Romanfoɛ 6 - AHYERƐLƐ KRONGRON

Bɔne olle yɛ so tumi ko

¹ Afei yɛkã ye sɛ? Yiti yɛhɔ so yɛyɔ bɔne, amaa yanya Nyameɛ adom ne mmorosoɛ anaa?

² Dabida! Yɛ bɔ yawu yafi bɔne nu ne, ɔkɔyɛ sɛɛ ná yahɔ so yatena bɔne nu?

³ Anaa ɛmɔnze kyɛ yɛ bɔ bɛbɔle yɛ asu wɔ Kristo Yesu nu ne, bɛbɔle yɛ asu bɛhɔle ye wue nu ɔ?

⁴ Yiti basie yɛ ne ye wɔ asubɔlɛ nu bahɔ ye wue nu. Ofikyɛ kyɛbɔ Baba n’animnyam tumi ne tingyele Kristo fili awufoɛ nu ne, sɔ ala yeɛ ɔsɛ kyɛ yɛnate ngoa foforɛ nu ɔ.

⁵ Sɛ yɛne ye ayɛ ko wɔ ye wue nu de a, sɔ ala yeɛ yɛne ye kɔyɛ ko wɔ ye wutingyelɛ nu ɔ.

⁶ Yɛse kyɛ babɔ yɛ sona sue daa ne ne Kristo mmeamudua nu, kyɛbɔ yɛ bɔne nipadua ne kowu na yanyɛ bɔne ngoaa ko ɔ.

⁷ Ofikyɛ sona biala bɔ wawu ne, wanya fawɔnwodi wafi bɔne tumi bo.

⁸ Yiti sɛ yɛne Kristo awu de a, nzaade yɛde yɛdi kyɛ yɛne ye kɔtena ngoa nu koso.

⁹ Yɛse kyɛ batingye Kristo bafi awufoɛ nu, na ongowu ko le; ewue olle tumi wɔ ye so ko.

¹⁰ Na ye wue ne, owu lili bɔne so ngonim pɛen ko; na ase bɔ ɔte kekesaala ye ne, ɔte ma Nyameɛ.

¹¹ Sɔ ala yeɛ odi kyɛ ɛmɔbu ɛmɔ nwo kyɛ bɔne olle ɛmɔ so tumi ko ɔ, na ɛmɔte ase wɔ Kristo Yesu nu ma Nyameɛ.

¹² Yiti nnɛmɔma bɔne di ɛmɔ nipadua so hene bɔ ɔkɔmaa ɛmɔkɔyɛ sotie kɔma ye akɔnnɔdeɛ ɔ.

¹³ Afei, nnɛma ɛmɔfa ɛmɔ nipadua akwaa biala bɛma bɔne ná wamva wanyɔ amumuyɛɛ, na mmom ɛ́mɔfa ɛmɔ nwo bɛ́ma Nyameɛ kyɛ bɛ bɔ befi ewue nu bahɔ ngoa nu ɔ. Ɛ́mɔfa ɛmɔ nwo amukoraa bɛ́ma ye, ná ɔfa yɔ tenenee nnwumaa.

¹⁴ Nnɛmɔma bɔne di ɛmɔ so hene, ofikyɛ nna mmeraa bo yeɛ ɛmɔwura ɔ, na mmom ɛmɔwura Nyameɛ adom bo.

Yɛte tenenee ngoaa

¹⁵ Afei nzikyɛ bieku? Ɔnate kyɛ yɛwwura mmeraa bo, na mmom yɛwura adom bo ne ati, yiti odi kyɛ yɛyɔ bɔne anaa? Dabida!

¹⁶ Ɛmɔnze kyɛ sona bɔ ɛmɔyɛ sotie bɛma ye ne, sɔ sona ne yeɛ ɛmɔte ye ngoaa ɔ, ɛmɔte ngoaa bɛma sona bɔ ɛmɔyɛ sotie bɛma ye ɔ, kyɛ bɔne bɔ ɔfa wɔ kɔ ewue nu oo, anaakyɛ sotie bɔ ɔfa wɔ kɔ tenenee nu oo?

¹⁷ Ɛmɔma yɛla Nyameɛ ase! Ofikyɛ ɛmɔayɛ bɔne ngoaa le, na afei de ɛmɔafa b’ahone mukoraa bayɛ sotie bama nahorɛ, bɔ ɛmɔanya bafi ngyerɛkyerɛ bɔ bɛfa bɛmane ɛmɔ ne anu ne.

¹⁸ Na afei ɛmɔanya fawɔnwodi bafi bɔne nu, na ɛmɔayɛ tenenee ngoaa.

¹⁹ Ɔnate ɛmɔ anwoɔnaen mmerɛyɛlɛ ti yeɛ mafa kuro sona atee so madwudwo mahyire ɛmɔ ɔ. Na kyɛbɔ mmerɛ bie ɛmɔfale ɛmɔ nwonaen akwaa bɛyɛle ngoaa bɛmane efiɛ ne amumuyɛɛ mbiri mbiri ne, sɔ ala yeɛ odi kyɛ afei ɛmɔfa ɛmɔ nwonaen akwaa besie berɛ bɛma tenenee bɛkɔ krongronyɛlɛ nu ɔ.

²⁰ Mmerɛ bɔ né ɛmɔte bɔne ngoaa nen, né ɛmɔ ne tenenee afia atete.

²¹ Daa bra bɔ ɛmɔbɔle ne, bɔ ɛnɛ ɔyɛ ɛmɔ nya ye, nzikyɛ mvasoɛ yeɛ ɛmɔnya befili nu ɔ? Sɔ nningyein nemɔ, b’ayieleɛ te ewue.

²² Na kekesaala ye de, bale ɛmɔ bafi bɔne nu amaa ɛmɔayɛ Nyameɛ ngoaa. Ye so mvasoɛ bɔ ɛmɔnya ole kyɛ, ɛmɔayɛ krongron bɔ ye ayieleɛ ole daa ngoa.

²³ Ofikyɛ bɔne akatuaa ole ewue; na Nyameɛ adom akyɛdeɛ ole daa ngoa wɔ y’Awurade Yesu Kristo nu.