Nyekyire 21 - AHYERƐLƐ KRONGRON

Nyameɛso foforɛ ne aseɛ foforɛ

¹ Na nwuni nyameɛso foforɛ ne aseɛ foforɛ; ofikyɛ né nyameɛso bɔ oli moa ne ne aseɛ bɔ oli moa ne bapɛ nu bahɔ, yeɛ né ɛpo nne berɛ ko.

² Na nwuni kuro krongron ne, Yerusalem foforɛ ne, kyɛ ofi Nyameɛ berɛ wɔ nyameɛso odwu ba ɔ, bɔ basiesie ye kyɛ atɔmvorɛ braa bɔ basiesie ye nwo bama ohu ɔ.

³ Na ndele kyɛ komviɛ piri bie fi ahennie bia ne anu ɔkã kyɛ, “Tie, Nyameɛ ɛtena sua ne ɔwɔ adasa mmaa nu, na ɔkɔtena nu wɔ bɛ nu, bɛkɔyɛ ye maen, na Nyameɛ bɔbɔ ɔne bɛ kɔtena, [ná wayɛ bɛ Nyameɛ.]”

⁴ Okokyikyi bɛ nye abo moen amukoraa. Na ewue nne berɛ ko, aworabɔlɛ ne esuɛ ne yealɛ biala nne berɛ ko, ofikyɛ nningyein daa nemɔ bapɛ nu bahɔ.

⁵ Na bɔ ɔte ahennie bia ne aso ne hane kyɛ, “Tie! Meyɔ nningyein mukoraa foforɛ.” Na osa sele me kyɛ, “Kyerɛ ɛhe, ofikyɛ edwirɛ hemɔ te turoloo ne nahorɛ.”

⁶ Na osele me kyɛ, “Wayie! Me ole Alfa ne Omega, Ahyɛaseɛ ne Ayieleɛ. Ebiala bɔ nzuhɔen ku ye ne, ngɔfa ngoa asue ti nu nzue ngɔma ye kyɛkyɛ.

⁷ Ebiala bɔ odi ngonim ne, okonya ɛhemɔ amukoraa, na ngɔyɛ ye Nyameɛ, ná ye koso wayɛ mma.

⁸ Na bɛ bɔ bɛte serɛ, bɛ bɔ benne benni, akyiwadeɛyɔlɛfoɛ, awudifoɛ, adwamanbɔlɛfoɛ, ngonyaayelɛfoɛ, bosoensolɛfoɛ ne ngondombofoɛ amukoraa de, abura bɔ see ne sɔfe begye wɔ nu ne anu yeɛ ɔkɔyɛ bɛ bue deɛ ɔ, na ewue bɔ ɔtɔ so nyɔ ne ɛhe.”

⁹ Na abɔfo nzoo bɔ betiratira kulie nzoo ne, bɔ ɛhawo nzoo bɔ ɔpɛ ye bo ne bayi bɛ tɛkyɛ ne, bɛ nu ko wale me berɛ oosele me kyɛ, “Bra, na ngohyire wɔ Atɔmvorɛ braa ne, Boaen Ba n’aye ne.”

¹⁰ Na ɔfale me sunzum nu hɔle bokaa pirikua tendenn bie aso, na ohyirele me kuro krongron Yerusalem ne kyɛ ofi Nyameɛ berɛ wɔ nyameɛso odwu ba ɔ.

¹¹ Né ole Nyameɛ animnyam, na ye hyireinn ne ɔte kyɛ nyɔboɛ bɔ ye nyɔboɛ yɛ se paa bɔ bɛfrɛ ye yasepa, bɔ ye nye te kaenn kyɛ neanu ɔ.

¹² Né ole fasue pirikua tendenn, bɔ anoa mbiri buru ne nyɔ wɔ nu, bɔ abɔfo buru ne nyɔ begyigyi anoa nemɔ anu ɔ. Né bahyerɛ Yisrael mma abusua kure buru ne nyɔ nemɔ bɛ dumaa bagua anoa nemɔ nwo.

¹³ Anoa nemɔ, nza wɔ eyia afiteleɛ, nza wɔ sorɔ, nza wɔ ngwaen, yeɛ nza wɔ eyia atɔleɛ.

¹⁴ Kuro ne, ye fasue ne gyi fapem buru ne nyɔ so, bɔ Boaen Ba n’asomafoɛ buru ne nyɔ nemɔ bɛ dumaa guagua so ɔ.

¹⁵ Na bɔ ɔne me dwudwole ne, né otira sikaa kɔkorɛ pɔmaa bɔ bɛfa besusu nikye ɔ, kyɛ ɔbaafa susu kuro ne, ye anoa nemɔ ne ye fasue ne.

¹⁶ Kuro ne bɔ ɔla berɛ ne, ɔte ahinanan, ye tendenn ne ye tɛtrɛtɛɛ bɛte pɛ. Na ɔfale ye pɔmaa ne susuli kuro ne, ɔte kwanzii apee ko ɛyaa nnu; ye tendenn nu ne ye tɛtrɛtɛɛ nu ne kyɛbɔ osi kɔ anwuro ne bɛte pɛ.

¹⁷ Osa susuli ye fasue ne, ɔte agyirɛ ɛyaa ko aburanna ne nna, bɔ ɔte kyɛbɔ sona susu ye nikyee ɔ, kyɛbɔ abɔfo ne deɛ te ɔ.

¹⁸ Bɛfale nyɔboɛ bɔ bɛfrɛ ye yasepa yeɛ bɛtole ye fasue ne ɔ, na kuro ne bɔbɔ deinn de ɔte sikaa kɔkorɛ paa, bɔ ye nye te kaenn kyɛ neanu ɔ.

¹⁹ Kuro ne, ye fapem bɔ ye fasue ne gyi so ne, bɛfale nyɔboɛ amukoraa bɔ bɛ nyɔboɛ yɛ se paa yeɛ bɛhyehyɛle ɔ. Fapem bɔ oli moa ne te yasepa, bɔ ɔtɔ so nyɔ ne te safire, bɔ ɔtɔ so nza ne te kyasedon, bɔ ɔtɔ so nna ne te ɛmerade,

²⁰ bɔ ɔtɔ so nnu ne te sadonike, bɔ ɔtɔ so nzia ne te kanelian, bɔ ɔtɔ so nzoo ne te krisolite, bɔ ɔtɔ so mmɔtwɛ ne te bɛrile, bɔ ɔtɔ so ngona ne te topase, bɔ ɔtɔ so buru ne te krisoprase, bɔ ɔtɔ so buru ne ko ne te yasinte, bɔ ɔtɔ so buru ne nyɔ ne te amɛtise.

²¹ Na anoa buru ne nyɔ nemɔ bɛte mbembenanneɛ buru ne nyɔ; bɛfale mbembenanneɛ ko yeɛ bɛyɔle anoa ko biala ɔ. Na kuro ne dwaaso te sikaa kɔkorɛ paa bɔ ye nye te kaenn kyɛ neanu ɔ.

²² Na mannwu asɔneyɛɛ sua biala wɔ kuro ne anu, ofikyɛ Tuminiɛ Awurade Nyameɛ ne Boaen Ba ne yeɛ bɛte nu asɔneyɛɛ sua ɔ.

²³ Na kuro ne nhia kyɛ eyia kɔbɔ nu anaa ɛsraen kɔta nu ɔ, ofikyɛ Nyameɛ animnyam ta wɔ nu, na Boaen Ba ne yeɛ ɔte ye kanea ɔ.

²⁴ Maen maen kɔnate ye kanea ne anu, na aseɛ so ahemvo bɛkɔfa b’animnyam [ne anidie] bɛkɔwa nu.

²⁵ Bɛngɔtoto ye anoa nemɔ anu alehyeleɛ nu koraa, yeɛ aleɛ ngɔsa berɛ;

²⁶ na bɛkɔfa maen maen mɔ b’animnyam ne b’anidie bɛkɔwa nu.

²⁷ Nakoso nikyee biala bɔ ye nwo nde, yeɛ bɔ ɔbɔ akyiwadeɛ bra, anaa bɔ ɔpɛ ngondombo ɔ de, ongowura nu; sana bɛ bɔ bahyerɛ bɛ dumaa wɔ Boaen Ba ne ngoa nwomaa ne anu angome.