Sakaria 14 - AHYERƐLƐ KRONGRON

AWURADE koli ngonim kɔma Yerusalem

¹ Tie, AWURADE kyẽa ne ɔ́ba, bɔ koɛ nu nzesadeɛ bɔ basesa ye wɔ wɔ nu ne, bɛkɔhyɛ ye wɔ wɔ nu ɔ.

² Ofikyɛ ngɔboaboa maen maen mukoraa bɛ noa maa bɛkɔfa koɛ bɛkɔteta Yerusalem, bɛkɔho bɛkɔfa kuro ne, bɛkɔfẽ awuro nemɔ anu nningyein, ná bato mmrasua nemɔ mmɔnaa. Kuro ne anu ama ne, bɛkɔhye nu bue nnure bɛkɔhɔ, nakoso maen ne ngaa de, bengohu bɛ ngofi kuro ne anu.

³ Na afei AWURADE kotu kɔtengyɛ ɔne sɔ maen maen nemɔ bɛkɔɔho, kyɛbɔ ɔhone koɛ wɔ koɛ kyẽa ne ala.

⁴ Sɔ kyẽa ne, ye gya kogyinagyina Olive bokaa bɔ ɔwɔ Yerusalem ndendeneɛ so wɔ eyia afiteleɛ ne aso. Olive bokaa ne anu kodwa nyɔ kofi eyia afiteleɛ koodwu eyia atɔleɛ maa ɔkɔyɛ bɔnza kandinga paa, maa ɔnate so bokaa ne bue kɔhwe kɔhɔ sorɔ dɔ, ná ye bue koso wahwe wahɔ ngwaen dɔ.

⁵ Ɛmɔkɔnwati bɛkɔhɔ me mmokaa nemɔ bɛ bɔnza ne anu, ofikyɛ mmokaa nemɔ bɔnza ne kɔtrɛ alaa koodwu Asal. Amba, ɛmɔkɔnwati, kyɛbɔ aseɛwosolɛ maa ɛmɔnwatili wɔ Yuda hene Yusia aberɛ so ne. Na afei AWURADE me Nyameɛ kɔwa, bɔ krongronfoɛ amukoraa bɛboka ye so ɔ.

⁶ Na sɔ kyẽa ne, kanea ngɔta, ɛyerɛ ngɔwa, yeɛ ɛborɔ ngogua.

⁷ Ɔkɔyɛ kyẽa sonongo bɔ AWURADE yeɛ ɔse ɔ. Nna alehyeleɛ ɔ, yeɛ nna alesaleɛ ɔ; na ɔkɔwa kyɛ, nɔsoa ne, ɔkɔyɛ hyireinn.

⁸ Sɔ kyẽa ne, ngoa nzue kɔtengyɛ kofi Yerusalem; ye bue kɔhɔ eyia afiteleɛ ɛpo ne anu, yeɛ ye bue kɔhɔ eyia atɔleɛ ɛpo ne anu; na ɔkɔtengyɛ ahuhuro ne prakasua mmerɛ.

⁹ AWURADE koli hene wɔ aseɛ amukoraa so; na sɔ kyẽa ne, AWURADE kɔyɛ sonongo, yeɛ ye dumaa kɔyɛ sonongo.

¹⁰ Aseɛ ne amukoraa kɔkakyi aseɛ frɛtɛɛ ofi Geba okoodwu Rimon wɔ Yerusalem ngwaen. Nakoso Yerusalem de, ɔkɔha bokaa so wɔ ye boso, ofi Benyamin pambim ne maa okoodwu pambim bɔ oli moa ne, maa okoodwu ndweasoɛ pambim ne; na okofi Hananel abandenden ne okoodwu ɛhene ne kumaa bɔ betwi nu nzaa ne.

¹¹ Mmenia kɔtenatena Yerusalem nu, ofikyɛ ɔngɔbɔ ko, na kuro ne kɔtena berɛ anwotɔ nu.

¹² Na maen maen amukoraa bɔ bafa koɛ baatoa Yerusalem ne, ɛhawo he yeɛ AWURADE kɔprapra kogua bɛ so ɔ: Bɛ nwonaen kɔporɔ wɔ mmerɛ bɔ bɛtɛ gyigyi bɛ gya so ɔ, bɛ nye kɔporɔ wɔ bɛ nye tokuro ne anu, yeɛ bɛ temverema kɔporɔ wɔ bɛ noa nu.

¹³ Sɔ kyẽa ne, AWURADE kɔma ahunundetelɛ piri kɔtɔ bɛ so, maa ɔnate so ebiala kɔpari kɔsɔ obiɛngo sa, na bɛkɔbobɔ bɛ nwo.

¹⁴ Yuda koso kɔho koɛ wɔ Yerusalem. Na bɛkɔboaboa maen maen amukoraa bɔ bapɛ ye nwo bayia nemɔ b’anwonya worawora ne noa. Ɔte sikaa kɔkorɛ, ɛdwetɛ ne ndena.

¹⁵ Na mbɔngɔ, yoma, afupɔngɔ, afunum ne ngaka mukoraa bɔ bɛwɔ asikyeleɛ nemɔ anu ne, ɛhawo bɔ ɔkɔto bɛ ne, ɔkɔyɛ kyɛ sɔ hawo ne ala.

Maen maen mukoraa bɛkɔsɔne AWURADE

¹⁶ Na ɔkɔwa kyɛ, maen maen amukoraa bɔ bɛfale koɛ bɛɛtoale Yerusalem ne, bɛ nu ama bɔ bekonya bɛ ti bekodidi nu ne, afoɛnoa biala bɛkɔɔsɔne Ɛhene Asafo AWURADE, ná bali Asese aluolue ne.

¹⁷ Na aseɛ so mmusua mukoraa, bɛ nu biala bɔ wamma Yerusalem wammanzɔne Ɛhene Asafo AWURADE nen, esue ngɔtɔ ngɔma bɛ.

¹⁸ Na sɛ Misraim abusua wammanzɔne a, ye de ɔngɔtɔ ngɔma bɛ; na maen maen bɔ bɛmma nni Asese aluolue nen, ɛhawo bɔ AWURADE kɔprapra kogua bɛ so nen, sɔ hawo ne ala yeɛ ɔkɔto bɛ ɔ.

¹⁹ Sɔ asohwenɛ ne yeɛ ɔkɔwa Misraim so ɔ, na maen maen amukoraa bɔ bɛmma nni Asese aluolue ne nen, sɔ asohwenɛ ne yeɛ ɔkɔto bɛ ɔ.

Krongronyɛlɛ mmerɛ

²⁰ Sɔ kyẽa ne, adɔma mɔ bɔ bɛlela mbɔngɔ kɔme ne, bɛkɔhyerɛ so kyɛ, “ƆTE KRONGRON MA AWURADE.” Na AWURADE awuro berɛ ngukue nemɔ bɛkɔyɛ kyɛ afɔleɛ bokyea ne anyunu berɛ ndalie nemɔ.

²¹ Nahorɛ nu, kukue biala bɔ ɔwɔ Yerusalem ne Yuda ne, ɔkɔyɛ krongron kɔma Asafo AWURADE, na sona biala bɔ ɔbɔ afɔleɛ nen, ɔkɔɔfa nu bie kɔtõ afɔleɛ naen ne wɔ nu; na sɔ kyẽa ne, Kanaanniɛ ngɔtena Asafo AWURADE awuro berɛ ko.