Sakaria 10 - AHYERƐLƐ KRONGRON

¹ Odi kyɛ ɛmɔsrɛ AWURADE maa ɔtɔ esue wɔ bamborɔ mmerɛ nu; AWURADE bɔ ɔma esue muna ne, ye yeɛ ɔma esue tɔ pee ma mmenia ɔ, na ɔtɔ ma ebiala maa onya fieso aleɛ.

² Ofikyɛ abusua amoen nemɔ kekã ngwaseasɛm, ahɔmeɛ nemɔ benwu nnakannaka dwirɛ, na bɛ laleɛ nu dwirɛ bɔ bɛkekã ne, ɔte ngondombo; bɛkyekye ɛmɔ wora mbaen. Yiti maen ne kyinikyini kyɛ mmoaen, bɛyɛ anwumvo, ofikyɛ neafoɛ biala nne berɛ.

³ “M’ahone ahu mmoaenneafoɛ nemɔ so, na ngɔhwe mbɔngye nemɔ so; ofikyɛ Asafo AWURADE kɔɔpasa ye mmoaen kure bɔ ye ole Yuda awuro ama ne anwo, na ɔkɔfa bɛ kɔyɛ kyɛ ye anidie pɔngɔ wɔ koɛ nu.

⁴ Ye nu yeɛ ndweasoɛ nyɔboɛ ne kofi ɔ, ye nu yeɛ pɛmbɛen ne kofi ɔ, ye nu yeɛ koɛhonɛ agyaen ne kofi ɔ, ye nu yeɛ maenbulɛniɛ biala kofi ɔ.

⁵ Na bɛkɔyɛ kyɛ katakyie mɔ bɔ betiatia bɛ pɔfoɛ mɔ so wɔ mmorɔnoɛ so nnɛterɛ nu wɔ koɛ nu ɔ. Bɛkɔho koɛ, ofikyɛ AWURADE gyi bɛ si, na pɔngɔhanɛfoɛ bɔ bɛtete pɔngɔ so ɔ bɛ nyunu kogua ase.

⁶ “Ngɔma Yuda awuro ama b’ahone kɔyɛ se, na ngɔpepɛ ngole Yosef awuro ama. Ngosa ngɔfa bɛ ngɔwa ngɔɔbɔ bɛ atenaseɛ, ofikyɛ manwu bɛ anwumvoin, ngɔyɛ bɛ kyɛ nna bɛ yeɛ mbole bɛ ne, ofikyɛ me ole AWURADE bɛ Nyameɛ, na ngotie bɛ sufrɛ.

⁷ Efraim kɔyɛ kyɛ katakyie, na bɛ ti anu kɔyɛ bɛ fɛfɛɛfɛ kyɛ bano nzaa ɔ. Amba, bɛ mma konwu ye, na bekoli ahurusi, na bɛ ti anu kɔyɛ bɛ fɛfɛɛfɛ wɔ AWURADE nu.

⁸ “Ngɔbɔ mvrɛma ngɔfrɛ bɛ ngɔboaboa bɛ noa, ofikyɛ mapɔ bɛ male bɛ, na bɛkɔta pee kyɛbɔ bɛtale pee ne.

⁹ Ngolualua bɛ wɔ maen maen mɔ so, na bɛkɔkaye me wɔ maen maen mɔ so dedeede dɔ, na bɛ ne bɛ mma mɔ bekonya ngoa ná basa bawa.

¹⁰ Ngosa ngɔye bɛ ngofi Misraim aseɛ so ngɔwa, yeɛ ngɔboaboa bɛ noa ngofi Asiria; na ngɔfa bɛ ngɔwa Gileade ne Lebanon aseɛ so, na berɛ aseɛ po, ɔkɔyɛ kãa kɔma bɛ.

¹¹ Ɔkɔɔfa anwokyere ɛpo ne anu, okoli ɛpo nu asorɔkye ne aso ngonim, na asue Naele nu buma mukoraa kɔwewe. Ɔkɔbrɛ Asiria anwomasoɛ ne ase, na Misraim ɛhɔtɔ ne, ye boso komini.

¹² Ngɔmaa bekogyina pindinn wɔ AWURADE nu, na ye dumaa nu yeɛ bɛkɔnate ɔ,” AWURADE noa dwirɛ ɛne.