Rutu 2 - AHYERƐLƐ KRONGRON

Rutu nwu Boase

¹ Né biaa sikaniɛ titire bie wɔ berɛ bɔ oli Boase. Ɔte Naomi ahu Elimɛlɛke ye abusuaniɛ.

² Ɛlɛho bie, Moaboniɛ Rutu sele Naomi kyɛ, “Maa ngɔ ebie bɔ okonwu me anwumvoin ɔ ye fieso, ná nni ye si mbena ayuo bɔ bate basesa maa waha berɛ ne bie.” Na obuale ye kyɛ, “Mma, atee la ase.”

³ Yiti Rutu sili nu hɔle. Oolili ayuotelɛfoɛ nemɔ si sesale bɔ waha ye si ne. Na ɔwale kyɛ eboo bɔ oofitele nu ne, né Elimɛlɛke abusuaniɛ Boase deɛ ɔ.

⁴ Sɔ mmerɛ ne, Boase fili Betlehem wale. Ɔha hyirele ayuotelɛfoɛ nemɔ kyɛ, “AWURADE gyina ɛmɔ si oo.” Na bebuale ye kyɛ, “AWURADE yira wɔ oo.”

⁵ Na Boase bisale ye somvoɛ bɔ ɔnea ayuotelɛfoɛ nemɔ aso ne kyɛ, “Sɔ taluwa he, ofi awuro beni anu?”

⁶ Yeɛ somvoɛ bɔ ɔnea ayuotelɛfoɛ nemɔ aso ne buale kyɛ, “Moaboniɛ bɔ ɔne Naomi befili Moabo aseɛ so bɛwale ne, ye ɛne.

⁷ Ɔsrɛle me kyɛ, ‘Maa nni ayuotelɛfoɛ nemɔ si ná nzesa bɔ basesa bahɔ maa waha berɛ ne bie.’ Na ɔwale ye, wagyina ye gya so fi ngyerɛmɔ maa waadwu bekye, bɔ ollele ye nwome koraa ɔ.”

⁸ Yeɛ Boase sele Rutu kyɛ, “Mma, tie, nnɛfi fie he aso, yeɛ nnɛkɔ foforɛ so kɔsesa ayuo si bɔ bate maa waha berɛ ne bie, na mmom fa wɔ nwo bɔ me ndaluwa nemɔ.

⁹ Ma wɔ nye sra nekaa bɔ bɛte ayuo ne, ná di bɛ si. Mahã mahyire mmerandeɛ nemɔ kyɛ nnɛmaa bɛha w’adwene. Sɛ nzuhɔen ku wɔ a, kɔ bua nemɔ anwo dɔ kɔno nzue bɔ mmerandeɛ nemɔ basa ne bie.”

¹⁰ Yeɛ Rutu kotole aseɛnwo berɛ, ɔfale ye nye butuli berɛ, na obisale Boase kyɛ, “Ɔwale ye sɛ bɔ alo me sɔa ye, bɔ ayɛ me paa sɔaa ye, wɔ aberɛ bɔ nde ɛwɔfoɛ ɔ?”

¹¹ Nakoso Boase buale ye kyɛ, “Ofi mmerɛ bɔ ehu wuli ɔ, bɔ ayɔ ama wɔ sia brasua ne amukoraa, babɔ me amaneɛ: kyɛbɔ ɛyakyili wɔ baba ne wɔ maame ne wɔ bɔbɔ wɔ maen berɛ, ná ɛɛtoale mmenia bɔ né ɛnze bɛ ɔ ne.

¹² Bɔ ayɔ ye, mesrɛ kyɛ AWURADE ɔma wɔ ye nwo akatuaa. AWURADE Yisrael Nyameɛ, bɔ aabɔ wɔ nwo adwaa wɔ ye ndaa bo ne, mesrɛ kyɛ ɔma wɔ akatuaa mmorosoɛ.”

¹³ Yeɛ Rutu sele kyɛ, “Me mene, kɔ so do me sɔ ala, ofikyɛ akyekye me wora. Ɔwɔ nu kyɛ nna w’afaneɛ nemɔ bie ole me, nakoso ɛne w’afaneɛ adwudwo nyemene so.”

¹⁴ Adidie mmerɛ sone ne, Boase sele ye kyɛ, “Bra baali aleɛ ye bie, ná fa wɔ paanoo ne bɔ nzaa kekarekekare ye anu bie.” Yiti Rutu tenane ayuotelɛfoɛ nemɔ anwo berɛ, na Boase mane ye ayuo bɔ bahye ne bie. Rutu lili mane ye ko yili maa ebie hale.

¹⁵ Rutu dwɔsole kyɛ ɔkwaasesa ayuo bɔ bate basesa maa waha berɛ ne bie nen, Boase sele ye mmerandeɛ nemɔ kyɛ, “Ɛ́mɔma ɔsesa bɔ baboaboa ye noa ne bie, na nnɛma ɛmɔsi ye ate.

¹⁶ Afei koso, ɛ́mɔte bie begua berɛ bɛ́ma ɔsesa, na nnɛma ɛmɔteatea ye.”

¹⁷ Yiti Rutu boaboale ayuo ne noa wɔ fie ne aso toonn maa aleɛ dwole. Yeɛ ɔborole bɔ waboaboa ye noa ne, na onyane kɔyɛ olonka buru.

¹⁸ Rutu soa wale kuro, na ye sia ne nwuni ayuo bɔ waasesa wawa ne. Afei aleɛ bɔ Rutu lili mane ye ko yili ne, ɔfale ye ngaa mane ye sia ne.

¹⁹ Yeɛ ye sia bisale ye kyɛ, “Nisua yeɛ ɛnɛ ɛɛsesale ayuo ye? Fie beni aso yeɛ ɛhɔle ɔ? Nyameɛ yira sona bɔ wayɛ wɔ paa sɔaa ye.” Yeɛ Rutu hane sona bɔ ɔhɔle ye fieso adwuma ne nwo dwirɛ hyirele ye sia ne kyɛ, “Biaa bɔ ngɔnyɔle adwuma wɔ ye fieso ne, bɛfrɛ ye Boase.”

²⁰ Na Naomi sele ye sia ne kyɛ, “AWURADE bɔ daa ɔdo teasefoɛ ne awufoɛ ne, óyira sɔ sona ne!” Naomi sa sele ye kyɛ, “Sɔ biaa ne, ɔte yɛ abusuaniɛ, yɛ bɔbɔ yɛ nwoniɛ kaenn.”

²¹ Yeɛ Moaboniɛ Rutu hane kyɛ, “Ye po ɔha hyirele me kyɛ, Fa wɔ nwo bɔ m’adwumayɔlɛfoɛ nemɔ, kɔpem kyɛ bɛkɔte m’ayuo ne amukoraa bekoyie ɔ.”

²² Na Naomi sele ye sia Rutu kyɛ, “Mma, ɔte paa kyɛ ɛkɔfa wɔ nwo kɔbɔ ye ndaluwa nemɔ ɔ; ebie mbaen fieso de, ebiaa né baha w’adwene.”

²³ Yiti ɔfale ye nwo bɔle Boase ndaluwa nemɔ, na ɔsesale ayuo alaa kɔpem kyɛ ayuo ne atokoɔ telɛ pɛle nu ɔ. Na Rutu hɔle so ne ye sia bɛtenane.