Romanfoɛ 9 - AHYERƐLƐ KRONGRON

Nyameɛ ne ye mmenia Yisraelfoɛ

¹ Meka nahorɛ ne wɔ Kristo nu, membɛ ngondombo; na me tiboa koso di me adanzeɛ wɔ Sunzum Krongron nu.

² kyɛ medi aworabɔlɛ pee ne yealɛ daa wɔ m’ahone nu.

³ Ɔhale me ngome a, ahaa mayɛ abusudeɛ sona maa mahwere Kristo, ɔnate ngoalelɛ bɔ m’anwoɔnaen nu aliɛmaa mɔ bɔ bɛte abusuafoɛ ne bekonya ye ne ati.

⁴ Bɛte Yisraelfoɛ bɔ baayɛlɛ, animnyam, apam nemɔ, mmeraahyehyɛlɛ, ɛsɔnenɛ ne bɔhyɛ nemɔ bɛte bɛ deɛ ɔ.

⁵ Bɛ yeɛ yɛ nana mbanyi mɔ bɛte bɛ deɛ ɔ; na anwoɔnaen nu, bɛ bosoniɛ ole Kristo bɔ ɔte nningyein mukoraa so Nyameɛ bɔ bayira ye afebɔɔ ne. Amen.

⁶ Nna kyɛ ebiaa Nyameɛ dwirɛ ne ayɛ mbaen ɔ, ofikyɛ nna bɛ bɔ befi Yisrael nu amukoraa yeɛ bɛte Yisraelfoɛ ɔ.

⁷ Anaa nna Abraham bosofoɛ mukoraa yeɛ bɛte Abraham mma kaenn ɔ, ofikyɛ Nyameɛ ha hyirele Abraham kyɛ, “Ɔnate Yisake so yeɛ ekonya wɔ bosofoɛ ɔ.”

⁸ Ɛhe kyire kyɛ nna anwoɔnaen nu mma yeɛ bɛte Nyameɛ mma ɔ; na mmom bɔhyɛ ne mma yeɛ bebu bɛ kyɛ ye bosofoɛ kaenn ɔ.

⁹ Ofikyɛ Nyameɛ bɔhyɛ ne hane kyɛ, “Afoɛ bieku bekye sɔa ngosa ngɔwa ne, né Sara awo baa bienzua.”

¹⁰ Nna kyɛ ɛhe ngome, na Rebɛka koso ɔne biaa ko bɛnwonzɛle, bɔ ye ole yɛ nana Yisake ne.

¹¹ Ɔwɔ nu kyɛ né bennya bɛwwole bɛ de, na wawa kyɛ po bɛyɔ paa anaa tɛɛ biala ɔ. Nakoso kyɛbɔ ɔkɔyɛ na Nyameɛ nhyehyɛleɛ, bɔ oggyi nnwumaa so, na mmom ogyi bɛ nu ko frɛlɛ so kɔwa nu ne ati,

¹² osele Rebɛka kyɛ, “Panyi ne kɔso kãa ne.”

¹³ Kyɛbɔ bahyerɛ kyɛ, “Ngurole Yakob dwirɛ, nakoso Yisɔ de, mbɔle ye.”

¹⁴ Afei, yɛkɔhã ye sɛ? Aso Nyameɛ te nyeyemuɛ anaa? Dabida!

¹⁵ Ofikyɛ ɔhã hyirele Mose kyɛ, “Bɔ ngonwu ye anwumvo ne yeɛ ngonwu ye anwumvoin ɔ, yeɛ bɔ ye nwo kɔyɛ me aworabɔ ne yeɛ ye nwo kɔyɛ me aworabɔ ɔ.”

¹⁶ Yiti oggyi bɔ kuro sona okuro anaa bɔ ɔkɔyɔ so, na mmom ogyi Nyameɛ anwumvoinnwunɛ so.

¹⁷ Na ɛhe ati yeɛ Ahyerɛlɛ ne sele Faro kyɛ, “Mapagya wɔ, kyɛbɔ ngɔfa wɔ so ngɔma me tumi kɔla ali wɔ wɔ nu, ná babɔ me dumaa wɔ aseɛ so amukoraa ɔ.”

¹⁸ Na sɛ sɔ yeɛ ɔte de a, nzaade sona biala bɔ Nyameɛ kuro ye dwirɛ yeɛ onwu ye anwumvoin ɔ; yeɛ sona biala bɔ Nyameɛ kuro ne, yeɛ opini ye ahone ɔ.

Pɔɔlo kyire Nyameɛ yaa ne ye anwumvoin bo

¹⁹ Afei ebie kobisa me kyɛ, “Nzaade nzu ati yeɛ Nyameɛ tɛnwu sona nwo mvomsoɛ ɔ? Nwa yeɛ ɔkɔhora kosi Nyameɛ apɛdeɛ nwo atee ɔ?”

²⁰ Nzaade kuro sona, wɔ ole nwa bɔ ɛne Nyameɛ di nyeyeanoɛ ɔ? Bua ngora mmisa bɔ ɔnwone ye ne kyɛ, “Nzu ati yeɛ ɛnwone me sɔa ɔ?”

²¹ Ngukuenwonɛniɛ ne, aso olle ɛfaa so tumi, kyɛ ɔfa ɛfaa torɛ komapɛ ne ala ɔnwo bua ko maa ɔyɛ nyemenenyemene ná ɔnwo ko koso maa ɔyɛ bibirikyii ɔ?

²² Sɔ ala yeɛ Nyameɛ ayɔ ɔ. Ɔyɛle kyɛ ahaa ɔkɔla ye yaafɛlɛ piri ne ye tumi ali. Nakoso onyane aboterɛ mane bɛ bɔ ɔfɛle bɛ nwo yaa bɔ b’ayieleɛ ole ewue ne.

²³ Afei koso ɔyɛle kyɛ ɔkɔla ye animnyam mmorosoɛ ne ali kohyire bɛ bɔ wanwu bɛ anwumvoin ne, ofikyɛ wasiesie bɛ wasie berɛ dada kyɛ bɛfata ye animnyam ne.

²⁴ Ofikyɛ wamvrɛ yɛ wamvi Yudafoɛ ngome nu, na mmom ɔfrɛle yɛ fili Amaenmaensofoɛ koso nu bie.

²⁵ Kyɛbɔ bahyerɛ ye wɔ Hosea nwomaa ne anu kyɛ, “Mmenia bɔ ahaa bɛtte me deɛ ne, ngɔfrɛ bɛ ‘Me mmenia,’ na bɔ manguro ye dwirɛ ne, ngɔfrɛ ye ‘Me dɔfo.’

²⁶ Na nekaa bɔ besele bɛ kyɛ, ‘Ɛmɔtte me maen’ ne, berɛ ala yeɛ bɛkɔfrɛ bɛ Nyameɛ teasefoɛ ne mma ɔ.”

²⁷ Yesaya koso pakyele nu ha fale Yisraelfoɛ nwo serɛserɛ kyɛ, “Yisraelfoɛ sone pee kyɛ mboanoa anweaa de, nakoso bɛ nu kãa bie yeɛ bekole bɛ ngoa ɔ;

²⁸ ofikyɛ Awurade kɔma ye dwirɛ kɔwa nu ndɛndɛ so ne nyeranyera so wɔ aseɛ so.”

²⁹ Kyɛbɔ Yesaya hã tole berɛ kyɛ, “Sɛ Asafo Awurade wanyakyi mmaa wamma yɛ a, ahaa yayɛ kyɛ Sodom, ná yakakyi kyɛ Gomora.”

Yesu Kristo nu gyidie maa yɛyɛ teneneefoɛ

³⁰ Afei, yɛkɔhã ye sɛ? Amaenmaensofoɛ bɔ bandwene ye nwo le kyɛ bɛkɔpena tenenee si atee nen, bɛnate gyidie so banya tenenee.

³¹ Nakoso Yisrael bɔ olili tenenee mmeraa ne asi ne de, wangora wandwu tenenee mmeraa ne anwo.

³² Nzu ati ɔ? Ofikyɛ bamva gyidie so bambere tenenee, na mmom bɛfale bɛ nnwumaa bɔ bɛyɔle ɔ so. Yiti besotili wɔ sundiboɔ ne aso,

³³ kyɛbɔ bahyerɛ kyɛ, “Tie, méfa nyɔboɛ bie méto Sion bɔ ɔkɔyɛ sundiboɔ kɔma mmenia ɔ, nyɔbotaen bɔ ɔkɔmaa bekofi ase ɔ; nakoso ebiala bɔ okole ye koli ne, ye nyunu ngogua ase.”