Nyekyire 7 - AHYERƐLƐ KRONGRON

Nyameɛ ngoaa mɔ nzorɛhyɛlɛ

¹ Na ɛhemɔ asi ne, nwuni abɔfo nna kyɛ begyigyi aseɛ ndweasoɛ nna ne aso, bɔ né basi aseɛ so mvrama nna nemɔ ate, kyɛbɔ ɔkɔyɛ bɔ mvrama biala ngotu ngɔfa aseɛ anaa ɛpo anaa bakaa biala so ɔ.

² Na nwuni abɔfo foforɛ bɔ otira Nyameɛ teasefoɛ nzɔanoɛ ne kyɛ ofi eyia afiteleɛ ɔfo ba ɔ, na ɔteane nu serɛserɛ sele abɔfo nna bɔ bama bɛ tumi kyɛ bɛha aseɛ ne ɛpo ne

³ kyɛ, “Nnɛma ɛmɔha aseɛ anaa ɛpo anaa mmakaa, kɔpem kyɛ yɛkɔfa nzɔanoɛ yɛkɔteta yɛ Nyameɛ ngoaa mɔ bɛ nwoma so ɔ.”

⁴ Na bɛ bɔ bafa nzɔanoɛ bahyɛ bɛ nzorɛ ne, ndele bɛ somaa: Apee sɔ alaa ɛyaa ko aburanna ne nna yeɛ bɛfale nzɔanoɛ bɛhyɛle bɛ nzorɛ befili Yisrael mma mmusua kure amukoraa nu ɔ.

⁵ Yuda abusua kure nu mmenia bɔ bɛfale nzɔanoɛ bɛhyɛle bɛ nzorɛ ne, bɛte apee buru ne nyɔ; Ruben abusua kure nu, apee buru ne nyɔ; Gade abusua kure nu, apee buru ne nyɔ;

⁶ Asɛ abusua kure nu, apee buru ne nyɔ; Nafetali abusua kure nu, apee buru ne nyɔ; Manase abusua kure nu, apee buru ne nyɔ;

⁷ Simeon abusua kure nu, apee buru ne nyɔ; Lewi abusua kure nu, apee buru ne nyɔ; Yisaka abusua kure nu, apee buru ne nyɔ;

⁸ Sebulɔn abusua kure nu, apee buru ne nyɔ; Yosef abusua kure nu, apee buru ne nyɔ; yeɛ Benyamin abusua kure nu, apee buru ne nyɔ.

Anwoteefoɛ pembepembe ne

⁹ Na ɛhe asi ne, nneane, na nwuni ɛlɔen kandinga bɔ sona biala ngɔhora bɛ ka ɔ, bɔ befi maen maen, mmusua kure, mmenia ne edwudwolɛ amukoraa nu, kyɛ begyigyi ahennie bia ne nyunu ne Boaen Ba ne nyunu, bɔ bewurawura ndaadeɛ fufue, ná betiratira ɛberɛ ɔ.

¹⁰ Na bɛteane nu serɛserɛ kyɛ, “Ngoalelɛ te yɛ Nyameɛ bɔ ɔte ahennie bia ne aso ne ɔne Boaen Ba ne deɛ!”

¹¹ Né abɔfo nemɔ amukoraa bapɛ ahennie bia ne ne mbanyi nemɔ ne abɔdeɛ ateasefoɛ nna nemɔ nwo bayia, na bɛfale bɛ nyunu bebutubutuli ase wɔ ahennie bia ne nyunu, na bɛsɔnene Nyameɛ

¹² bɛhane kyɛ, “Amen! Saleɛ ne animnyam ne nworɛ ne asennaa ne anidie ne tumi ne anwoserɛ te yɛ Nyameɛ deɛ afebɔɔ! Amen.”

¹³ Na afei mbanyi nemɔ nu ko bisale me kyɛ, “Ɛhemɔ bɔ bewura ndaadeɛ fufue ye, nwa mɔ ɛne, na nisua yeɛ befi bɛwale ɔ?”

¹⁴ Na mmuale ye kyɛ, “Me mene, wɔ yeɛ ɛse ɔ.” Na osele me kyɛ, “Ɛhemɔ ole bɛ bɔ bafa amaneɛ piri ne anu bafite, ná bapo bɛ ndaadeɛ maa wayɛ fufue wɔ Boaen Ba ne mogya nu ɔ.

¹⁵ Na ye sɔ ati yeɛ bɛwɔ Nyameɛ ahennie bia ne nyunu, ná bɛsɔne ye alehyeleɛ ne alesaleɛ wɔ ye asɔneyɛɛ sua nu ɔ; na bɔ ɔte ahennie bia ne aso ne, ɔkɔfa ye tena sua ne kɔkata bɛ so.

¹⁶ Ɛhɔen ngohũ bɛ ko, yeɛ nzuhɔen ngohũ bɛ ko, eyia ngɔyera bɛ, yeɛ ahuhuro biala ngohũ bɛ.

¹⁷ Ofikyɛ Boaen Ba bɔ ɔwɔ ahennie bia n’afia berɛ ne, ɔkɔyɛ bɛ Neafoɛ, ɔkɔyɛ bɛ taataa kɔhɔ ngoa asue mɔ ti, na Nyameɛ kokyikyi bɛ nye abo moen amukoraa.”