Obadia 1 - AHYERƐLƐ KRONGRON

Nyameɛ kɔhwe Edom so

¹ Nyekyire bɔ Obadia nyane ye ne, ye ɛhe: Bɔ AWURADE Nyameɛ kã fa Edom nwo ole kyɛ, Yate ngunga bie yafi AWURADE dɔ, na wasoma ɛbɔfoɛ mɔ wɔ maen maen mɔ berɛ kyɛ, “Ɛ́mɔdwɔso, ɛ́mɔma yɛdwɔso yɛɛfa koɛ yɛteta ye.”

² Tie, mamaa ayɛ kaaba wɔ maen maen mɔ nu; bebu wɔ animtia paa.

³ W’ahone nu anwomasoɛ ne alakalaka wɔ, wɔ bɔ ɛte nyɔbotaen ndokuro nu, bɔ w’atenaleɛ wɔ nekaa bɔ ɔwɔ anwuro ɔ, wɔ bɔ ɛkã ye wɔ wɔ ti anu kyɛ, “Nwa yeɛ ɔkɔhora kɔhwe me kɔto ase ɔ?”

⁴ Sɛ etu kɔ anwuro kyɛ kɔleɛ po, ná ɛkyekye wɔ saen wɔ nzramaa mɔ anu po a, berɛ yeɛ ngɔhwe wɔ ngofi ngɔto ase ɔ, AWURADE noa dwirɛ ɛne.

⁵ Sɛ awuefoɛ bɛba wɔ so, sɛ awerɔm awuefoɛ bɛba wɔ so kɔngɔen a, (nea kyɛbɔ basi bayɛ wɔ pasaa ɔ!) aso bengowua alaa bɔ bɛ kunu kuro ɔ? Sɛ bobe telɛfoɛ nemɔ bɛba wɔ bobe boo nu a, aso ahaa bɛngɔyakyi bobe si ne bie wɔ so?

⁶ Kyɛbɔ basi bafẽ Yisɔ nningyein ɔ! Kyɛbɔ basi bayɛ ye anwonyadeɛ bɔ wafa wafea ɔ dosodoso ɔ!

⁷ Bɛ bɔ bɛ ne wɔ ayɛ apam ne amukoraa, baye wɔ bama, bafoa wɔ baadwu ɛwɛen ne aso; bɛ bɔ bɛ ne wɔ tu nu ne, bali wɔ so ngonim; wɔ mmango bɔ bedi wɔ aleɛ ne, basua wɔ ngaen, nakoso annya ye nwo adwene biala.

⁸ Sɔ kyẽa ne, aso mengohũhũ nworɛfoɛ mengofi Edom, yeɛ nimdeɛfoɛ mengofi Yisɔ bokaa so? AWURADE noa dwirɛ ɛne.

⁹ Ao Teman, w’anwoserɛfoɛ nemɔ, ahunundetelɛ kɔtɔ bɛ so, amaa ɔnate so sona biala bɔ ofi Yisɔ bokaa so ne, ɔkɔtɔ wɔ ngrandɛ noa.

Bɔ yiti yeɛ Nyameɛ kɔhwe Edom so ɔ

¹⁰ Ɔnate atianuserɛ bɔ ɛbɔle eliɛma Yakob ne ati, animguaseɛ kobia wɔ, na wɔ boso konua afebɔɔ.

¹¹ Sɔ kyẽa ne, egyinane nekaa bie yele wɔ nye, sɔ kyẽa bɔ ɛwɔfoɛ mɔ sesale ye anwonyadeɛ bɛhɔle ne, bɔ amanvrafoɛ bewurale ye pambim mɔ nu, ná beguale serewa bɛhyɛle Yerusalem bɛfale ne, wɔ koso eli tole bɛ so.

¹² Nakoso ahaa onni kyɛ wɔ nye gye wɔ eliɛma n’amaneɛnwunɛ kyẽa ne anwo, yeɛ ahaa onni kyɛ edi ahurusi wɔ Yuda mma bɔ né bekũkũ bɛ ne anwo. Afei ahaa onni kyɛ ɛkekã anwomasoɛ dwirɛ, wɔ b’aworabɔlɛ kyẽa ne anwo.

¹³ Ahaa onni kyɛ ewura me maen pambim ne anu, wɔ kyẽa bɔ edwirɛ tole bɛ ne anu; amba, ahaa onni kyɛ edi ahurusi ɛnea b’aworabɔlɛlilɛ ne wɔ kyẽa bɔ edwirɛ tole bɛ ne anu, yeɛ ahaa onni kyɛ ɛfẽ bɛ nningyein fa wɔ kyẽa bɔ edwirɛ tole bɛ ne anu.

¹⁴ Ahaa onni kyɛ egyina ngwandaa ne aso, kyɛ ekũkũ ye mmenia bɔ bɛnwatili nemɔ; yeɛ ahaa onni kyɛ ɛye bɛ bɔ baha nemɔ ma bɛ, wɔ aworabɔlɛ kyẽa ne anu.

¹⁵ Ofikyɛ AWURADE kyẽa ne wapingye wɔ maen maen amukoraa bɛ so. Kyɛbɔ ayɔ ne, sɔ ala yeɛ bɛkɔfa bɛkɔyɔ wɔ ɔ; wɔ yɔleɛ kɔbɔ wɔ bɔbɔ wɔ ti so.

¹⁶ Ofikyɛ kyɛbɔ ɛmɔano nzaa wɔ me bokaa krongron ne aso ne, sɔ ala yeɛ Amaenmaensofoɛ amukoraa bɛkɔhɔ so bɛkɔno ɔ; amba, bɛkɔno, bɛkɔbo sram, na bɛ boso konua bɔkɔɔ.

¹⁷ Nakoso Sion bokaa so yeɛ bɛ bɔ banya bɛ ti badidi nu ne bɛkɔtena ɔ; berɛ kɔyɛ krongron, na Yakob boso ama bɛ sa kɔhã b’agyapadeɛ.

¹⁸ Yakob boso ama kɔyɛ see, Yosef boso ama kɔyɛ see bɔ ogye ɔ, na Yisɔ boso ama de, bɛkɔyɛ ngyɛngyɛma, na bɛkɔsɔ wɔ bɛ nu bɛkɔyera bɛ. Yisɔ boso ama biala ngɔha, ofikyɛ bɔ AWURADE ahã hɔ ɛne.

¹⁹ Ngwaen dɔ ama kɔfa Yisɔ bokaa ne bɛkɔyɛ bɛ deɛ, na aseɛ pralaa ne aso ama kɔfa Filistifoɛ aseɛ bɛkɔyɛ bɛ deɛ; bɛkɔfa Efraim aseɛ ne Samaria aseɛ bɛkɔyɛ bɛ deɛ, na Benyamin kɔfa Gileade kɔyɛ ye deɛ.

²⁰ Yisraelfoɛ bɔ bɛhyele bɛ nnure bɛhɔle ne, bɛ lɔen ne kɔɔfa Kanaan aseɛ bɛkɔyɛ bɛ deɛ koodwu Sarefate; na Yerusalemfoɛ bɔ bɛhyele bɛ nnure bɛhɔle bɔ bɛwɔ Sefarade ne, bɛkɔɔfa ngwaen dɔ nguro nemɔ bɛkɔyɛ bɛ deɛ.

²¹ Na defoɛ mɔ kɔfo kɔhɔ Sion bokaa so bɛkɔɔyɛ Yisɔ bokaa ne aso maenbulɛfoɛ, na ahennie ne kɔyɛ AWURADE deɛ.