Rutu 1 - AHYERƐLƐ KRONGRON

Elimɛlɛke tu kɔtena Moabo aseɛ so

¹ Mmerɛ bɔ né maenbulɛfoɛ yeɛ bɛla Yisraelfoɛ bɛ noa ne, ɛhɔen piri bie wale maen ne anu. Na biaa bie bɔ ofi Betlehem bɔ ɔwɔ Yuda ɔ otu ɔɔtenane Moabo aseɛ so. Ɔne ɔye ne ye mma mmienzua nyɔ yeɛ bɛhɔle ɔ.

² Biaa ne li Elimɛlɛke, yeɛ ɔye ne koso li Naomi. Ye mma mmienzua nemɔ li Malon ne Kilion. Bɛte Efratefoɛ bɔ befi Betlehem bɔ ɔwɔ Yuda, na betu bɛɛtenane Moabo aseɛ so.

³ Nakoso Naomi ohu Elimɛlɛke wuli, maa ɔhale ye ne ye mma mmienzua nyɔ ne.

⁴ Begyigyale Moabo mmrasua; ko li Ɔpa, yeɛ ko koso li Rutu. Ye si ye, bɛtenane berɛ kɔyɛ afoɛ buru ne,

⁵ Malon ne Kilion bɛ munyɔ koso bewuli. Yiti braa ne mma mmienzua nyɔ ne ne ohu befili ye sa.

Naomi ne Rutu sa kɔ Betlehem

⁶ Naomi tele ye wɔ Moabo aseɛ so kyɛ AWURADE alo ye maen maa banya aleɛ. Yiti ɔne ye sia mmrasua nemɔ besili nu kyɛ befi Moabo aseɛ so besa bɛkɔ ye kuro.

⁷ Ɔne ye sia mmrasua nyɔ nemɔ betuli bɛ bo befili kuro bɔ né bɛte so ne aso, kyɛ besa bɛkɔ Yuda aseɛ so.

⁸ Nakoso Naomi sele ye sia mmrasua nyɔ nemɔ kyɛ, “Ebiala osa ɔhɔ ye maame awuro. AWURADE ɔlo ɛmɔ, kyɛbɔ ɛmɔ ne me, yeɛ bɛ bɔ bawu ne bɛtenane nyemene so ne.

⁹ Mesrɛ kyɛ AWURADE ɔma ɛmɔ nu biala onya asetena paa wɔ ɛmɔ ahu mɔ awuro.” Afei ɔtɔle bɛ nu, na besuni hahii.

¹⁰ Bebuale ye kyɛ, “Daabi, yɛne wɔ kosa kɔhɔ w’abusua nu.”

¹¹ Nakoso Naomi sele kyɛ, “Me mma mɔ, ɛ́mɔsa, nzu ati yeɛ ɛmɔpena kyɛ ɛmɔ ne me bɛkɔ ɔ? Aso ngɔhora ngosa ngɔwo mmaa mmienzua maa bekogya ɛmɔ anaa?

¹² Me mma mɔ, ɛ́mɔsa bɛhɔ, ofikyɛ nekaa bɔ manyi madwu ye, bienzua biala ngogya me. Na sɛ manya anyelasoɛ po, ná sɛ ɛnɛ kɔngɔen ye ala menya biaa megya mewo mmaa mmienzua po a,

¹³ aso ɛmɔkɔnwondɛ toonn maa bekonyi? Aso ɛmɔngogya biaa? Daabi, me mma mɔ, mali yealɛ matra ɛmɔ, ofikyɛ AWURADE ayakyi me nu amaa manwu amaneɛ.”

¹⁴ Yeɛ besa besuni hahii. Ɔpa tɔle ye sia brasua Naomi nu ɔne ye belili ngraa, nakoso Rutu de, ɔte matane ye.

¹⁵ Yeɛ Naomi sele kyɛ, “Nea kyɛ ɛhora Ɔpa wasa ye si wahɔ ye abusua ne ye nyameɛ mɔ dɔ ɔ; di ɛhora ne asi.”

¹⁶ Nakoso Rutu buale kyɛ, “Nnɛhyɛ me kyɛ nyakyi wɔ nu ngɔ, anaakyɛ nyakyi wɔ si lilɛ! Nekaa bɔ ɛkɔhɔ ne, berɛ yeɛ ngɔhɔ ɔ; yeɛ nekaa bɔ ɛkɔtena ne, berɛ yeɛ ngɔtena ɔ; wɔ maen kɔyɛ me maen, yeɛ wɔ Nyameɛ kɔyɛ me Nyameɛ.

¹⁷ Nekaa bɔ ekowu ne, berɛ yeɛ ngowu ɔ, na berɛ yeɛ bekosie me ɔ. AWURADE ɔne me li ye pasaa maa ɔbo so, sana ewue yeɛ ɔkɔtete me ne wɔ y’afia ɔ!”

¹⁸ Naomi nwuni kyɛ Rutu nye aboro kyɛ ɔne ye bɛkɔhɔ ne, wanga hwee wangyire ye ko.

¹⁹ Yiti bɛ munyɔ besili nu bɛhɔle beedwuli Betlehem. Na beedwuli Betlehem nen, ɔnate bɛ ti, kurotue ne amukoraa bɔle twi, na mmrasua nemɔ bisale kyɛ, “Yiti Naomi ɛhe?”

²⁰ Na Naomi sele bɛ kyɛ, “Nnɛma ɛmɔfrɛ me Naomi ko, ɛ́mɔfrɛ me Mara, ofikyɛ Ɛdangama ama me bra ayɛ weewee.

²¹ Me sa bum yeɛ mva ngɔle ɔ, nakoso AWURADE amaa masa mawa nzanza; nzu ati yeɛ ɛmɔfrɛ me Naomi, wɔ berɛ bɔ AWURADE ne me ali ye anyeborolɛ so, ná Ɛdangama amaa asane piri ato me ɔ?”

²² Yiti Naomi ne ye sia brasua Moaboniɛ Rutu, bɔ ɔne ye befili Moabo aseɛ so besa bɛwale ne, bɛwale Betlehem mmerɛ bɔ né bɛ́hyɛ ye bo bɛte ayuo ɔ.