Romanfoɛ 11 - AHYERƐLƐ KRONGRON

Nyameɛ nwu Yisrael anwumvoin

¹ Afei mebisa, aso Nyameɛ wapo ye maen anaa? Dabida! Ofikyɛ me bɔbɔ nde Yisraelniɛ, nde Abraham bosoniɛ, mvi Benyamin abusua kure nu.

² Nyameɛ de, ɔppole ye maen bɔ onwuni bɛ siele dada ne. Aso ɛmɔnze edwirɛ bɔ Ahyerɛlɛ ne kã fa Elia nwo, kyɛbɔ ɔbɔle Yisrael kwaadu hyirele Nyameɛ ne?

³ kyɛ, “Awurade, bahu wɔ ngɔmhyɛlɛfoɛ, na badwiri w’afɔleɛ mmokyea koso bagua; na waha me ngome, na bɛpena me beku me.”

⁴ Na Nyameɛ buale ye sɛ? “Mafa mmenia apee nzoo masie bɔ bɛte me deɛ ɔ, bɔ bɛkkoto bɛssɔnene bosoen Baal le ɔ.”

⁵ Sɔ ala yeɛ kekesaala ye Nyameɛ nate ye adom so wasa nu waye bɛ ngaa ne ɔ.

⁶ Na sɛ ɔnate adom so de a, nzaade Nyameɛ frɛlɛ ne oggyi nnwumaa so ko, na sɛ ogyi nnwumaa so de a, ahaa adom ne ɔtte adom ko.

⁷ Afei de nzikyɛ bieku? Yisrael sa anga nikyee bɔ né ɔpena ne. Bɛ bɔ waneanea nu waye bɛ ne, bɛ sa hane ye; nakoso bɛ ngaa ne de, bɛyɛle asoserɛ,

⁸ kyɛbɔ bahyerɛ kyɛ, “Nyameɛ ama bɛ adwene bɔ wala ɔ, anyeɛ bɔ onnwu nikye ɔ, asoɛ bɔ ɔnde dwirɛ ɔ maa waadwu ɛnɛ kyẽa ye.”

⁹ Na Dawide kã kyɛ, “Ma bɛ poentolɛ ɔyɛ kafoli ne ngaen, sundidua ne asohwenɛ ma bɛ!

¹⁰ Ma bɛ nye so ɔyɛ tunn bɔ bennwu hwee ɔ, ná ma bɛ nu kundu daa.”

¹¹ Yiti mebisa kyɛ, aso basoti bɔ bɛpena befi ase anaa? Dabida! Na mmom ɔnate b’asoserɛ ne aso yeɛ Amaenmaensofoɛ banya ngoalelɛ ɔ, bɔ ɔkɔma Yisrael kɔhwe ye nwo kora ɔ.

¹² Na sɛ b’asoserɛ fale saleɛ brɛle wiase, ná b’asefinɛ koso fale saleɛ brɛle Amaenmaensofoɛ a, ye de sɛ osa ode Yisrael to nu bɔkɔɔ a, saleɛ mmorosoɛ yeɛ ɔkɔwa ɔ!

Amaenmaensofoɛ daa ngoa

¹³ Afei medwudwo mekyire ɛmɔ Amaenmaensofoɛ; na ɔnate kyɛ nde Amaenmaensofoɛ somafoɛ ne ati, mefa me solɛ adwuma mehoahoa me nwo;

¹⁴ kyɛbɔ ɔkɔyɛ bɔ me bɔbɔ me mmenia Yudafoɛ bɛ nye kɔboro ɔ, bɔ ɔnate so bɛ nu biemɔ konya daa ngoa ɔ.

¹⁵ Na sɛ ɔnate bɛ polɛ bɔ Nyameɛ pole bɛ ne ati Nyameɛ ne adasa mmaa benyane ngabonu a, nzaade sɛ besa bɛba Nyameɛ berɛ a, ɔkɔyɛ sɛɛ koraa? Ɔkɔyɛ daa ngoa bɔ ofi awufoɛ nu ɔ!

¹⁶ Sɛ bakaammaa bɔ bekoli moa bɛkɔte ne te krongron ma Nyameɛ a, nzaade ye ngaa bɔ waha ne amukoraa te krongron; na sɔ ala yeɛ sɛ bakaa ndii ne te krongron a, ye mmaen ne koso te krongron ɔ.

¹⁷ Babubu olive bakaa bɔ bahyɛ da balua ne mmaen ne bie bagua, na bafa ɛmɔ, Amaenmaensofoɛ bɔ ɛmɔte kyɛ olive bakaa bɔ ogyi ye buro ne basi bɛ gya nu, amaa ɛmɔ koso ɛmɔanya kyɛfa wɔ bakaa ne ndii ne ye nzue nu.

¹⁸ Yiti ɔnzɛ kyɛ ɛmɔhoahoa bɛ nwo bekyire bakaa mmaen bɔ bɛpɛle bɛ beguale ne. Sɛ ɛmɔhoahoa bɛ nwo a, ɛmɔkaye kyɛ nna ɛmɔ yeɛ ɛmɔtira ndii ne anu ɔ, na mmom ndii ne yeɛ betira ɛmɔ nu ɔ.

¹⁹ Afei ɛkɔha kyɛ, “Amba, bebubuli bakaa mmaen ne beguale kyɛbɔ bɛkɔfa me bekosi bɛ gya nu ɔ.”

²⁰ Ɔte amba, bebubuli bɛ beguale, ofikyɛ né benne benni, nakoso wɔ de, wɔ gyidie ti yeɛ ɔmaa ɛtɛ mata bakaa ne nwo ɔ. Yiti nnɛhoahoa wɔ nwo, na mmom suro.

²¹ Na sɛ Nyameɛ amva bakaa mmaen bɔ bɛhyɛle da beluale ne nwo wangyɛ bɛ a, nzaade ɔngɔfa wɔ koso wɔ nwo ngɔhyɛ wɔ.

²² Yiti ɔsɛ kyɛ enwu Nyameɛ ye anwumvoinnwunɛ ne ɔne ye anyeborolɛ ne. Ɔma ye nye boro bɛ bɔ bali makyebu ne aso; na wɔ de, Nyameɛ da ye paayɛlɛ ali kyire wɔ, nakoso sana ɛtena ye paayɛlɛ ne anu, na wamma ye sɔ de a, ɔkɔpɛ wɔ kɔto.

²³ Na Yisraelfoɛ po, sɛ bɛyakyi elelɛ bɔ benne benni ne a, Nyameɛ kɔfa bɛ kowura bɛ boso, ofikyɛ ole tumi kyɛ osa fa bɛ wura bɛ boso ɔ.

²⁴ Na sɛ bapɛ ɛmɔ bafi olive bakaa bɔ ogyi eburo nwo, ná bakwati abɔdeɛ mmeraa bafa ɛmɔ bamata olive bakaa bɔ bahyɛ da balua nwo a, nzaade a ɔkɔyɛ mmerɛ kɔma Nyameɛ kyɛ ɔkɔfa olive bakaa bɔ bahyɛ da balua ne bɔbɔ mmaen kosa kɔmata ye bɔbɔ ye bakaa nwo.

Nyameɛ nwu mmenia mukoraa anwumvoin

²⁵ Aliɛmaa mɔ, mvealeɛ nu dwirɛ he yeɛ mekuro kyɛ ɛmɔnwu ye ɔ, amaa ɔnate so ɛmɔammu ɛmɔ nwo nworɛfoɛ bandra so. Ye ole kyɛ, Yisrael ye bue bie bayɛ asoserɛ, maa okoodwu kyɛ Amaenmaensofoɛ somaa bɛkɔwa Nyameɛ berɛ ɔ.

²⁶ Yiti bekole Yisrael amukoraa ngoa, kyɛbɔ bahyerɛ kyɛ, “Defoɛ ne kofi Sion yeɛ ɔkɔwa ɔ, na ɔkɔye amumuyɛɛ biala kofi Yakob nu.

²⁷ Na apam bɔ me ne bɛ yɛkɔyɛ hɔ ɛne, mmerɛ bɔ ngɔye bɛ bɔne ngofi berɛ ne.”

²⁸ Na ɔfa Nzɛmba ne anwo de, ɔnate ɛmɔ ti bɛte pɔfoɛ mɔ; nakoso ɔfa bɛ bɔ waneanea nu waye bɛ ne anwo de, ɔnate bɛ nana mɔ ti, bɛla Nyameɛ ahone nwo;

²⁹ ofikyɛ Nyameɛ adom akyɛdeɛ ne ye frɛlɛ ne, ɔnzesã ye adwene wɔ ye nwo.

³⁰ Na kyɛbɔ ɛmɔ koso mmerɛ bie ɛmɔanne Nyameɛ banni, nakoso afei de, ɔnate elelɛ bɔ banni ne aso wanwu ɛmɔ anwumvoin nen,

³¹ sɔ ala koso yeɛ kekesaala ye bayɛ asoserɛ ɔ, amaa ɔnate anwumvoin bɔ wanwu ɛmɔ ne aso, bɛ koso wanwu bɛ anwumvoin.

³² Nyameɛ abu mmenia mukoraa kyɛ bɛte asoserɛfoɛ, amaa ɔnate so wanwu bɛ mukoraa anwumvoin.

Pɔɔlo ye Nyameɛ ayɛ

³³ O! Nyameɛ anwonya ne ye nworɛ ne ye nimdeɛ nu pi! Nwa yeɛ ɔkɔhora kohyirehyire ye porɛ bɔ wabɔ nu ɔ? Nwa yeɛ ɔse ye atee bɔ ɔfa so yɔ ye nningyein, anaa nwa yeɛ ɔkɔte ye bo koyie ɔ?

³⁴ “Nwa yeɛ ɔse Awurade adwene ɔ, anaa nwa yeɛ ɔte ye foɛtulɛniɛ ɔ?

³⁵ Anaakyɛ nwa yeɛ wali moa wahyɛ ye nikye, bɔ ɔsɛ kyɛ ɔyɔ bie tua ye kerɛ ɔ?”

³⁶ Ofikyɛ ye yeɛ ɔbɔle nikyee biala ɔ, na ye tumi yeɛ ɔma nikyee biala te ase ma ye ɔ. Animnyam hã Nyameɛ daa daa! Amen.