Nyekyire 9 - AHYERƐLƐ KRONGRON

¹ Na abɔfo bɔ ɔtɔ so nnu ne huli ye totorobɛndo ne, na nwuni kyɛ nzramaa bie watu wafi nyameɛso waatɔ aseɛ so, na bɛfale aseɛ bo dɔ kumaa kuronguronn ne noa safoaa bɛmane ye.

² Obukyele aseɛ bo dɔ kumaa kuronguronn ne noa, na nwosina bɔ ɔte kyɛ foonoo piri nu nwosina fili kumaa ne anu wale, na ɔnate nwosina ne ati, eyia ne ewienu yɛle kabii.

³ Na mmɛbɛ mbiri fili nwosina ne anu wale aseɛ so, na bɛmane bɛ tumi bɔ ɔte kyɛ aseɛ so anyanyangyeleɛ mɔ tumi ɔ.

⁴ Na bɛhã behyirele bɛ kyɛ, nnɛmaa bɛkeka aseɛ so ndire, anaa nyaa monɛ biala, anaa bakaa biala; sana mmenia bɔ Nyameɛ nzɔanoɛ ne ɔnne bɛ nwoma so nemɔ ngome.

⁵ Bamma bɛ ate kyɛ behũhũ bɛ, na mmom kyɛ bɛkeka bɛ tonn bosome nnu. Na bɛ kekalɛ ne, ɔte kyɛ anyanyangyeleɛ bɔ ɔka sona ɔ ye deɛ.

⁶ Na sɔ mmerɛ ne, mmenia kɔpena ewue si atee, nakoso bengonwu ye; bekohuro kyɛ bekowu ɔ, nakoso ewue kɔnwati bɛ.

⁷ Na mmɛbɛ mbiri nemɔ, bɛ sue te kyɛ mbɔngɔ bɔ basiesie bɛ bama koɛ ɔ; nikyee bie wɔ bɛ ti so bɔ ɔte kyɛ sikaa kɔkorɛ abotire ɔ, na bɛ nyunu soma sona nyunu;

⁸ bele nwiaa te kyɛ brasua nwiaa, yeɛ bɛ gye te kyɛ gyata gye.

⁹ Bɔ ɔkata bɛ hue so ne, ɔte kyɛ buralɛ bɔ ɔkata bɛ hue so ɔ; na dede bɔ bɛ ndaa nemɔ bɛyɔ ne, ɔte kyɛ mbɔngɔ pee bɔ teaseɛnam mɔ sosɔ bɛ, bɔ betu amirika bɛkɔ koɛ ɔ bɛ deɛ.

¹⁰ Bele dua te kyɛ anyanyangyeleɛ, bɛka, na bɛ tumi bɔ bɛfa bɛha mmenia tonn bosome nnu ne, bɛ dua nu yeɛ ɔwɔ ɔ.

¹¹ Bele bɔ odi bɛ so hene, bɔ ye ole aseɛ bo dɔ kumaa kuronguronn nu abɔfo ne, bɔ ye dumaa li Abadɔn wɔ Hebri dwudwolɛ nu, yeɛ Hela dwudwolɛ nu koso oli Apolɔn.

¹² Musue ko apɛ nu. Na tie, waha musue nyɔ bɔ bɛbaawa ɔ.

¹³ Na abɔfo bɔ ɔtɔ so nzia ne huli ye totorobɛndo ne, na sikaa kɔkorɛ afɔleɛ bokyea bɔ ogyi Nyameɛ nyunu ne, ndele kyɛ komviɛ bie afi ye mmɛen nna nemɔ anu,

¹⁴ ná ɔkã kyire abɔfo bɔ ɔtɔ so nzia bɔ otira totorobɛndo ne kyɛ, “Sangye abɔfo nna bɔ bakyekye bɛ wɔ asue piri Yufreti noa ne.”

¹⁵ Yiti bɛsangyele abɔfo nna bɔ basiesie bɛ bama sɔ dɔnhwere ne, sɔ kyẽa ne, sɔ bosome ne, ɔne sɔ afoɛ ne, kyɛ behũhũ adasa mmaa ngyɛmuɛ nza nu ko.

¹⁶ Na ndele kyɛ ɛlɔen bɔ bɛtete mbɔngɔ so ne bɛ somaa te apepesrala sɔ alaa ɛyaa nyɔ.

¹⁷ Na mbɔngɔ mɔ ne bɛ bɔ bɛtete bɛ so ne, kyɛbɔ nzi nwuni bɛ wɔ me nyekyire ne anu ne, ye ɛhe: Bele see ne afasebire ne sɔfe buralɛ bɔ ɔkata bɛ hue so ɔ, na mbɔngɔ nemɔ bɛ ti te kyɛ gyata ti, na see ne nwosina ne sɔfe fili bɛ noa nu wale.

¹⁸ Na sɔ hawo nza hemɔ, bɔ bɛ ole see, nwosina ne sɔfe bɔ ofi bɛ noa nu ba ne, bɛfale so behuhuni adasa ngyɛmuɛ nza nu ko.

¹⁹ Na mbɔngɔ nemɔ bɛ tumi wɔ bɛ noa ne bɛ dua nu, ofikyɛ bɛ dua te kyɛ ewoo, bɔ tire tua so bɔ bɛfa bepura ɔ.

²⁰ Nakoso adasa mmaa ngaa bɔ ɛhawo hemɔ wangukũ bɛ ne, banzakyera b’adwene bamvi bɛ sa noa nnwumaa nwo, banyakyi sunzummɔne mɔ sɔnenɛ, yeɛ banyakyi sikaa kɔkorɛ, ɛdwetɛ, kɔɔbere, nyɔboɛ ne bakaa amoen mɔ bɔ bɛngora bennwu nikye, anaa bɛnde dwirɛ, anaa bɛnnate ɔ sɔnenɛ;

²¹ yeɛ banzakyera b’adwene bamvi b’awuelilɛ ne bɛ ngonyaayelɛ ne b’adwamanbɔlɛ ne b’awue nwo.