Romanfoɛ 8 - AHYERƐLƐ KRONGRON

Ngoa wɔ Sunzum ne anu

¹ Afei de, foɛbualɛ biala nne berɛ mma bɛ bɔ bɛte Kristo Yesu nu ne.

² Ofikyɛ Kristo Yesu nu ngoa Sunzum mmeraa ne, wapepɛ wale me wafi bɔne ne ewue mmeraa ne anu.

³ Na bɔ mmeraa ne wangora wanyɔ, bɔ ɔnate kyɛ anwoɔnaen ne maa ɔyɛle mmerɛ ne ati, Nyameɛ ayɔ. Ɔsomane Ɔwa komapɛ ne maa ɔyɛle ye nwo kyɛ kuro sona, bɔ ole bɔne nwonaen ɔ, na ɔfa buale bɔne foɛ wɔ anwoɔnaen nu,

⁴ amaa ɔnate so mmeraa ne nwo tenenee wawa nu wɔ yɛ nu, yɛ bɔ yɛnnate anwoɔnaen nu, na mmom yɛnate Sunzum nu ne.

⁵ Ofikyɛ bɛ bɔ bɛwɔ anwoɔnaen nu ne, bɛdwene anwoɔnaen nu nningyein nwo; nakoso bɛ bɔ bɛwɔ Sunzum nu ne de, bɛdwene Sunzum nu nningyein nwo.

⁶ Sɛ ɛma anwoɔnaen nu adwenedwene bada wɔ so a, ɔne ewue yeɛ bɛnate ɔ; nakoso Sunzum nu adwenedwene de, ɔma ngoa ne asomdwee.

⁷ Ofikyɛ anwoɔnaen nu adwenedwene pɔ Nyameɛ, ɔngora mmerɛ ye nwo ase nwura Nyameɛ mmeraa bo, ɔngora nyɔ sɔ amba.

⁸ Na bɛ bɔ bedi anwoɔnaen n’ahyɛdeɛ so ne, bɛngora bɛnzɔ Nyameɛ nye.

⁹ Ɛmɔ de, ɛmɔnni anwoɔnaen nhyehyɛleɛ so, na mmom Sunzum nhyehyɛleɛ so, ofikyɛ Nyameɛ Sunzum te ɛmɔ nu. Na ebiala bɔ olle Kristo Sunzum ne, ɔtte Kristo deɛ.

¹⁰ Na sɛ Kristo te ɛmɔ nu de a, ɔwɔ nu kyɛ ɔnate bɔne ti ɛmɔ nipadua ne awu de, nakoso ɔnate tenenee ti ɛmɔ Sunzum ne le ngoa.

¹¹ Na sɛ ye bɔ otingyele Yesu fili awufoɛ nu ne ye Sunzum te ɛmɔ nu a, ye bɔ otingyele Kristo Yesu fili awufoɛ nu ne, ɔkɔma ɛmɔ nipadua bɔ owu ne ngoa, na ɔkɔfa ye Sunzum bɔ ɔte ɛmɔ nu ne aso yeɛ ɔkɔyɔ sɔ ɔ.

¹² Yiti aliɛmaa mɔ, yɛmma anwoɔnaen ne kerɛ, ná wawa kyɛ yatena ase yama anwoɔnaen ne.

¹³ Ofikyɛ sɛ ɛmɔbɔ ɛmɔ bra kyɛbɔ anwoɔnaen ne kuro a, ɛmɔkowu. Nakoso sɛ ɛmɔfa Sunzum ne beku anwoɔnaen nnwumaa de a, ɛmɔkonya ngoa.

¹⁴ Ɔnate kyɛ sona biala bɔ Nyameɛ Sunzum ne ɔyɛ ye taataa ne, ɔte Nyameɛ awa.

¹⁵ Ofikyɛ ɛmɔannya ngoaayɛlɛ sunzum bɔ ɔkɔmaa ɛmɔkosa bekosuro ɔ; na mmom baayɛlɛ Sunzum yeɛ ɛmɔanya ɔ, bɔ ɔmaa yɛtea nu kyɛ: “Abba! Baba!”

¹⁶ Sunzum ne bɔbɔ ɔne yɛ sunzum bedi adanzeɛ kyɛ yɛte Nyameɛ mma.

¹⁷ Na sɛ yɛte Nyameɛ mma de a, ye de yɛle agyapadeɛ, yɛle agyapadeɛ wɔ Nyameɛ nu, yɛne Kristo yɛbɔ nu yɛle agyapadeɛ; nakoso sana yɛne ye nwu amaneɛ koraka, amaa ɔnate so bahyɛ yɛ ne ye animnyam.

Yɛkonya animnyam kyẽa bie

¹⁸ Mebu amaneɛ bɔ yɛnwu ye kekesaala ye ne kyɛ, yɛngora yɛngɔfa ngɔtoto animnyam bɔ bɛbaala ye ali bekyire yɛ ne anwo.

¹⁹ Na abɔdeɛ ɔnwondɛ serɛserɛ kyɛ bɛkɔla Nyameɛ mma nemɔ ali ɔ.

²⁰ Ofikyɛ bɛfale abɔdeɛ bewurale nikyee mbaen bie abo, bɔ nna ye bɔbɔ ye pɛ ahɔ ɔ; na mmom bɔ ɔfale ye wurale sɔ nikyee ne abo wɔ anyelasoɛ nu ne, ye pɛ ɔ;

²¹ ofikyɛ abɔdeɛ ne bɔbɔ deinn, bɛkɔpepɛ bekole ye bekofi ngoaasolɛ porɔlowaa nu bɛkɔhɔ Nyameɛ mma fawɔnwodi animnyam ne anu.

²² Yɛse kyɛ ɔbaadwu ɛnɛ ye, abɔdeɛ amukoraa ɔpene, na wafo aworɛ so bɔ onwu amaneɛ ɔ.

²³ Nakoso nna abɔdeɛ ngome, na mmom yɛ bɔbɔ koso bɔ yanya Sunzum nu mmaa bɔ oli moa ne, yɛpene wɔ yɛ nu, mmerɛ bɔ yɛnwondɛ kyɛ bɛkɔfa yɛ bɛkɔyɛ mmaa ɔ, bɔ ɔte ɛpepɛlɛ bɔ bɛkɔpepɛ bekole yɛ nipadua ne ɔ.

²⁴ Ofikyɛ bɛnate anyelasoɛ so yeɛ belele yɛ ngoa ɔ; na anyelasoɛ bɔ bɛ nye nwu ye ne de, ɔtte anyelasoɛ. Ofikyɛ bɔ sona ye nye tua ne, ɔkɔyɛ sɛɛ né wanya ye nwo anyelasoɛ?

²⁵ Na sɛ yɛ nye la bɔ yɛnnwu ye so a, ye de yɛfa aboterɛ yɛwondɛ.

²⁶ Sɔ ala yeɛ Sunzum ne boka yɛ wɔ yɛ mmerɛyɛlɛ nu ɔ, ofikyɛ yɛnze kyɛbɔ ɔsɛ kyɛ yɛbɔ mbaeɛ ɔ. Nakoso Sunzum ne bɔbɔ ogyina yɛ gya nu, na ɔfa ɛpenenɛ bɔ bɛngora bɛmva edwudwolɛ bɛnga ɔ so ɔsrɛ ma yɛ.

²⁷ Na bɔ ɔpɛnzɛpɛnzɛ mmenia ti anu adwene nu ne, ɔse Sunzum ne ti anu adwene, ofikyɛ Sunzum ne srɛ ma anwoteefoɛ kyɛbɔ Nyameɛ pɛ si te ɔ

²⁸ Yɛse kyɛ bɛ bɔ bekuro Nyameɛ dwirɛ ne, bɔ okosi biala ɔboka bɛ, bɛ bɔ ɔnate ye nhyehyɛleɛ so wafrɛ bɛ ne.

²⁹ Bɛ bɔ onwuni bɛ siele ne, osa tuli bɛ siele berɛ, kyɛ benya Ɔwa ne sue ne bie, amaa ɔnate so wayɛ aliɛmaa mɔ pee nu bamuɛbaa.

³⁰ Na bɛ bɔ otuli bɛ siele berɛ ne, osa frɛle bɛ; na bɛ bɔ ɔfrɛle bɛ ne, obuale bɛ be koso, na bɛ bɔ obuale bɛ be ne, ɔhyɛle bɛ animnyam koso.

Nyameɛ ɔdɔ bɔ ɔwɔ Yesu Kristo nu ɔ

³¹ Afei nzikyɛ yeɛ yɛkɔhã kɔfa ɛhemɔ nwo ɔ? Sɛ Nyameɛ gyi yɛ si a, nwa yeɛ ɔkɔho kotia yɛ ɔ.

³² Sɛ wamva ye bɔbɔ Ɔwa wammɔ atianuserɛ, na mmom yɛ mukoraa yɛ ti ɔyele ye mane a, ɔkɔyɛ sɛɛ bɔ ɔngɔfa nningyein mukoraa ngɔboka ye so ngɔma yɛ ɔ?

³³ Nwa yeɛ ɔkɔbɔ bɛ bɔ Nyameɛ waneanea nu waye bɛ ne kwaadu ɔ? Nyameɛ yeɛ obua be ɔ.

³⁴ Nwa yeɛ obua foɛ ɔ? Yesu Kristo bɔ owuli ná otingyele fili awufoɛ nu ne, bɔ ɔte Nyameɛ sa famaa so, bɔ ɔsrɛ ma yɛ ne.

³⁵ Nwa yeɛ ɔkɔte yɛ kofi Kristo ɔdɔ ne anwo ɔ? Amaneɛnwunɛ anaa anwokyere anaa ndaneanyeɛ anaa ɛhɔen anaa kwaterekwa anaa amaneɛnwunɛ anaa ngrandɛ?

³⁶ Ofikyɛ bahyerɛ kyɛ, “Ɔnate wɔ ti beku yɛ daa biala; na bebu yɛ kyɛ mmoaen bɔ bɛkwaahũ bɛ ɔ.”

³⁷ Nakoso ɛhemɔ amukoraa nu ne, yɛfa bɔ okuro yɛ dwirɛ ne aso yɛdi ngonim mmorosoɛ.

³⁸ Na mese ye pefee kyɛ ewue anaa ngoa, anaa abɔfo mɔ, anaa ewienu atumifoɛ, anaa nningyein bɔ ɔwɔ berɛ kekesaala ye, anaa nningyein bɔ ɔbaawa, anaa tumi,

³⁹ anaa anwuro, anaa kumaa kuronn, anaa abɔdeɛ nu nikyee biala ngɔhora ngɔtete yɛ ngofi Nyameɛ ɔdɔ bɔ ɔwɔ yɛ Awurade Kristo Yesu nu ne anwo le.