Sakaria 5 - AHYERƐLƐ KRONGRON

Nwomaa bɔ babobɔ ne

¹ Nza ndole me nye anwuro, na yieee, nwuni nwomaa bie bɔ babobɔ bɔ otu ɔ!

² Yeɛ abɔfo ne bisale me kyɛ, “Nzikyɛ yeɛ enwu ye e?” Na mmuale kyɛ, “Menwu nwomaa bɔ babobɔ bɔ otu ɔ; ye tendenn nu te agyirɛ aburanyɔ, yeɛ ye tɛtrɛtɛɛ nu te agyirɛ buru.”

³ Na osele me kyɛ, “Ɛhe te ɛnomalɛ bɔ okyinikyini fa aseɛ so amukoraa ɔ. Ebiala bɔ okowua ne, bɔ ɔwɔ ye bue faen ne yeɛ bekogyina so bɛkɔpɛ ye asue bekofi wa ɔ; yeɛ ebiala bɔ ɔkɔta ndaen mbaen ne, bɔ ɔwɔ ye bue faen ne yeɛ bekogyina so bɛkɔpɛ ye asue bekofi wa ɔ.

⁴ Ngɔsoma ye maa ɔkɔhɔ, Asafo AWURADE noa dwirɛ ɛne, na okowura awueniɛ n’awuro, yeɛ bɔ ɔfa me dumaa ta ndaen mbaen ɔ awuro; okosikye ye awuro berɛ, na ɔkɔyera awuro ne, nu mmakaa ne nu nyɔboɛ.”

Braa bɔ ɔte asusudeɛ kɛndɛen nu ne

⁵ Yeɛ abɔfo bɔ ɔne me dwudwole ne wale moa oosele me kyɛ, “To wɔ nye anwuro ná nea nikye horɛ bɔ ɔ́kɔ ne.”

⁶ Na mmisale ye kyɛ, “Nzikyɛ nikyee ɛne?” Yeɛ obuale kyɛ, “Ɛhe te asusudeɛ kɛndɛen bɔ ofi wa kɔ ɔ.” Osa sele kyɛ, “Ɛhe te b’amumuyɛɛ wɔ aseɛ amukoraa so.”

⁷ Na yieee, bebukyele kɛndɛen ne ti bɔ ɔte sum ne aso, na né braa bie te kɛndɛen ne anu.

⁸ Yeɛ abɔfo ne sele kyɛ, “Ɛhe te Amumuyɛɛ.” Na ɔnyemane braa ne aso wurale asusudeɛ kɛndɛen ne anu, na ɔfale ye ti sum nonɛnonɛ ne butuli so.

⁹ Afei ndole me nye anwuro, na yieee, nwuni mmrasua nyɔ kyɛ bɛba ɔ. Né mvrama wɔ bɛ ndaa nu. Né bele ndaa te kyɛ akyemvona katakyie ndaa, na bɛmane kɛndɛen ne aso bɛfale aseɛ ne nyameɛso b’afia.

¹⁰ Yeɛ mmisale abɔfo bɔ ɔne me dwudwole ne kyɛ, “Nisua yeɛ ɛhemɔ bɛfa asusudeɛ kɛndɛen ne bɛkɔ e?”

¹¹ Na obuale me kyɛ, “Bɛfa bɛkɔ Sinari aseɛ so, ná bekosi sua bɛma ye wɔ berɛ; na beyie a, bɛkɔfa asusudeɛ kɛndɛen ne bekosie ye nyinasoɛ ne aso.”