Sakaria 4 - AHYERƐLƐ KRONGRON

Sikaa kɔkorɛ kanea bakaa ne

¹ Abɔfo bɔ ɔne me dwudwole ne, osa wale bieku, na otingyele me kyɛ sona bɔ betingye ye befi ye nnafelɛ nu ɔ.

² Na obisale me kyɛ, “Nzikyɛ yeɛ enwu ye e?” Yeɛ mmuale kyɛ, “Menwu kanea bakaa bɔ ye mukoraa te sikaa kɔkorɛ, bɔ bua gyi ye ti afia, bɔ ye nganea nzoo wɔ so, bɔ dodobɛen nzoo wɔ kanea biala bɔ ɔwɔ ye ti afia ne aso ɔ.

³ Né olive mmakaa nyɔ gyigyi ye nwo berɛ, ko wɔ bua ne famaa so, yeɛ ko wora ɔwɔ ye bɛen so.”

⁴ Yeɛ mmisale abɔfo bɔ ɔne me dwudwole ne kyɛ, ‘Me mene, ɛhemɔ, nzikyɛ ɛne?’

⁵ Na abɔfo bɔ ɔne me dwudwole ne buale me kyɛ, “Aso ɛnze kyɛbɔ ɛhemɔ bɛ bo kyire ɔ?” Na mmuale kyɛ, “Daabi, me mene.”

⁶ Na obuale me kyɛ, “AWURADE dwirɛ bɔ ɔkã kyire Serubabɛl ole kyɛ: Nna anwoserɛ ɔ, yeɛ nna tumi ɔ, na mmom me Sunzum ɔ. Asafo AWURADE noa dwirɛ ɛne.

⁷ Ao bokaa piri, wɔ ole nwa? Ɛkɔkakyi aseɛ frɛtɛɛ wɔ Serubabɛl nyunu. Na ɔkɔfa nyɔboɛ titire ne kɔwa wɔ mmerɛ bɔ bɛbɔ ese kyɛ, ‘Nyameɛ lo ye oo, Nyameɛ lo ye oo!’ ”

⁸ AWURADE lale ye dwirɛ ali bieku hyirele me kyɛ,

⁹ “Serubabɛl sa yeɛ wato awuro he fapem ɔ, na ye sa yeɛ okosi koyie ɔ. Na afei ɛmɔkonwu kyɛ Asafo AWURADE yeɛ wasoma me ɛmɔ berɛ ɔ.

¹⁰ Na adwuma ne bohyɛlɛ kaaba ne, ebiala bɔ wabu ye animtia ne, okoli ahurusi, mmerɛ bɔ okonwu kyɛ Serubabɛl otira nyamaa bɔ bɛfa bɛtengyɛtengyɛ sua wɔ ye sa nu ne. Na kanea nzoo hemɔ te AWURADE nye mɔ bɔ bɛbɔ mborɔkaa wɔ aseɛ so amukoraa ɔ.”

¹¹ Yeɛ mmisale ye kyɛ, “Olive mmakaa nyɔ hemɔ bɔ begyigyi kanea bakaa ne famaa so ne ye bɛen so ne, bɛte nzu?”

¹² Na nza mmisale ye pɛen nyɔ so kyɛ, “Olive mmakaa mmaen nyɔ bɔ bɛwɔ sikaa kɔkorɛ dodobɛen nyɔ bɔ behwie sikaa kɔkorɛ ngoo befi nu ne, bɛte nzu?”

¹³ Yeɛ obisale me kyɛ, “Yiti ɛnze bɔ ɛhemɔ bɛte ɔ?” Na mmuale kyɛ, “Me mene, daabi oo.”

¹⁴ Afei osele kyɛ, “Ɛhemɔ ole abɔdeɛ nyɔ bɔ bapopa bɛ ngoo bɔ begyigyi aseɛ amukoraa Mene ne nwo berɛ ne.”