Nyekyire 16 - AHYERƐLƐ KRONGRON

Nyameɛ ahonehulɛ kulie nzoo ne

¹ Afei ndele komviɛ piri bie bɔ ofi asɔneyɛɛ sua ne anu kyɛ odwudwo kyire abɔfo nzoo nemɔ kyɛ, “Ɛmɔhɔ beehwie bɔ ɔwɔ Nyameɛ ahonehulɛ kulie nzoo ne anu begua aseɛ so.”

² Yiti abɔfo bɔ oli moa ne hɔle oohwiele bɔ ɔwɔ ye kulie ne anu guale aseɛ so, na kena bɔ ɔbo mvamva ná otutu ɔ tutuli mmenia bɔ bele kaka ne nzorɛhyɛlɛ ne, ɔne bɛ bɔ bɛkotole ye honi ne.

³ Na abɔfo bɔ ɔtɔ so nyɔ ne hwiele bɔ ɔwɔ ye kulie ne anu guale ɛpo nu, na ɔkakyili kyɛ efuin mogya, na ɛpo ne anu ngaka amukoraa wuwuli.

⁴ Na abɔfo bɔ ɔtɔ so nza ne hwiele bɔ ɔwɔ ye kulie ne anu guale asue mɔ ne asue ti mɔ nu, na bɛkakyili mogya.

⁵ Na ndele kyɛ nzue mɔ so abɔfo ne ɔkã kyɛ, “O Krongronniɛ, wɔ bɔ ɛwɔ berɛ, ná ɛwɔ berɛ fi tetetete ɔ, ɛtengyɛ, ofikyɛ sɔ yeɛ abua ndɛen ɔ.

⁶ Na ɔnate kyɛ bahwie anwoteefoɛ ne ngɔmhyɛlɛfoɛ mogya bagua ne ati, wɔ koso ama bɛ mogya maa bano, na bɔ ɔfata bɛ hɔ ɛne.”

⁷ Na ndele komviɛ bie bɔ ofi afɔleɛ bokyea ne anu kyɛ, “Amba, O Tuminiɛ Awurade Nyameɛ, wɔ ndɛenbualɛ te nahorɛ na ɔtengyɛ.”

⁸ Na abɔfo bɔ ɔtɔ so nna ne hwiele bɔ ɔwɔ ye kulie ne anu guale eyia so; na bɛmane ye see tumi kyɛ ɔbɔ gyireingyirein ɔyera mmenia.

⁹ Na ahuhuro kandinga mane mmenia nwo yerayerale bɛ, na bɛkekane musue dwirɛ betiale Nyameɛ bɔ ole sɔ ɛhawo nemɔ so tumi ne, na banzakyera b’adwene banhyɛ ye animnyam.

¹⁰ Na abɔfo bɔ ɔtɔ so nnu ne hwiele bɔ ɔwɔ ye kulie ne anu guale kaka n’ahennie bia ne aso, na ye ahennie ne kakyili awosii; na mmenia fale yealɛ bɛpesale bɛ temverema.

¹¹ Na ɔnate ye yealɛ ne bɛ nwo ngena ngena ne ati, bɛkekane musue dwirɛ betiale nyameɛso Nyameɛ ne, na banzakyera b’adwene bamvi bɛ yɔleɛ nwo.

¹² Na abɔfo bɔ ɔtɔ so nzia ne hwiele bɔ ɔwɔ ye kulie ne anu guale asue piri Yufreti nu, na nu nzue ne wewele, kyɛbɔ okosiesie atee kɔto berɛ kɔma ahemvo mɔ bɔ befi eyia afiteleɛ dɔ ɔ.

¹³ Na nwuni sunzum nza bie bɔ bɛ nwo nde, bɔ bɛte kyɛ ɛporohyɛen ɔ, kyɛ befi sasrabɔnzam ne noa nu, kaka ne noa nu, yeɛ ngɔmhyɛlɛniɛ ngondomboniɛ ne noa nu befite.

¹⁴ Bɛte sunzummɔne sunzum mɔ bɔ bɛyɔ nzɛngyerɛnneɛ, bɔ bɛkɔ wiase amukoraa ahemvo mɔ so aporɔ bɛboaboa bɛ noa bɛma koɛ wɔ Tuminiɛ Nyameɛ ye kyẽa piri ne ɔ.

¹⁵ (“Tie! Méba kyɛ awueniɛ. Na sona bɔ ɔwɛne ná ɔnea ye ndaadeɛ so, ná wamva ye nwo wando so wannate ma bannwu ye nwo ne, onya saleɛ.”)

¹⁶ Na bɛboaboale bɛ noa wɔ nekaa bie bɔ Hebri dwudwolɛ nu bɛfrɛ berɛ Amagedon.

¹⁷ Na abɔfo bɔ ɔtɔ so nzoo ne hwiele bɔ ɔwɔ ye kulie ne anu guale mvrama nu. Na komviɛ piri bie fili asɔneyɛɛ sua ne anu, fili ahennie bia ne anu, kyɛ, “Wayie!”

¹⁸ Na agralaa tetele, komviɛ bie wale, ɔbobɔle nu kurudududu; na aseɛwosolɛ kandinga wale, bɔ ofi mmerɛ bɔ mmenia wale aseɛ so ɔ, aseɛwosolɛ piri sɔa ebie ɔwwale le ɔ.

¹⁹ Kuro piri ne anu hyɛle bue nza, na maen maen nguro mɔ bɔle; na kuro piri Babilɔn nwo ngayeɛ wale Nyameɛ nyunu, kyɛ ɔkɔmaa ɔkɔno ye yaafɛlɛ hahii nzaa kulie ne.

²⁰ Na supɔ biala nwatili, na bannwu mmokaa biala ko.

²¹ Na afei asukɔtwea mbiri mbiri bɔ ebiala nu nonɛ kɔyɛ kilo aburanna ne nnu ɔ, befili nyameɛso bɛtɔ beguale mmenia so; na ɛhawo bɔ asukɔtwea ne maa ɔwale ne ati, mmenia kekane musue dwirɛ betiale Nyameɛ, ofikyɛ né ɛhawo ne te piri paa.