Nyekyire 2 - AHYERƐLƐ KRONGRON

Ɛfeso asɔre ne ngraa

¹ “Kyerɛ kɔma Ɛfeso asɔre ne anu abɔfo ne kyɛ: Bɔ otira nzramaa nzoo wɔ ye sa famaa nu, bɔ ɔnate sikaa kɔkorɛ kanea bakaa nemɔ b’afia ne, ye noa dwirɛ ɛhe:

² Mese wɔ nnwumaa, wɔ fɛɛ ne w’animia, ɔne kyɛbɔ ɛngora nzosɔ bɔnefoɛ so, ná mmom aso bɛ bɔ bɛnwa bɛte asomafoɛ nakoso bɛtte asomafoɛ ɔ anea, na anwu bɛ kyɛ bɛte ngondombofoɛ.

³ Mese kyɛ anya animia paa, na ɔnate me dumaa ti anwu amaneɛ, nakoso w’abasa nu mmu.

⁴ Nakoso mebɔ wɔ kwaadu, ofikyɛ ayakyi ɔdɔ bɔ elili moa nyane ye ne anu.

⁵ Yiti kaye tebea bɔ efili nu fini ase ne, ná sakyera w’adwene, ná yɔ nnwumaa bɔ ɛyɔle ye daa ne! Na sɛ anyɔ sɔ a, ngɔwa wɔ so ndɛndɛ, ná maaye wɔ kanea bakaa ne mafi ye boso, sana ɛsakyera w’adwene.

⁶ Nakoso ayɔ paa he, kyɛ ekyi Nikolatafoɛ nnwumaa bɔ me koso mekyi ne.

⁷ Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ngɔma ye ngoa bakaa bɔ ogyi Nyameɛ Paradise ne anu mma maa okoli.

Simina asɔre ne ngraa

⁸ “Kyerɛ kɔma Simina asɔre ne anu abɔfo ne kyɛ: Bɔ ɔte ahyɛaseɛ ne ayieleɛ, bɔ owuli ná osa te ase ne, ye noa dwirɛ ɛhe:

⁹ Mese w’amaneɛnwunɛ ne wɔ hiaa, (nakoso anya wɔ nwo), yeɛ mese bɛ bɔ bɛnwa bɛte Yudafoɛ nakoso bɛtte Yudafoɛ ne, ná mmom bɛte Satan nyianu sua ne, bɛ musue dwirɛ kekanɛ ne.

¹⁰ Nnɛsuro amaneɛ biala bɔ ɛbaanwu ye ɔ. Tie, abɔnzam kɔfa ɛmɔ nu biemɔ kogua kuku nu, kyɛ ɔfa so ɛmɔ nea, na ɛmɔkonwu amaneɛ eleburu. Di nahorɛ kodwu ewue nu, na ngɔma wɔ ngoa abotire.

¹¹ Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ewue bɔ ɔtɔ so nyɔ ne ngɔwa ye so.’

Pɛgamɔm asɔre ne ngraa

¹² “Kyerɛ kɔma Pɛgamɔm asɔre ne anu abɔfo ne kyɛ, ‘Bɔ otira sɛpɔ nnaennaen ne, ye noa dwirɛ ɛhe:

¹³ [Mese wɔ nnwumaa], mese nekaa bɔ ɛte ɔ, nekaa bɔ Satan ahennie bia gyi ne; nakoso atira me dumaa ne anu bum, na ambo me gyidie ne, mmerɛ bɔ behuni m’adanzeniɛ nahorɛniɛ Antipa wɔ ɛmɔ berɛ ne po, nekaa bɔ Satan te ne.

¹⁴ Nakoso mebɔ wɔ kwaadu kãa, ofikyɛ ele mmenia biemɔ wɔ wɔ berɛ bɔ basɔ Balaam ngyerɛkyerɛ nu ɔ, ye bɔ ohyirele Balake kyɛ ɔto Yisraelfoɛ sundidua ma beli bosoen so aleɛ, ná bɛbɔ adwaman ɔ.

¹⁵ Asa koso, ele ebiemɔ wɔ wɔ nu bɔ basɔ Nikolatafoɛ ngyerɛkyerɛ [bɔ mekyi ne] anu ɔ.

¹⁶ Yiti sakyera w’adwene! Na sɛ anyɔ sɔ a, ngɔwa wɔ so ndɛndɛ, na ngɔfa me noa nu ngrandɛ ne me ne bɛ yɛkɔho.

¹⁷ Bɔ ole asoɛ ne, maa otie bɔ Sunzum ne kã kyire asɔre nemɔ ne: Bɔ odi ngonim ne, ngɔma ye mvealeɛ nu mana ne bie maa okoli, na ngɔma ye nyɔboɛ fufue, na nyɔboɛ ne aso yeɛ bahyerɛ dumaa foforɛ bɔ ebiala nze bagua ɔ, sana sona bɔ onya ye ne angome.’

Tiatira asɔre ne ngraa

¹⁸ “Kyerɛ kɔma Tiatira asɔre ne anu abɔfo ne kyɛ, ‘Nyameɛ Awa ne, bɔ ye nye mmaa te kyɛ see bɔ ogye, bɔ ye gya nwo te kyɛ ayaa bɔ bahwi ye nwo nyemenenyemene ne, ye noa dwirɛ ɛhe:

¹⁹ Mese wɔ nnwumaa, wɔ ɔdɔ, wɔ gyidie, wɔ ɛsolɛ, w’animia, ɔne wɔ kekesaala ye nnwumaa bɔ ɔtra daa deɛ ne ɔ.

²⁰ Nakoso mebɔ wɔ kwaadu kãa, ofikyɛ ɛma braa Yesebɛl bɔ ɔfrɛ ye nwo ngɔmhyɛlɛniɛ ne ate, kyɛ ɔyɛ ngyerɛkyerɛ ná ɔlakalaka me ngoaa mɔ ma bɛbɔ adwaman ná beli bosoen so aleɛ.

²¹ Mama ye mmerɛ kyɛ ɔfa sakyera fi ye adwamanbɔlɛ nu, nakoso wanzakyera.

²² Na tie, ngɔma anwonyerɛ kɔbɔ ye kɔto bɛen so, na bɛ bɔ bɛne ye sɛkye agyaa ne, ngɔprapra amaneɛ pirikua ngogua bɛ so, sana bɛsakyera b’adwene wɔ bɛ yɔleɛ nwo.

²³ Ngohũhũ ye mma mɔ, na asɔre nemɔ amukoraa bekonwu kyɛ me yeɛ mepɛnzɛpɛnzɛ sona ti anu ne ahone nu dwirɛ nu ɔ; na ngɔma ɛmɔ nu biala akatuaa kyɛbɔ ye nnwumaa te ɔ.

²⁴ Nakoso ɛmɔ ngaa bɔ baha Tiatira, bɔ ɛmɔnni sɔ ngyerɛkyerɛ ne aso, bɔ ɛmɔanzua bɔ mmenia frɛ ye Satan mvealeɛ nu dwirɛ ne de, ɛmɔ yeɛ mekã mekyire ɛmɔ kyɛ, mengɔfa adesoa foforɛ mengɔto ɛmɔ so.

²⁵ Yiti bɔ ɛmɔanya ye ne, ɛ́mɔsɔ nu yé kɔpem kyɛ ngɔwa ɔ.

²⁶ Na bɔ odi ngonim, ɔne bɔ ɔsɔ me nnwumaa nu kodwu ayieleɛ ne, ngɔma ye maen maen mɔ so tumi;

²⁷ na ɔkɔfa buralɛ pɔmaa yeɛ okoli bɛ so ɔ, na ɔkɔbobɔ bɛ kyɛ ngukuenwonɛniɛ ngukue; kyɛbɔ me koso nyane tumi mvili me Baba berɛ ne ala.

²⁸ Na ngɔfa Ngyerɛmɔ Nzramaa ne ngɔma ye.

²⁹ Bɔ ole asoɛ ne, maa otie bɔ Sunzum ne kã kyire asɔre nemɔ ne.