Filemɔn 1 - AHYERƐLƐ KRONGRON

¹ Pɔɔlo, Kristo Yesu kukununiɛ, yeɛ aliɛmaa Timoteo, yɛ́fa yɛbrɛ yɛ damvo paa ne yɛ biɛngo adwumayɔlɛniɛ Filemon,

² ɔne y’eliɛma brasua Apia, yɛ biɛngo sraaniɛ Akipo, ɔne asɔre bɔ ɔwɔ w’awuro ne.

³ Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ!

Filemon ɔdɔ ne ye gyidie

⁴ Mmerɛ biala bɔ mekaye wɔ wɔ mbaeɛbɔlɛ nu ne, mefa asennaa mema me Nyameɛ,

⁵ ofikyɛ ɔdɔ bɔ ele ye ma anwoteefoɛ amukoraa ɔne wɔ gyidie wɔ Awurade Yesu nu ne, mete ye nga.

⁶ Na me mbaeɛ ole kyɛ, nningyein paa amukoraa bɔ ɔnate Kristo so ɔwɔ wɔ nu ne, bɛ nwo nimdeɛ kɔma wɔ gyidie nnwumaa ne kɔla ali piri paa.

⁷ Aliɛmaa, ɔdɔ bɔ ele ye ne, wamaa yanya anigye ne nguraenhyɛlɛ pee, ofikyɛ ama anwoteefoɛ ne amukoraa bɛ wora akyekye.

Pɔɔlo di Onesimo ti dwirɛ

⁸ Ɔnate ɛhe ati, ɔwɔ nu kyɛ ahaa mekora mesi m’ahone paa wɔ Kristo nu mehyɛ wɔ maa ɛyɔ bɔ odi kyɛ ɛyɔ ɔ,

⁹ nakoso ɔnate ɔdɔ ti, mekuro kyɛ mesrɛ wɔ mmom, me Pɔɔlo bɔ mayɛ akoraa, bɔ kekesaala ye nza nde Yesu Kristo kukununiɛ ɔ.

¹⁰ Mepa wɔ kyerɛ mema mma Onesimo bɔ mayɛ ye baba wɔ me kuku nu nnaa ye anu ɔ.

¹¹ (Daa ne de, né ye nwo olle mvasoɛ mma wɔ, nakoso kekesaala ye de, ye nwo awa mvasoɛ ama wɔ ne me).

¹² Mésoma ye maa osa ba wɔ berɛ; ɔte sona bɔ ɔla m’ahone nwo ɔ.

¹³ Ahaa mekuro kyɛ memaa ɔtena me nwo wa, ná ogyina wɔ gya nu ɔso me, wɔ mmerɛ bɔ nzɛmba ne ati nna kukunu ye;

¹⁴ nakoso menguro kyɛ ngɔfa wɔ si ngɔyɔ nikyee biala ɔ, ná wɔ paayɛlɛ ne anyɛ kyɛ mehyɛ wɔ ɔ, na mmom wafi w’ahone nu.

¹⁵ Ebiaa ɛhe ati yeɛ ofili wɔ nwo mmerɛ kãa bie ɔ, amaa ɔnate so afa ye ayɛ wɔ deɛ bɔkɔɔ;

¹⁶ bɔ nna kyɛ kanganiɛ ko, na mmom ye dibea bo kanganiɛ so, kyɛ aliɛmaa bɔ ɔla m’ahone nwo paa ɔ, na wɔ de, ɔte sɔ ma wɔ tra so koraa, wɔ anwoɔnaen ne Awurade nu.

¹⁷ Yiti sɛ ebu me kyɛ ebiɛngo de a, nzaade de ye nyemene so kyɛbɔ ekole me ne ala.

¹⁸ Sɛ wayɛ wɔ tɛɛ bie, anaakyɛ ɔma wɔ kerɛ a, bu kerɛ ne ma me.

¹⁹ Me Pɔɔlo, me bɔbɔ me sa noa ahyerɛlɛ ɛhe: Ngotua wɔ kerɛ bɔ ɔma wɔ ɔ; na ahaa menguro kyɛ mefa me noa mebɔ so kyɛ wɔ sona mumua ne po ɔma me kerɛ.

²⁰ Yiti aliɛmaa, maa nya anigye bie mvi wɔ berɛ wɔ Awurade nu; kyekye me wora wɔ Kristo nu.

²¹ Mede wɔ medi kyɛ ekotie me ti yeɛ mekyerɛ wɔ krataa ye ɔ, na mese kyɛ bɔ mebisa wɔ ye, ɛkɔyɔ maa ɔkɔbo so po.

²² Afei koso, siesie ɛwɔfoɛ sua ma me, na me nye la so kyɛ, ɔnate ɛmɔ mbaeɛ so ngonya atee ngɔwa ɛmɔ berɛ.

Ngraalilɛ

²³ Epafra bɔ ɔte mmiɛngo kukununiɛ wɔ Kristo Yesu nu,

²⁴ yeɛ Marko, Aristako, Dema ne Luka bɔ bɛte mmiɛngo adwumayɔlɛfoɛ ne, bebisa wɔ ahye.

²⁵ Yɛ Awurade Yesu Kristo adom ne ɛmɔ sunzum bɛtena.