Romanfoɛ 15 - AHYERƐLƐ KRONGRON

Ɛ́mɔsuasua Yesu

¹ Yɛ bɔ yɛ nwo yɛ se wɔ gyidie nu ne, ɔsɛ kyɛ yɛsoa bɛ bɔ bɛ nwo nyɛ se nemɔ bɛ mmerɛyɛlɛ, na ɔnzɛ kyɛ yɛyɔ bɔ ɔkɔma yɛ nwo kɔtɔ yɛ angome.

² Na mmom ɛ́mɔma yɛ nu biala ɔyɔ bɔ ɔkɔma obiɛngo nwo kɔtɔ ye ɔ, bɔ ɔte paa ma ye, bɔ ɔkɔmaa okonyi gyidie nu ɔ.

³ Ofikyɛ Kristo koso wanyɔ bɔ ɔkɔma ye ngome ye nwo kɔtɔ ye ɔ, kyɛbɔ bahyerɛ kyɛ, “Bɛ bɔ bɛbɔle wɔ alapaa ne, b’alapaa ne waagua me so.”

⁴ Na nikyee biala bɔ bɛhyerɛ bɛtole berɛ tetetete ne, bɛhyerɛle maa ɔyɛle ngyerɛkyerɛ mane yɛ, kyɛ yɛfa aboterɛ ne Ahyerɛlɛ ne anu aworakyekyerɛ so yɛnya anyelasoɛ.

⁵ Me mbaeɛ ole kyɛ aboterɛ ne aworakyekyerɛ Nyameɛ ne ɔma ɛmɔfa adwene ko bɛtena, kyɛbɔ ɔfata Kristo Yesu ɔ,

⁶ amaa ɛmɔabɔ nu bafa noa ko bahyɛ Nyameɛ bɔ ɔte y’Awurade Yesu Kristo Baba ne animnyam.

Nzɛmba ne te Yudafoɛ ne Amaenmaensofoɛ deɛ

⁷ Yiti ɛ́mɔle ɛmɔ nwo ɛmɔ nwo bɛto nu, kyɛbɔ Kristo ale ɛmɔ ato nu ne, amaa Nyameɛ anya animnyam.

⁸ Na mekã mekyire ɛmɔ kyɛ, Kristo yɛle somvoɛ mane bienzuapɛlɛfoɛ nemɔ fa hyirele Nyameɛ nahorɛlilɛ, kyɛ ɔma bɔhyɛ bɔ bɛhyɛle yɛ nana mɔ ne otindim,

⁹ kyɛbɔ ɔkɔyɛ bɔ Amaenmaensofoɛ bɛkɔhyɛ Nyameɛ animnyam wɔ ye anwumvoinnwunɛ nwo ɔ, kyɛbɔ bahyerɛ ye kyɛ, “Yiti ngɔkamvo wɔ wɔ Amaenmaensofoɛ nu; na ngɔto edwein ngɔye wɔ dumaa ayɛ.”

¹⁰ Na osa kã ye kyɛ, “Ɛmɔ, Amaenmaensofoɛ, ɛmɔ ne ye maen beli ahurusi.”

¹¹ Ɔkã ye bieku kyɛ, “Ɛmɔ, Amaenmaensofoɛ amukoraa, ɛ́mɔye Awurade ayɛ, maen maen amukoraa, ɛ́mɔkamvo ye!”

¹² Yesaya kã ye bieku kyɛ, “Yese ndii ne kɔwa, ye yeɛ okodwɔso kooli Amaenmaensofoɛ so hene ɔ, na ye so yeɛ Amaenmaensofoɛ kɔfa bɛ nye bɛkɔto ɔ.”

¹³ Na mesrɛ kyɛ, anyelasoɛ Nyameɛ ne ɔfa gyidie nu anigye ne asomdwee amukoraa owura ɛmɔ nu tɛkyɛ, amaa ɔnate Sunzum Krongron tumi so ɛmɔanya anyelasoɛ mmorosoɛ.

Pɔɔlo krataa ne botaeɛ

¹⁴ Aliɛmaa mɔ, me bɔbɔ mede meto nu kyɛ paayɛlɛ ali ɛmɔ ti, kyɛ ɛmɔle nimdeɛ amukoraa, na ɛmɔkora betutu ɛmɔ nwo foɛ.

¹⁵ Nakoso atee bie aso de, masi m’ahone mahyerɛ mabrɛ ɛmɔ, kyɛ mefa mebɔ ɛmɔ ngayeɛ; ɔnate adom bɔ Nyameɛ wafa walo me ne ati,

¹⁶ kyɛ nyɛ Kristo Yesu somvoɛ mma Amaenmaensofoɛ, ná nyɛ Nyameɛ nzɛmba ne nwo asɔfodwuma, ná Amaenmaensofoɛ bɛ́yɛ afɔleɛ bɔ ɔsɔ anyeɛ, bɔ Sunzum Krongron wate bɛ nwo ɔ.

¹⁷ Ɔnate kyɛ mafa me nwo mabɔ Kristo Yesu nwo ti, mefa m’adwuma bɔ meyɔ mema Nyameɛ ne mehoahoa me nwo.

¹⁸ Mengosi me hue mengɔhã nikyee biala nwo dwirɛ, sana bɔ Kristo nate me so wayɔ bɔ ɔma Amaenmaensofoɛ bɛyɛ sotie wɔ bɛ dwirɛ ne bɛ nnwumaa nu,

¹⁹ nzɛngyerɛnneɛ ne anwanwadeɛ tumi so, Sunzum Krongron tumi so. Yiti mabɔ Kristo nzɛmba ne amukoraa nwo dawure mafi Yerusalem ne ye nwo nguro mɔ so maadwu Yilirikum.

²⁰ Ɛhe ati me botaeɛ ole kyɛ ngɔbɔ nzɛmba ne dawure nekaa biala bɔ bennya bɛttele Kristo dumaa le ɔ, amaa ɔnate so mandoa ebie fapem bɔ wato ɔ so,

²¹ na mmom kyɛbɔ bahyerɛ kyɛ, “Bɛ bɔ bɛhhane ye nwo dwirɛ behhyirele bɛ le ne, bekonwu ye yeɛ bɛ bɔ bɛttele ye nwo dwirɛ le ne, bɛkɔte ye bo.”

Pɔɔlo kuro kyɛ ɔkɔ Rome

²² Na ɛhe yeɛ ɔtaa si me atee bɔ yiti ɔmma mennya atee memma ɛmɔ berɛ ɔ.

²³ Nakoso kekesaala ye de, mayie m’adwuma wɔ manzini hemɔ anu wa, yeɛ nyɛle m’adwene kyɛ ngɔɔpasa ɛmɔ nwo ɔ afoɛ pee awa,

²⁴ Na mekuro kyɛ mebaasẽ mekɔ Sepania a, ngɔwa ɛmɔ berɛ, ná manya ɛmɔ nwo anika mmerɛ kãa, ná afei ɛmɔaboka me maa matoa m’ateetulɛ ne aso mahɔ berɛ.

²⁵ Kekesaala ye de, mékɔ Yerusalem mekɔfa ndoboa mema anwoteefoɛ nemɔ.

²⁶ Ofikyɛ Makedonia ne Akaia asɔremma banya anika bakekã bɛ sa ase kyɛ ngɔmva mmoka anwoteefoɛ ehiafoɛ bɔ bɛwɔ Yerusalem ne.

²⁷ Ɔyɛle bɛ fɛ kyɛ bɛkɔyɔ sɔ ɔ; nahorɛ nu, ɔte b’asɛdeɛ kyɛ bɛboka bɛ ɔ. Ofikyɛ sɛ Amaenmaensofoɛ banya Yudafoɛ sunzum nu saleɛ ne bie de a, nzaade ɔsɛ kyɛ bɛ koso bɛfa b’anwoɔnaen nu saleɛ ne bie bɛboka bɛ.

²⁸ Yiti sɛ meyie sɔ adwuma ye, ná mefa ndoboa bɔ baye ne mema bɛ a, ngɔfa ɛmɔ berɛ ná matoa so mahɔ Sepania.

²⁹ Na mese kyɛ meba ɛmɔ berɛ a, ngɔfa Kristo nzɛmba ne anu saleɛ mmorosoɛ yeɛ ngɔwa ɔ.

³⁰ Aliɛmaa mɔ, méfa y’Awurade Yesu Kristo ɔne Sunzum ne dɔ mesrɛ ɛmɔ kyɛ, ɛ́mɔboka me wɔ mbaeɛ bɔ ɛmɔbɔ bekyire Nyameɛ bɛma me ne anu,

³¹ ná ɔpepɛ le me fi bɛ bɔ benne nni bɔ bɛwɔ Yudea ne bɛ sa nu, ná me dwumadie bɔ mekwaali ye wɔ Yerusalem ne wasɔ anwoteefoɛ nemɔ nye;

³² amaa ɔnate Nyameɛ pɛ so mafa anigye mawa ɛmɔ berɛ, ná ɛmɔakyekye me wora.

³³ Asomdwee Nyameɛ ne ɔne ɛmɔ amukoraa bɛtena. Amen.