Nyekyire 20 - AHYERƐLƐ KRONGRON

Afoɛ apee ne

¹ Afei nwuni abɔfo bie kyɛ ofi nyameɛso odwu ba ase ɔ. Né otira aseɛ bo dɔ kumaa kuronguronn ne noa safoaa ne ngɔnzɔngɔnzɔ pirikua bie.

² Na ɔhyele sasrabɔnzam ne, sɔ daa tete ewoo ne, bɔ ye ole Abɔnzam ne Satan ne, na ɔkyekyele ye afoɛ apee ko,

³ na ofindini ye tole aseɛ bo dɔ kumaa kuronguronn ne anu, ɔtole ye nu, na ɔfale nzɔanoɛ tale ye noa, kyɛbɔ ɔkɔyɛ bɔ ɔngɔlakalaka maen maen mɔ ko kɔpem kyɛ afoɛ apee ko ne kɔso ɔ. Nakoso ɛhe asi ne, odi kyɛ bɛyakyi ye mmerɛ kãa bie.

⁴ Afei nwuni ahennie bia mɔ, na bɛmane bɛ bɔ bɛtete so nemɔ tumi kyɛ bebua ndɛen. Na bɛ bɔ ɔnate Kristo adanzeɛ ne Nyameɛ dwirɛ ne ati bɛpepɛle bɛ ti ne, nwuni bɛ kra mɔ. Bɛ de, banzɔne kaka ne anaa ye honi ne, yeɛ banne ye nzorɛhyɛlɛ ne wɔ bɛ nwoma so, anaa bɛ sa nwo. Benyane ngoa bieku, na bɛne Kristo belili hene afoɛ apee ko.

⁵ Nakoso awufoɛ ngaa nemɔ de, bannya ngoa ko maa oodwuli kyɛ afoɛ apee ko ne sone ɔ. Ɛhe ole ewutingyelɛ bɔ oli moa ne.

⁶ Na ebiala bɔ ɔboka ewutingyelɛ bɔ oli moa ne aso ne, wanya saleɛ, na ɔte krongron. Sɔ mmenia ne, ewue bɔ ɔtɔ so nyɔ ne olle bɛ so tumi, na mmom bɛkɔyɛ Nyameɛ ne Kristo asɔfo, na bɛne ye koli hene afoɛ apee ko.

Abɔnzam ali ngoguo

⁷ Na sɛ afoɛ apee ko ne odwu a, bɛkɔsangye Satan bekofi ye kuku nu,

⁸ na okofite kɔwa kɔɔlakalaka maen maen mɔ bɔ bɛwɔ aseɛ ndweasoɛ nna ne aso: Gɔgo ne Magɔgo, kyɛ ɔboaboa bɛ noa maa bɛkɔ koɛ; na bɛ somaa te kyɛ mboanoa anweaa.

⁹ Bɛfo bɛhɔle aseɛ so nekaa biala, na bɛpɛle anwoteefoɛ asikyeleɛ ne nwo beyiale, ɔne kuro bɔ Nyameɛ kuro ye dwirɛ ne. Na see [fili Nyameɛ berɛ] wɔ nyameɛso wale ase ɔɔyerale bɛ.

¹⁰ Na abɔnzam bɔ ɔlakalakale bɛ ne de, befindini ye bɛtole see ne sɔfe abura ne anu, nekaa bɔ kaka ne ne ngɔmhyɛlɛniɛ ngondomboniɛ ne bɛwɔ ne, na bɛkɔfa bɛ bɛkɔfa yealɛ nu alehyeleɛ ne alesaleɛ nu afebɔɔ.

Bebua awufoɛ ndɛen

¹¹ Afei nwuni ahennie bia fufue pirikua bie ɔne bɔ ɔte so ne, bɔ aseɛ ne nyameɛso nwati fili ye nyunu ne; na bannya nekaa bamma bɛ.

¹² Na nwuni awufoɛ, kwahweabaa mɔ ne atitire kyɛ begyigyi ahennie bia ne nyunu. Bebukyebukyele nwomaa nemɔ anu, besa bebukyele nwomaa foforɛ bie bɔ ɔte ngoa nwomaa ne anu. Na begyinane edwirɛ bɔ bahyerɛ ye wɔ nwomaa nemɔ anu so bebuale awufoɛ ndɛen, kyɛbɔ bɛ nnwumaa te ɔ.

¹³ Na ɛpo yele awufoɛ bɔ bɛwɔ ye nu ne wale. Ewue ne Ɛborɔ yeyele awufoɛ bɔ bɛwɔ bɛ nu ne bɛwale. Na bebuale bɛ nu biala ndɛen kyɛbɔ bɛ nnwumaa te ɔ.

¹⁴ Afei befindini Ewue ne Ɛborɔ beguale see abura ne anu. Ewue bɔ ɔtɔ so nyɔ ɛne.

¹⁵ Na ebiala bɔ bannwu kyɛ bahyerɛ ye dumaa wɔ ngoa nwomaa ne anu ne, begyili ye bɛtole see abura ne anu.