Sakaria 1 - AHYERƐLƐ KRONGRON

¹ Dario ahennie afoɛ bɔ ɔtɔ so nyɔ ne anu, ye bosome mmɔtwɛ ne anu, AWURADE lale ye dwirɛ ali hyirele ngɔmhyɛlɛniɛ Sakaria bɔ ye baba ole Berekia bɔ ye baba ole Yido ne kyɛ,

² “AWURADE ahone huli paa wɔ ɛmɔ nana mɔ so.

³ Yiti se bɛ kyɛ, Asafo AWURADE nwa nyoo: Ɛmɔsa bɛbra me berɛ, Asafo AWURADE noa dwirɛ ɛne, na me koso ngosa ngɔwa ɛmɔ berɛ, Asafo AWURADE noa dwirɛ ɛne.

⁴ Nnɛma ɛmɔyɛ kyɛ ɛmɔ nana mɔ, bɔ ngɔmhyɛlɛfoɛ bɔ belili moa nemɔ bɔle edwirɛ ne dawure behyirele bɛ kyɛ, ‘Asafo AWURADE nwa nyoo: Ɛmɔhwe ɛmɔ nwo befi ɛmɔ bɔne atee ne ɛmɔ bɔne yɔleɛ nwo,’ ne. Nakoso bandie, yeɛ bandɛ me so, AWURADE noa dwirɛ ɛne.

⁵ Ɛmɔ nana nemɔ, bɛwɔ nisua? Yeɛ ngɔmhyɛlɛfoɛ nemɔ koso, aso bɛte ngoa nu afebɔɔ?

⁶ Nakoso me dwirɛ ne me nhyehyɛleɛ bɔ mva nduale me somvoɛ ngɔmhyɛlɛfoɛ nemɔ noa ne, aso bɛ nwo asohwenɛ wamma ɛmɔ nana mɔ so anaa? Yiti bɛsakyerale b’adwene, na besele kyɛ, ‘Kyɛbɔ Asafo AWURADE yɛle ye adwene kyɛ ɔne yɛ koli wɔ yɛ atee ne yɛ yɔleɛ nwo ne, sɔ ala yeɛ wamaa wato yɛ ɔ.’ ”

Nyameɛ twe Sion ne Yerusalem nwo nungunɛ

⁷ Dario ahennie afoɛ bɔ ɔtɔ so nyɔ ne anu, ye bosome buru ne ko ne, bɔ oli Sebate ne, ye eleburanyɔ ne nna ne aso, AWURADE lale ye dwirɛ ali hyirele ngɔmhyɛlɛniɛ Sakaria bɔ ye baba ole Berekia bɔ ye baba ole Yido ne kyɛ,

⁸ “Nyane nyekyire kɔngɔen, na yieee, né biaa bie te pɔngɔ kɔkorɛ so! Né ogyi sesea mmakaa nemɔ anu wɔ bɔnza ne anu, na né mbɔngɔ kɔkorɛ, kyerekyerɛɛ ne fufue begyigyi biaa ne si dɔ.

⁹ Yeɛ mmisale kyɛ, ‘Me mene, na ɛhemɔ, nzikyɛ ɛne?’ Yeɛ abɔfo bɔ né ɔne me dwudwo ne buale me kyɛ, ‘Ngohyire wɔ bɔ bɛte ɔ.’

¹⁰ Yiti biaa bɔ né ogyi sesea mmakaa nemɔ anu dɔ ne, obuale kyɛ, ‘Ɛhemɔ yeɛ AWURADE asoma bɛ kyɛ beehyinihyini aseɛ so ɔ.’

¹¹ Na bebuale AWURADE abɔfo bɔ né ogyi sesea mmakaa nemɔ anu dɔ ne kyɛ, ‘Yahyinihyini aseɛ so, na yieee, né aseɛ amukoraa la berɛ dinn bɔ ode ye nwome ɔ.’

¹² Yeɛ AWURADE abɔfo ne bisale kyɛ, ‘O Asafo AWURADE, Yerusalem ne Yuda nguro bɔ w’ahone ahu bɛ so afoɛ aburasoo ɛhe ne, ɔkwaadwu kyinzu yeɛ engonwu bɛ anwumvoin ɔ?’

¹³ Na AWURADE le ndɛenvɛen ne aworakyekyerɛ dwirɛ buale abɔfo bɔ né ɔne me dwudwo ne.

¹⁴ Yiti abɔfo bɔ né ɔne me yɛdwudwo ne, osele me kyɛ, ‘Bɔ ye dawure kyɛ, Asafo AWURADE nwa nyoo: Metwe Yerusalem ne Sion nwo nungunɛ piri paa,

¹⁵ nakoso maen maen mɔ bɔ bɛ so anu atɔ bɛ ne de, mafɛ bɛ so yaa piri paa; ofikyɛ mvɛle yaa kaaba bie, nakoso maen maen nemɔ de, bɛmane amaneɛnwunɛ ne yɛle piri paa.

¹⁶ Yiti AWURADE nwa nyoo: Anwumvoin yeɛ mafa mapɛ me nye maanea Yerusalem ɔ; berɛ yeɛ bekosi m’awuro ne ɔ, Asafo AWURADE noa dwirɛ ɛne, na bɛkɔfa nyamaa bɔ bɛfa besusu nikyee ne yeɛ bekosusu Yerusalem ɔ.

¹⁷ Bɔ ye dawure bieku kyɛ, Asafo AWURADE nwa nyoo: Me nguro nemɔ kosa konya ngɔsoɛ mmorosoɛ, na AWURADE kosa kɔkyekye Sion wora, na okosa kɔneanea nu kɔye Yerusalem.’ ”

Mmɛen nna nemɔ

¹⁸ Afei, ndole me nye anwuro, na yieee, nwuni mmɛen nna.

¹⁹ Yeɛ mmisale abɔfo bɔ ɔne me dwudwole ne kyɛ, “Na ɛhemɔ, nzikyɛ ɛne?” Na obuale me kyɛ, “Ɛhemɔ ole mmɛen bɔ bɛbɔle Yuda, Yisrael ne Yerusalem bɛsandele ne.”

²⁰ Afei AWURADE hyirele me tomvoɛ nna.

²¹ Yeɛ mmisale kyɛ, “Ɛhemɔ, nzikyɛ yeɛ bɛbaayɔ ɔ?” Na obuale kyɛ, “Mmɛen hemɔ yeɛ bɛbɔle Yuda bɛsandele bɔ ɔmaa ebiala wangora ye ti so ma ne. Nakoso tomvoɛ hemɔ bawa kyɛ bɛbaanwunanwuna bɛ, kyɛ maen maen bɔ bɛfale bɛ mmɛen bedwɔso betiale Yuda aseɛ bɛbɔle bɛ bɛsandele ne, bɛbaatutu bɛ mmɛen ne begua.”