Romanfoɛ 14 - AHYERƐLƐ KRONGRON

Nnɛbua ebiɛngo ndɛen

¹ Sona bɔ ɔyɛ mmerɛ wɔ gyidie nu ne, ɛ́mɔle ye bɛto nu, na nnɛma ɛmɔ ne ye su aporowaa fa nikyee bɔ ɛmɔ ne ye nyɛ adwene nwo.

² Ebie de di kyɛ ɔkora odi nikyee biala, yeɛ sona bɔ ɔyɛ mmerɛ ne de, odi nyaanyaa ngome.

³ Sona bɔ odi ne, ɔnzɛ kyɛ obu sona bɔ onni ne animtia; yeɛ sona bɔ onni ne koso, ɔnzɛ kyɛ obua sona bɔ odi ne ndɛen, ofikyɛ Nyameɛ ale ye ato nu.

⁴ Wɔ ole nwa bɔ ebua ebie akoaa ndɛen ɔ? Ye bɔbɔ ye mene yeɛ okohyire kyɛ ɔsɔ ye nye anaa ɔnzɔ ye nye ɔ. Na ɔkɔsɔ ye nye, ofikyɛ Awurade kora maa ɔsɔ ye nye.

⁵ Sona bie bu kyẽa ko kyɛ ɔte paa tra kyẽa foforɛ, yeɛ ebie koso dwene kyɛ ngyẽa mukoraa te pɛ. Ɛ́mɔma yɛ mukoraa yɛsi y’adwene pi.

⁶ Sona bɔ ɔdwene kyɛ kyẽa bie te paa nen, ɔyɔ sɔ fa hyɛ Awurade animnyam. Yeɛ sona bɔ odi nikyee bie nen, odi fa hyɛ Awurade animnyam, ofikyɛ ɔda Nyameɛ ase. Sɔ ala yeɛ sona bɔ onni ne koso, ɔyɔ sɔ fa hyɛ Awurade animnyam ɔ, na ɔda Nyameɛ ase.

⁷ Yɛ nu biala nne berɛ bɔ ɔte ase ma ye nwo ɔ, yeɛ yɛ nu biala nne berɛ bɔ owu ma ye nwo ɔ.

⁸ Na sɛ yɛte ase a, yɛte yɛma Awurade, yeɛ yɛwu koso a, yɛwu yɛma Awurade. Yiti sɛ yɛte ase oo, sɛ yɛwu oo, yɛte Awurade deɛ.

⁹ Ɛhe ati yeɛ Kristo wuli na otingyele ɔ, amaa wayɛ awufoɛ ne teasefoɛ b’Awurade.

¹⁰ Na wɔ, nzu ati yeɛ ebua eliɛma ndɛen ɔ? Anaakyɛ wɔ koso, nzu ati yeɛ ebu eliɛma animtia ɔ? Ofikyɛ yɛ mukoraa yɛkogyina Nyameɛ ndɛenbualɛ bia ne nyunu.

¹¹ Ofikyɛ bahyerɛ kyɛ, “Awurade nwa, kyɛ nde ase ye de, nangoroma mukoraa bɛkɔkoto me, na noa mukoraa kɔbɔ Nyameɛ dumaa.

¹² Yiti yɛ nu biala kobu ye bɔbɔ ye nwo ngondaa kohyire Nyameɛ.

Nnɛma ebiɛngo fi ase

¹³ Yiti ɛ́mɔma yɛyakyi kyɛ yɛkobua yɛ nwo yɛ nwo ndɛen ɔ. Na mmom ɛ́mɔma yɛyɛ y’adwene kyɛ yɛngɔfa pambim anaa sundidua yɛngɔto yɛ biɛngo atee nu ɔ.

¹⁴ Mese, na m’adwene koso si pi wɔ Awurade Yesu nu kyɛ, nikyee biala nne berɛ bɔ ye nwo nde ɔ; na mmom ye nwo nde ma sona bɔ obu aleɛ ne kyɛ ye nwo nde ɔ.

¹⁵ Sɛ aleɛ bɔ edi ne ma ebiɛngo di aworabɔlɛ a, ye de né engyire ɔdɔ ko. Nnɛfa w’aleɛ bɔ edi ne sɛkye ebiɛngo bɔ Kristo wu mane ye ne.

¹⁶ Yiti nnɛma bɔ ɔte paa ma wɔ ne nya dumaa tɛɛ maa bɛka ye nwo dwirɛ tɛɛ.

¹⁷ Ofikyɛ Nyameɛ ahennie ne ɔtte aleɛ ne anonneɛ, na mmom ɔte tenenee, asomdwee ne anika bɔ ofi Sunzum Krongron ne berɛ ɔ.

¹⁸ Na sona bɔ ɔso Kristo wɔ atee sɔ ne aso ne, ɔsɔ Nyameɛ nye, na mmenia bu ye.

¹⁹ Yiti ɛmɔma yɛli nningyein bɔ bɛma asomdwee ɔne bɔ ɔfa ngɔsoɛ brɛ yɛ si.

²⁰ Aleɛ ti nnɛsɛkye Nyameɛ adwuma. Nikyee biala nwo te amba de, nakoso ɔtte mayee kyɛ ekoli aleɛ bie bɔ ɔkɔma eliɛma kɔyɛ bɔne ɔ.

²¹ Ɔte paa kyɛ engoli naen anaa ɛngɔno nzaa anaa ɛngɔyɔ nikyee biala bɔ ɔkɔyɛ sundidua kɔma eliɛma ɔ.

²² Wɔ de, wɔ gyidie bɔ ele ye fa sɔ nningyein nemɔ nwo ne, maa ɔha wɔ ne Nyameɛ b’afia. Sona bɔ ye tiboa mmua ye foɛ wɔ nikyee bɔ ɔyɔ a ɔse kyɛ ɔte paa nwo ne, wanya saleɛ.

²³ Na sona bɔ ye adwene yɛ ye naa ne, sɛ odi a, babua ye foɛ, ofikyɛ wamvi gyidie nu yeɛ olili ɔ. Ofikyɛ nikyee biala bɔ nna gyidie nu yeɛ ofi ne, ɔte bɔne.