛ, ɔtengyɛ, na ye yeɛ ngoalelɛ wɔ ye berɛ ɔ, odwo, na ɔte afunum so, afunum akrɔngrɔma so, bɔ ɔte afunum beleɛ ɔ.

¹⁰ Ngonua teaseɛnam mɔ boso ngofi Efraim, ngonua mbɔngɔ boso ngofi Yerusalem, yeɛ ngonua koɛhonɛ agyaen boso. Ɔkɔhã asomdwee dwirɛ kohyire maen maen mɔ, ye ahennie kofi ɛpo kɔɔhã ɛpo, okofi asue ne kɔɔhã aseɛ noa dɔ.

¹¹ Na wɔ koso, ɔnate w’apam mogya ne ati, wɔ mmenia bɔ begua kuku nu ne, ngɔye bɛ ngofi kumaa bɔ nzue nne nu ne anu.

¹² O, ɛmɔ, kukunufoɛ bɔ ɛmɔanya anyelasoɛ ɔ, ɛ́mɔsa bɛbra anwoserɛ afealeɛ ne anu; na ɛnɛ kyẽa ye, mefa meto dwaa kyɛ, ngɔfa ye mmɔhoɛ nyɔ ngosi wɔ gya nu.

¹³ Ofikyɛ makondo Yuda mayɛ m’agyaen, mafa Efraim mayɛ agyaen bakaa mawura nu, O Sion, ngɔkanyane wɔ mma mmienzua mɔ maa bekodwɔso bekotia Hela mma mmienzua mɔ, na ngɔfa wɔ ngɔyɛ kyɛ katakyie ngrandɛ.

¹⁴ Afei AWURADE kɔye ye nwo ali wɔ bɛ so, ye agyaen ne kɔhɔ kyɛ agralaa, AWURADE Nyameɛ kohu totorobɛndo, na ɔkɔfa ngwaen dɔ mvrama bɔ ɔpɛ ye nwo ne anu yeɛ ɔkɔhɔ ɔ.

¹⁵ Asafo AWURADE kɔbɔ bɛ nwo waen, bekoli ngonim, bekohwi bɛkɔfa taya nyɔboɛ so, bɛkɔno, na bɛkɔbɔ ese kyɛ ebiaa babobo ne, bɛ ko koyi kyɛ talie, kyɛ afɔleɛ bokyea ndweasoɛ nemɔ.

¹⁶ Na sɔ kyẽa ne, AWURADE bɛ Nyameɛ kole bɛ ngoa, ɔnate kyɛ bɛte ye maen mmoaen kure, ofikyɛ bɛkɔyɛ kyɛ mbembenanneɛ bɔ betuatua abotire nu bɔ bɛta wɔ ye aseɛ so ɔ.

¹⁷ Ah, kyɛbɔ osi te paa ɔ, kyɛbɔ ye nwo si yɛ nyemene ɔ! Aburoo kɔma mmerandeɛ mɔ kɔyɛ tukutukuu, na nzaa monɛ koso kɔma ndaluwa kɔyɛ sɔ ala.