Nyekyire 18 - AHYERƐLƐ KRONGRON

Kuro piri Babilɔn bɔlɛ

¹ Na ɛhemɔ asi ne, nwuni abɔfo foforɛ kyɛ ofi nyameɛso odwu ba ɔ. Né ole tumi piri, na ye animnyam tale aseɛ so.

² Na ɔteane nu serɛserɛ kyɛ, “Kuro piri Babilɔn abɔ, wabɔ! Wakakyi sunzummɔne mɔ b’atenaleɛ ne sunzum fiɛ amukoraa b’awuro ne nnomaa bɔ bɛ nwo nde ná bekyi ɔ amukoraa b’atenaleɛ.

³ Ofikyɛ maen maen amukoraa bano ye adwamanbɔlɛ nzaa ne bie, na aseɛ so ahemvo mɔ bɛne ye babɔ adwaman, na aseɛ so dwadifoɛ bɛnate ye anwonya tam mmorosoɛ ne aso banya bɛ nwo.”

⁴ Na nza ndele komviɛ foforɛ mvili nyameɛso kyɛ, “Me mmenia, ɛ́mɔfi ye nu béfite, ná ɛmɔanyɔ ye bɔne yɔleɛ ne bie, ná ye hawo ne bie amma ɛmɔ so.

⁵ Ofikyɛ ye bɔne yɔleɛ noa aboa waadwu nyameɛso, na Nyameɛ akaye ye amumuyɛɛ nemɔ.

⁶ Ɛ́mɔtua ye so kerɛ kyɛbɔ otuale ɛmɔ so kerɛ ne, ɛ́mɔtua ye so kerɛ mmɔhoɛ nyɔ, kyɛbɔ ye yɔleɛ te ɔ; kwangoa bɔ nu yeɛ ɔfrafrale ne, ɛ́mɔfra ye mmɔhoɛ nyɔ bɛ́ma ye.

⁷ Kyɛbɔ osi hyɛle ye nwo animnyam pee ná ɔgyele ye nye wɔ anwonya nu ne, sɔ ala yeɛ ɛ́mɔma ye amaneɛnwunɛ ne aworabɔlɛ ɔ́yɛ pee ɔ. Ofikyɛ ɔhane ye wɔ ye ti anu kyɛ, ‘Nde ɛhemmaa bɔ nde berɛ ɔ, nnde kunaniɛ, na mengoli aworabɔlɛ le.’

⁸ Yiti ye hawo ne, ɔkɔwa ye so ɛlɛhomapɛ: ewue ne aworabɔlɛ ne ɛhɔen, na bɛkɔfa see bɛkɔyera ye motoo, ofikyɛ Awurade Nyameɛ bɔ obua ye ndɛen ne, ɔte anwoserɛniɛ.”

⁹ Na aseɛ so ahemvo mɔ bɔ bɛne ye bɔle adwaman ná bɛne ye gyele bɛ nye anwonya nu ne, sɛ benwu nwosina bɔ ofi ye yeralɛ ne anu a, bɛkɔbɔ ye nwo awuye ná basu ye.

¹⁰ Na ye amaneɛnwunɛ ne bɔ besuro ne ati, bekogyinagyina dedeede bɛkɔhã kyɛ, “Yaakɔ oo, yaakɔ oo! Wɔ, kuro piri Babilɔn, kuro bɔ wɔ nwo yɛ se, dɔnhwere komapɛ nu yeɛ wɔ ndɛenbualɛ awa ye!”

¹¹ Na aseɛ so dwadifoɛ mɔ bekosu ye ná bali ye nwo aworabɔlɛ, ofikyɛ ebiala nndɔ bɛ dwaa nningyein nemɔ ko:

¹² esikaa kɔkorɛ, ɛdwetɛ, nyɔboɛ bɔ ye nyɔboɛ yɛ se paa ɔ, afire paa, nwera paa, kende, serekye ne ago, mmakaa fonafona amukoraa, nningyein bɔ bafa ɛsoen gye bali adwii bayɔ amukoraa, nningyein bɔ bafa ndaboa paa, kɔɔbere, buralɛ ne nyɔbosanyene bayɔ amukoraa;

¹³ ɛsaa, pɛprɛ, ɛyɛɛ, krobo, ayirefona, nzaa, ngoo, esam paa, atokoɔ, nyɛmmoa, mmoaen, mbɔngɔ, teaseɛnam mɔ, nganga ne mmenia kra.

¹⁴ (Bekose kyɛ,) “Mmakaammaa bɔ né wɔ kra komvi wɔ so ne, wafi wɔ nwo wahɔ, w’anwonyadeɛ paa ne w’animnyam amukoraa wabɔ wɔ, na engonwu bɛ ko!”

¹⁵ Na dwadifoɛ bɔ belili sɔ nningyein nemɔ nwo dwaa, bɔ kuro ne ati benyane bɛ nwo ne, ɔnate ye amaneɛnwunɛ ne ati bekoogyina dedeede, na bekosu bɛkɔbɔ awuye kyɛ,

¹⁶ “Yaakɔ oo, yaakɔ oo! Kuro piri bɔ né ɔhera nwera paa, kende ne ago, ná ɔfa sikaa kɔkorɛ, mbembenanneɛ ne afire paa siesie ye nwo ɔ!

¹⁷ Dɔnhwere komapɛ anu yeɛ sɔ anwonya ne amukoraa wayɛ mbaen ye!” Na ɛlɛenhanɛfoɛ mbanyi amukoraa, ɛlɛen nu akwandufoɛ amukoraa, ɛlɛen nu adwumayɔlɛfoɛ ne ɛpo so dwadifoɛ amukoraa begyinagyinane dedeede,

¹⁸ na benwuni nwosina bɔ ofi ye yeralɛ ne anu nen, bɛteateane nu kyɛ, “Kuro beni yeɛ né ɔne kuro piri he bɛsɛ ɔ?”

¹⁹ Na bɛsesale mvuture beguaguale bɛ ti so, na besuni bɛbɔle awuye kyɛ, “Yaakɔ oo, yaakɔ oo! Kuro piri he bɔ ɔnate ye anwonya ti bɛ bɔ bele ɛlɛen wɔ ɛpo so amukoraa benyane bɛ nwo wɔ nu ɔ! Dɔnhwere komapɛ nu yeɛ babɔ ye bɔkɔɔ ye!”

²⁰ O, nyameɛso ne anwoteefoɛ ne asomafoɛ ne ngɔmhyɛlɛfoɛ, ɛ́mɔli ye nwo ahurusi, ofikyɛ Nyameɛ atɔ ye so wereɛ wama ɛmɔ!”

²¹ Yeɛ abɔfo anwoserɛniɛ bie tamone nyɔboɛ bɔ ɔte kyɛ nyɔboɛ kandinga bɔ bɛfa beti aburoo, na ogyi tole ɛpo nu hane kyɛ, “Sɔaa yeɛ bɛbaafindi kuro piri Babilɔn bɛto wɔ anyeborolɛ so ɔ, na bengonwu ye ko.

²² Na bɛngɔte sangoobɔlɛfoɛ, edweintolɛfoɛ, aweɛnhulɛfoɛ ne totorobɛndohulɛfoɛ nga wɔ wɔ nu ko, bengonwu adwiililɛ nu dwumvoɛ biala wɔ wɔ nu ko, yeɛ bɛngɔte nyɔboɛ bɔ bɛfa beti aburoo ɔ nga wɔ wɔ nu ko;

²³ kanea ye hyireinn ngɔta wɔ wɔ nu ko, na bɛngɔte atɔmvorɛ biaa ne atɔmvorɛ braa komvi wɔ wɔ nu ko; ofikyɛ wɔ dwadifoɛ yeɛ né bɛte atitire wɔ aseɛ so ɔ, na ɛfale wɔ ngonyaayelɛ lakalakale maen maen amukoraa.

²⁴ Na ye nu yeɛ benwuni ngɔmhyɛlɛfoɛ ne anwoteefoɛ ne mmenia amukoraa bɔ bahũ bɛ wɔ aseɛ so ɔ bɛ mogya ɔ.”