Rutu 3 - AHYERƐLƐ KRONGRON

Rutu da Boase nwo berɛ

¹ Ɛlɛho bie, Rutu sia Naomi sele ye kyɛ, “Mma, aso onhia kyɛ memaa egyina wɔ gya so, amaa ɔnate so wayie wɔ yé?

² Yɛ nwoniɛ Boase wɔ berɛ. Ye yeɛ ɛne ye ndaluwa mɔ bɛyɔ adwuma ne. Tie, ɛnɛ kɔngɔen, okohuhu ayuo so wɔ nekaa bɔ bɛboro ayuo ne.

³ Yiti bia ná popa. Wura w’ataadeɛ bɔ ɔyɛ nyemene paa ná kɔ nekaa bɔ bɛboro ayuo ne. Nakoso nnɛye wɔ nwo ali kyire biaa ne kɔpem kyɛ okodidi ná ɔkɔno nzaa koyie ɔ.

⁴ Sɛ ɔda a, nea nekaa bɔ ɔkɔla ne yé. Kɔye ɛtena ne fi ye gya bo ná da berɛ; na ɔkɔha nikyee bɔ odi kyɛ ɛyɔ ɔ kohyire wɔ.”

⁵ Na Rutu sele Naomi kyɛ, “Bɔ aha biala, ngɔyɔ.”

⁶ Yiti Rutu hɔle nekaa bɔ bɛboro ayuo ne, na ɔɔyɔle kyɛbɔ ye sia hyirele ye ne ala.

⁷ Boase didili ná ɔnone nzaa yiele bɔ ye nye agye ne, ɔɔlale atokoɔ kure ne anwo. Yeɛ Rutu yɛle kudɛɛ ɔɔyele Boase gya nwo tena ne, na ɔlale berɛ.

⁸ Bebuli aleɛ nu ne, biaa ne bɔle pitiri, na ɔpɛnene ye nye ne, mvum nu, onwuni kyɛ brasua bie la ye gya ngwaen berɛ!

⁹ Obisale kyɛ, “Wɔ nwa ɛne?” Yeɛ obuale ye kyɛ, “Me ɔ, w’afaneɛ Rutu; trɛ wɔ tena ne anu fa kata me nwo, ofikyɛ wɔ yeɛ ɛte koliagyaa ɔ.”

¹⁰ Na Boase sele ye kyɛ, “Mma, AWURADE yira wɔ. Nahorɛ bɔ ali ye kekesaala ye ne, ɔtra nahorɛ bɔ ali moa ali ama wɔ sia ne. Ofikyɛ angɔanni mmerandeɛ mɔ si: kyɛ ehianiɛ oo, kyɛ sikaniɛ oo.

¹¹ Afei, mma, nnɛsuro. Nikyee bɔ ekobisa biala, ngɔyɔ ngɔma wɔ, ofikyɛ kuro wa ama mukoraa se ye kyɛ ɛte brasua bɔ wɔ suban te paa ɔ.

¹² Na ɔwɔ nu kyɛ nde abusuaniɛ kaenn de, nakoso abusuaniɛ foforɛ bie wɔ berɛ bɔ opingye wɔ sia abusua tra me ɔ.

¹³ Da wa ɛnɛ kɔngɔen ye, na aleɛ kye ngyerɛmɔ, ná sɛ ode to nu kyɛ ɔkɔyɛ ehu koliagyaa kogya wɔ a, ye de ye paa nu ɔ. Na sɛ ɔngɔyɛ ehu koliagyaa ngogya wɔ de a, ye de, kyɛ AWURADE te ase ye, me yeɛ ngɔyɛ ehu koliagyaa ngogya wɔ ɔ. Da wa ma aleɛ hye.”

¹⁴ Yiti Rutu lale ye gya ngwaen berɛ maa aleɛ hyene, nakoso odwɔsole mmerɛ bɔ né maen nu onnya ɔttetele ɔ, ofikyɛ Boase nyane adwene kyɛ, “Onni kyɛ ebiala nwu ye kyɛ braa ne wale nekaa bɔ bɛboro aburoo ne.”

¹⁵ Boase sele ye kyɛ, “W’ataadeɛ aguasoɛ bɔ owura wɔ ne, trɛ nu.” Yiti ɔtrɛle nu, na Boase pɛle ayuo olonka nzia, na ɔfa soale Rutu. Na afei Boase sili nu hɔle kuro ne anu dɔ.

¹⁶ Rutu wale ye sia berɛ, na ye sia bisale ye kyɛ, “Ɔhɔle sɛɛ, mma?” Na Rutu fale bɔ biaa ne ayɔ ama ye ne amukoraati bɔle ye amaneɛ

¹⁷ kyɛ, “Ye yeɛ ɔmane me ayuo olonka nzia he ɔ, ofikyɛ ɔnwa: ‘Nnɛfa nzanza sa kɔ wɔ sia dɔ.’ ”

¹⁸ Yeɛ Naomi buale kyɛ, “Mma, nya aboterɛ ná nea bɔ okofi edwirɛ ne anu kɔwa ɔ, ofikyɛ biaa ne ngɔhora tena, sana wabɔ edwirɛ ne porɛ ɛnɛ.”