Nyekyire 22 - AHYERƐLƐ KRONGRON

Ngoa asue ne ngoa bakaa ne

¹ Afei ohyirele me ngoa nzue asue bɔ ye nye te kaenn kyɛ neanu, bɔ ɔtengyɛ fi Nyameɛ ne Boaen Ba n’ahennie bia ne anu

² kɔfa kuro ne dwaaso afia ɔ. Na asue ne bue nyɔ ne, né ngoa bakaa bɔ osu mmaa ahoroɔ buru ne nyɔ ɔ gyi berɛ, na osu ye mma bosome biala. Na bakaa ne nyaa yeɛ bɛfa bɛsa maen maen mɔ anwonyerɛ ɔ.

³ Musue nikyee biala nne berɛ ko, na mmom Nyameɛ ne Boaen Ba ne, b’ahennie bia ne yeɛ ɔwɔ berɛ ɔ, na ye ngoaa kɔsɔne ye;

⁴ Bekonwu ye nyunu, na ye dumaa kɔbobɔ bɛ nwoma so.

⁵ Na aleɛ ngɔsa berɛ ko; yeɛ benhia kanea anaa eyia ye hyireinn; ofikyɛ Awurade Nyameɛ yeɛ ɔkɔyɛ bɛ kanea ɔ, na bekoli hene afebɔɔ.

⁶ Na osele me kyɛ, “Edwirɛ hemɔ te turoloo ne nahorɛ. Na Awurade, ngɔmhyɛlɛfoɛ sunzum mɔ Nyameɛ ne, wasoma ye abɔfo kyɛ ɔɔye edwirɛ mɔ bɔ odi kyɛ bɛba nu ndɛndɛ ɔ ohyire ye ngoaa mɔ.”

⁷ “Tie, méba ndɛndɛ. Ebiala bɔ otira nwomaa he anu ngɔmhyɛlɛ dwirɛ nu ne, onya saleɛ.”

⁸ Na me, Yohane, yeɛ nwuni nningyein hemɔ, ná ndele ɔ. Na ndele ná nwuni ye nen, mmutuli berɛ wɔ abɔfo bɔ ohyirele me sɔ nningyein hemɔ ne ye gya bo kyɛ mesɔne ye.

⁹ Na osele me kyɛ, “Nea, nnɛyɔ sɔ! Ofikyɛ me koso nde ebiɛngo akoaa, wɔ ne eliɛma mɔ ngɔmhyɛlɛfoɛ, yeɛ bɛ bɔ betira nwomaa he anu dwirɛ nu ne. Sɔne Nyameɛ!”

¹⁰ Na osele me kyɛ, “Ngɔmhyɛlɛ dwirɛ bɔ ɔwɔ nwomaa he anu ne, nnɛfa nzɔanoɛ sɔ ye noa, ofikyɛ mmerɛ ne apingye.

¹¹ Bɔ ɔndengyɛ ne, ɔhɔ so yɛ sona bɔ ɔndengyɛ ɔ; yeɛ bɔ ye nwo nde ne, ɔhɔ so yɛ sona bɔ ye nwo nde ɔ. Bɔ ɔtengyɛ ne, ɔhɔ so yɛ sona bɔ ɔtengyɛ ɔ, yeɛ bɔ ɔte krongron ne, ɔhɔ so yɛ sona bɔ ɔte krongron ɔ.”

¹² “Tie, méba ndɛndɛ; na ndira m’akatuaa kyɛ mefa mebrɛ ebiala kyɛbɔ ye nnwumaa te ɔ.

¹³ Me ole Alfa ne Omega, ahyɛaseɛ ne ayieleɛ, bɔ oli moa ne bɔ ɔpɛ ye bo ɔ.”

¹⁴ Bɛ bɔ bɛpo bɛ ndaadeɛ ne, banya saleɛ, kyɛbɔ bekonya ngoa bakaa ne nwo atee, ná bafa anoa ne anu bahɔ kuro ne anu ɔ.

¹⁵ Na kuro ne asi dɔ yeɛ ngyea, ngonyaayelɛfoɛ, adwamanbɔlɛfoɛ, awudifoɛ, bosoensolɛfoɛ ne bɛ bɔ bekuro ngondombopɛlɛ ná bɛpɛ ɔ bɛ mukoraa bɛwɔ ɔ.

¹⁶ “Me, Yesu, yeɛ masoma m’abɔfo kyɛ ooli ɛhemɔ nwo adanzeɛ hyire ɛmɔ wɔ asɔre nemɔ anu ɔ. Me ole Dawide ndii ne ye bosoniɛ, ngyerɛmɔ Nzramaa bɔ ɔta ne.”

¹⁷ Na Sunzum ne ne atɔmvorɛ braa ne nwa, “Bra!” Ma ebiala bɔ ɔte ne ɔhã kyɛ, “Bra!” Ma ebiala bɔ nzuhɔen ku ye ne ɔbra. Ma ebiala bɔ okuro ne oole ngoa nzue ne mbaen.

Ayieleɛ

¹⁸ Mebɔ ebiala bɔ ɔte nwomaa he anu ngɔmhyɛlɛ dwirɛ ne kɔkɔ kyɛ: Sɛ ebie fa edwirɛ bieku boka ɛhemɔ aso a, Nyameɛ kɔprapra ɛhawo ahoroɔ bɔ bahyerɛ ye wɔ nwomaa he anu ne kogua ye so.

¹⁹ Yeɛ sɛ ebie ye ngɔmhyɛlɛ nwomaa he anu dwirɛ ne bie fi nu a, Nyameɛ kɔye ye bue deɛ kofi ngoa bakaa ne ne kuro krongron bɔ bahyerɛ bɛ nwo dwirɛ wɔ nwomaa he anu ne anu.

²⁰ Bɔ odi edwirɛ hemɔ nwo adanzeɛ ne, ɔnwa, “Amba, méba ndɛndɛ!” Amen. Awurade Yesu, bra!

²¹ Yɛ Awurade Yesu Kristo adom ne ɔyɛ ɛmɔ amukoraa bɛ deɛ. [Amen.]