Romanfoɛ 3 - AHYERƐLƐ KRONGRON

¹ Sɛ ɔte sɔ de a, né nzikyɛ yeɛ ɔma Yudafoɛ bedi mu bɛtra Amaenmaensofoɛ ɔ? Anaa bienzuapɛlɛ nwo mvasoɛ ole sɛɛ?

² Ye nwo le mvasoɛ atee pee so! Bɔ oli moa ɔ, Nyameɛ fale ye noa dwirɛ wurale Yudafoɛ bɛ sa.

³ Na sɛ bɛ nu biemɔ banni nahorɛ de ɛ? Aso ɛhe kyire kyɛ Nyameɛ koso nni nahorɛ anaa?

⁴ Dabida! Ɔwɔ nu kyɛ kuro sona biala te ngondomboniɛ de, nakoso Nyameɛ de ɔtte sɔ, odi nahorɛ, kyɛbɔ bahyerɛ kyɛ, “Kyɛbɔ bekonwu kyɛ wɔ noa dwirɛ te nahorɛ, na sɛ bebua wɔ ndɛen a, ali be ɔ.”

⁵ Sɛ yɛ bɔne boka ma Nyameɛ tenenee da adi petee a, ye de yɛkɔha ye sɛ? Yiti sɛ Nyameɛ fɛ yɛ so yaa a né wayɛ tɛɛ anaa? (Medwudwo kyɛ kuro sona).

⁶ Dabida! Sɛ Nyameɛ nga nahorɛ a, nzaade ɔkɔyɛ sɛɛ né wabua wiase ndɛen?

⁷ Na sɛ me ngondombo ma Nyameɛ nahorɛ da di petee maa onya animnyam a, né nzu ati yeɛ bebua me ndɛen kyɛ nde bɔnefoɛ ɔ?

⁸ Ebiemɔ to yɛ soen kyɛ yɛnwa, “Ɛ́mɔma yɛyɔ bɔne ná paa fi nu bra.” Na bekobua bɛ ye nwo ndɛen kyɛbɔ ɔfata ɔ.

Kuro sona biala ndengyɛ

⁹ Sɛ sɔ yeɛ ɔte hɔ a, né yɛ Yudafoɛ yɛte paa yɛtra Amaenmaensofoɛ anaa? Dabida! Ɔnate kyɛ yali moa yahyire kyɛ Yudafoɛ ne Amaenmaensofoɛ mukoraa wura bɔne tumi bo.

¹⁰ Kyɛbɔ bahyerɛ kyɛ, “Sona biala nne berɛ bɔ ɔte teneneeniɛ ɔ, ko po nne berɛ;

¹¹ sona biala nne berɛ bɔ ole ndeaseɛ ɔ. Ebiala nne berɛ bɔ ɔpena Nyameɛ si atee ɔ.

¹² Bɛ mukoraa bali makyebu; bɛ nu biala nwo olle mvasoɛ, ebiala nne berɛ bɔ ɔyɔ paa ɔ, ko po nne berɛ.

¹³ Bɛ noa dwirɛ te asieleɛ bɔ so abukye ɔ, na bɛfa bɛ temverema bɛlakalaka mmenia, ewoo noa borɔ wɔ bɛ noa nu.

¹⁴ Amoenwaa ne edwirɛ yealɛ ayi bɛ noa nu tɛkyɛ.

¹⁵ Bɛ nwo yɛ nyera wɔ awuelilɛ nu,

¹⁶ na nekaa biala bɔ bekotia ne, bɛma basabasayɔlɛ ne amaneɛnwunɛ ba berɛ.

¹⁷ Asomdwee atee de bɛnze,

¹⁸ yeɛ Nyameɛ surolɛ nne bɛ nu.”

¹⁹ Afei yɛse kyɛ nikyee biala bɔ mmeraa ne kã ne, ɔkã kyire bɛ bɔ bɛwɔ mmeraa ne abo ɔ. Na ɔnate sɔ ne ati, ebiala ngɔhora ngɔhã ngɔtete ye nwo, na Nyameɛ kobua wiase amukoraa ndɛen.

²⁰ Yiti bengogyina mmeraa nnwumaa so bengobua sona biala be wɔ Nyameɛ nyunu, ofikyɛ mmeraa ne de, ɔma sona nwu ye bɔne.

Kyɛbɔ Nyameɛ siesie ye ne sona afia ɔ

²¹ Nakoso afei de, Nyameɛ ala ye tenenee ali bɔ wamva mmeraa ne aso ɔ; na mmeraa ne ne ngɔmhyɛlɛfoɛ nemɔ bedi ɛhe nwo adanzeɛ.

²² Nyameɛ nate sona gyidie bɔ ɔwɔ Yesu Kristo nu so yeɛ ɔfa siesie ye ne kuro sona afia ɔ, ɔnate kyɛ Nyameɛ nyɛ nyeyemuɛ.

²³ Ofikyɛ mmenia mukoraa bayɔ bɔne, na Nyameɛ animnyam abɔ bɛ.

²⁴ Nyameɛ nate ye adom bɔ ɔfa kyɛ mbaen ne aso obua bɛ be wɔ Kristo Yesu nu ngoalelɛ ne anu.

²⁵ Ye yeɛ Nyameɛ afa ye wasie berɛ kyɛ mbata nikye bɔ ɔnate ye mogya nu gyidie so, bɔ wafa wahyire ye tenenee kyɛ bɔne bɔ bayɔ ye daa ne, wakyikyi wafi berɛ wɔ Nyameɛ aboterɛ nu;

²⁶ na ɔfa kyire wɔ sɔ mmerɛ ye anu kyɛ, ye bɔbɔ ɔte tenenee, na ebiala bɔ ode Yesu di ne, obua ye be.

²⁷ Afei nzikyɛ yeɛ yɛfa yɛhoahoa yɛ nwo ɔ? Yɛlle hwee! Kyɛ yɛdi mmeraa ne aso anaa? Anaakyɛ yɛ yɔleɛ paa ti ɔ? Daabi, na mmom ɔnate gyidie so.

²⁸ Yiti bɔ yɛse ole kyɛ Nyameɛ nate gyidie so yeɛ ɔyɛ bɔnefoɛ teneneeniɛ ɔ, na nna kyɛ mmeraa ne bɔ odi so ti ɔ.

²⁹ Anaa Nyameɛ te Yudafoɛ ngome bɛ Nyameɛ? Aso ɔtte Amaenmaensofoɛ koso bɛ Nyameɛ? Ɔte bɛ koso bɛ Nyameɛ.

³⁰ Ofikyɛ Nyameɛ te komapɛ twe, na okogyina bienzuapɛlɛfoɛ bɛ gyidie so kobua bɛ be; yeɛ okogyina bɛmbɛ-bɛ-bienzuafoɛ koso bɛ gyidie so kobua bɛ be.

³¹ Yiti ɔnate gyidie he ati yɛto mmeraa ne yɛgua anaa? Dabida! Na mmom yɛde mmeraa ne yɛto nu.