Sakaria 13 - AHYERƐLƐ KRONGRON

AWURADE kɔte ye maen nwo

¹ “Sɔ kyẽa ne, bekobukye mbombonzue bɛkɔma Dawide awuro ama ne Yerusalemfoɛ bɛkɔfa bɛkɔte bɛ nwo bekofi bɔne ne efiɛ nwo.

² “Sɔ kyẽa ne, ngonunu mmosoen dumaa boso ngofi aseɛ ne aso, bɔ ɔnate so bɛngɔkaye bɛ ko ɔ; yeɛ ngotu ngɔmhyɛlɛfoɛ ne sunzum tɛɛ bo ngofi aseɛ ne aso, Asafo AWURADE noa dwirɛ ɛne.

³ Na ɔkɔwa kyɛ, sɛ ebie kɔso ɔhyɛ ngɔm a, ɔse ne oni bɔ bɛwole ye ɔ bekose ye kyɛ, ‘Onni kyɛ ɛtena ngoa nu ɔ, ofikyɛ ɛkã ngondombo dwirɛ wɔ AWURADE dumaa nu.’ Na sɛ ɔhyɛ ngɔm a, ɔse ne oni bɔ bɛwole ye ɔ bɛkɔfa nikyee bekosina ye.

⁴ Sɔ kyẽa ne, ngɔmhyɛlɛniɛ biala hyɛ ngɔm a, ye nyunu kogua ase wɔ ye nyekyire nwo, yeɛ bengowura enwiaa ataadeɛ aguasoɛ ngɔfa ngɔlakalaka mmenia.

⁵ Na mmom ɔkɔhã kyɛ, ‘Nnde ngɔmhyɛlɛniɛ, nde kuaniɛ; ofikyɛ mayɛ kua fi me ngwadaa nu.’

⁶ Na sɛ ebie bisa ye kyɛ, ‘Ngena ngena bɔ ɔwɔ wɔ sa nu ye koso ɛ?’ a, okobua kyɛ, ‘Epuralɛ bɔ bepurale me wɔ me damvo mɔ awuro ne, ye ɛne.’ ”

⁷ O ngrandɛ, dwɔso tia me mmoaenneafoɛ ne, ɔne sona bɔ ɔte me nwoniɛ ne,” Asafo AWURADE noa dwirɛ ɛne. “Pura mmoaenneafoɛ ne, na mmoaen ne kɔbɔ aya, na ngɔkakyi me sa ngɔhɔ mmaa mmaa nemɔ aso.

⁸ Na ɔkɔwa kyɛ, aseɛ ne aso amukoraa, bekohũhũ nza nu ngyɛmuɛ nyɔ, nakoso nza nu ngyɛmuɛ ko ne de, bɛkɔyakyi bɛ wɔ so, AWURADE noa dwirɛ ɛne.

⁹ Na ngyɛmuɛ nza nu ko ne, ngɔfa bɛ ngɔfa see nu, ngɔpɔ bɛ nwo kyɛbɔ bɛpɔ ɛdwetɛ nwo ɔ, na ngohwi bɛ nwo kyɛbɔ betwi sikaa kɔkorɛ nwo ɔ. Bekosu bɛkɔfrɛ me dumaa, na me wora ngotie bɛ. Ngɔhã kyɛ, ‘Bɛte me maen’ na bɛ wora bɛkɔhã kyɛ, ‘AWURADE yeɛ ɔte me Nyameɛ ɔ.’ ”