Nyekyire 8 - AHYERƐLƐ KRONGRON

Nzɔanoɛ bɔ ɔtɔ so nzoo

¹ Na Boaen Ba ne tele nzɔanoɛ bɔ ɔtɔ so nzoo ne noa nen, nyameɛso yɛle dinn kɔyɛ dɔnhwere bue.

² Na nwuni abɔfo nzoo bɔ begyigyi Nyameɛ nyunu ne, na bɛmane bɛ totorobɛndo nzoo.

³ Na abɔfo foforɛ bɔ otira sikaa kɔkorɛ ɛyɛɛ kulie ɔ oogyinane afɔleɛ bokyea ne anwo; na bɛmane ye ɛyɛɛ pee kyɛ ɔfa boka anwoteefoɛ amukoraa mbaeɛ so ɔbɔ afɔleɛ, wɔ sikaa kɔkorɛ afɔleɛ bokyea bɔ ɔwɔ ahennie bia ne nyunu ne aso.

⁴ Na ɛyɛɛ nwosina ne, ɔbokale anwoteefoɛ mbaeɛ ne aso fili abɔfo ne sa nu fo hɔle Nyameɛ nyunu.

⁵ Afei abɔfo ne fale ɛyɛɛ kulie ne, ɔfale afɔleɛ bokyea ne aso see ne bie guale nu maa oyili, na ogyi tole aseɛ so. Na komviɛ ahoroɔ wale, ɔbobɔle nu kurudududu, agralaa tetele, na aseɛ wosole.

Totorobɛndo nzoo nemɔ

⁶ Afei abɔfo nzoo bɔ betiratira totorobɛndo nzoo ne, bɛboaboale bɛ nwo kyɛ bɛbaahu.

⁷ Abɔfo bɔ oli moa ne huli ye totorobɛndo ne, na asukɔtwea ne see bɔ bɛne mogya bali afra ɔ bɛwale, na bɛto beguale aseɛ so. Na aseɛ ngyɛmuɛ nza nu ko yerale, mmakaa ngyɛmuɛ nza nu ko yerale, yeɛ ndire monɛ amukoraa koso yerale.

⁸ Na abɔfo bɔ ɔtɔ so nyɔ ne huli ye totorobɛndo ne. Na begyili nikyee bie bɔ ɔte kyɛ bokaa piri bɔ see asɔ nu ogye buruburu ɔ bɛtole ɛpo nu, na ɛpo ngyɛmuɛ nza nu ko kakyili mogya;

⁹ na ɛpo nu abɔdeɛ bɔ bele ngoa ɔ, ngyɛmuɛ nza nu ko wuwuli, yeɛ ɛlɛen mɔ ngyɛmuɛ nza nu ko sɛkyesɛkyele.

¹⁰ Na abɔfo bɔ ɔtɔ so nza ne huli ye totorobɛndo ne, na nzramaa pirikua bie bɔ ogye kyɛ tɛen ɔ otu fili nyameɛso, na oofini asue mɔ ngyɛmuɛ nza nu ko nu, ɔne mbombonzue mɔ nu.

¹¹ Nzramaa ne dumaa li Weewee. Na nzue mɔ ngyɛmuɛ nza nu ko yɛle weewee, na nzue ne mane mmenia pee wuwuli, ofikyɛ ɔte weewee.

¹² Na abɔfo bɔ ɔtɔ so nna ne huli ye totorobɛndo ne, na ɛhe wosole eyia ngyɛmuɛ nza nu ko, ɛsraen ngyɛmuɛ nza nu ko, yeɛ nzramaa mɔ ngyɛmuɛ nza nu ko, yiti bɛ ngyɛmuɛ nza nu ko kakyili awosii; na alehyeleɛ nu ngyɛmuɛ nza nu ko annya kanea, na alesaleɛ nu koso sɔ ala yeɛ osili ɔ.

¹³ Na nneane, na ndele kyɛ kɔleɛ bie otu faa wɔ nyameɛso afia dɔ, ná ɔtea nu kã kyɛ, “Totorobɛndo ngaa bɔ abɔfo nza nemɔ bɛbaahu ne, bɛ komvi ne ati, bɛ bɔ bɛte aseɛ so ɔ, bɛ yaakɔ oo, bɛ yaakɔ oo, bɔ yaakɔ oo!”