Sakaria 12 - AHYERƐLƐ KRONGRON

Nyameɛ kɔpepɛ kole Yerusalem

¹ AWURADE noa dwirɛ bɔ ɔfa Yisrael nwo ɛhe: AWURADE bɔ ɔtrɛtrɛle ewienu nu, bɔ ɔtole aseɛ fapem, bɔ ɔnwone sona sunzum wɔ ye nu ne, ɔnwa nyoo:

² “Tie, mebaafa Yerusalem meyɛ nzaabolɛ kulie mema maen maen bɔ bapɛ ye nwo bayia amukoraa; na bekotua Yuda wɔ mmerɛ bɔ bekotua Yerusalem ne anu.

³ Na sɔ kyẽa ne, ngɔfa Yerusalem ngɔyɛ nyɔboɛ nonɛnonɛ ngɔma maen maen amukoraa, ebiala bɔ ɔkɔpagya ye ne, okopura piri paa, ɔwɔ nu kyɛ aseɛ so maen maen amukoraa bɛkɔboa bɛ noa bekodwɔso bekotia ye de.

⁴ AWURADE nwa nyoo, sɔ kyẽa ne, ngɔte anyesotanɛ ngogua pɔngɔ biala so, yeɛ ngɔte ɛlaenbɔlɛ ngɔto bɔ ɔte ye so ne aso. Nakoso Yuda awuro ama de, ngɔlo bɛ, na ngɔprapra anyesiniwaa ngogua maen maen mɔ bɛ pɔngɔ biala so.

⁵ Na Yuda mbanyi mɔ kɔkekã ye wɔ bɛ ti anu kyɛ, ‘Yerusalemfoɛ bɛte m’anwoserɛ wɔ Asafo AWURADE bɛ Nyameɛ nu.’

⁶ “Sɔ kyẽa ne, ngɔfa Yuda mbanyi ngɔyɛ kyɛ see bɔ ogye wɔ eyein mɔ b’afia ɔ, kyɛ ɛtɛen bɔ ogye wɔ aburoo nyaa b’afia ɔ. Bɛkɔyera maen maen amukoraa bɔ bapɛ bɛ nwo bayia ɔ, wɔ famaa so ne bɛen so, na mmenia kosa kɔtena Yerusalem wɔ ye boso, wɔ Yerusalem.

⁷ “AWURADE koli moa kɔpepɛ kole Yuda ɛtena sua mɔ, amaa ɔnate so Dawide awuro ama animnyam ne Yerusalemfoɛ b’animnyam bambagya bandra Yuda.

⁸ Sɔ kyẽa ne, AWURADE kɔbɔ Yerusalemfoɛ nwo waen; na bɛ nu biala bɔ ɔyɛ mmerɛ ne, sɔ kyẽa ne, ɔkɔyɛ kyɛ Dawide; yeɛ Dawide awuro ama kɔyɛ kyɛ Nyameɛ, kyɛ AWURADE abɔfo bɔ oli bɛ nyunu ne.

⁹ Na sɔ kyẽa ne, ngɔfa ngosie me nye so kyɛ ngɔbɔ maen maen amukoraa bɔ bafa koɛ baateta Yerusalem ɔ.

Awuyebɔlɛ kyẽa

¹⁰ “Ngohwie ɛlolɛ ne sufrɛ sunzum ngogua Dawide awuro ama ne Yerusalemfoɛ so, amaa ɔnate so bafa bɛ nye bato me bɔ basina me ne aso; na bekosu ye kyɛbɔ sona su ye bahorɛ ɔ, yeɛ bekosu ye hahii kyɛbɔ sona sũ ye bamuɛbaa ɔ.

¹¹ Sɔ kyẽa ne, awuyebɔlɛ piri paa kɔwa Yerusalem bɔ ɔte kyɛ Hadadrimon awuyebɔlɛ wɔ Megido bɔnza nu ne.

¹² Aseɛ ne kɔbɔ awuye, abusua biala kɔbɔ ye deɛ, Dawide awuro ama b’abusua ne kɔbɔ bɛ deɛ, yeɛ bɛ ye mɔ kɔbɔ bɛ deɛ; Natan awuro abusua, bɛkɔbɔ bɛ deɛ, yeɛ bɛ ye mɔ kɔbɔ bɛ deɛ;

¹³ Lewi awuro abusua, bɛkɔbɔ bɛ deɛ, yeɛ bɛ ye mɔ kɔbɔ bɛ deɛ; Simei abusua ne bɛkɔbɔ bɛ deɛ, yeɛ bɛ ye mɔ kɔbɔ bɛ deɛ;

¹⁴ mmusua ngaa ne amukoraa, abusua biala kɔbɔ ye deɛ, yeɛ bɛ ye mɔ kɔbɔ bɛ deɛ.