Nyekyire 13 - AHYERƐLƐ KRONGRON

Kaka bɔ oli moa ne

¹ Na nwuni kaka bie bɔ ole tire nzoo, ɔne mmɛen buru kyɛ ofi ɛpo nu ofite ɔ. Né ahennie abotire buru bobɔ ye mmɛen nemɔ, na musue abodin mɔ wɔ ye ti nemɔ anwo.

² Na kaka bɔ nwuni ye ne ɔte kyɛ aboa, ye gya te kyɛ kwabrafo gya, na ye noa te kyɛ gyata noa. Na sasrabɔnzam ne fale ye tumi ne ye ahennie bia ne anwoserɛ piri ne mane ye.

³ Na nwuni kyɛ, ye ti nemɔ anu ko soma kyɛ babɔ ye fɛɛ kandinga, nakoso né ye puralɛ kena ne ahɔ. Na kaka ne nwo yɛle aseɛ so ama amukoraa nwanwa maa belili ye si.

⁴ Na bɛkotole sasrabɔnzam bɔ ɔmane kaka ne tumi ne; na bɛkotole kaka ne bɛhane kyɛ, “Nwa yeɛ ɔte kyɛ kaka ne ɔ? Nwa yeɛ ɔkɔhora ne ye bɛkɔho ɔ?”

⁵ Na bɛmane kaka ne noa bɔ ɔfa kekã edwirɛ mbiri mbiri ne musue dwirɛ ɔ, na bɛmane ye ate maa olili tumi bosome aburanna ne nyɔ.

⁶ Na obukyele ye noa kekane musue dwirɛ tiale Nyameɛ, ɔkekane musue dwirɛ tiale ye dumaa ne ye tena sua ne bɛ bɔ bɛte nyameɛso ɔ.

⁷ Na bɛmane ye ate kyɛ ɔfa koɛ teta anwoteefoɛ, ná oli bɛ so ngonim. Na bɛmane ye tumi wɔ mmusua kure ne edwudwolɛ mɔ ne maen amukoraa so.

⁸ Na bɛ bɔ bɛte aseɛ so amukoraa bɛkɔkoto ye: bɛ bɔ bamvi wiase bohyɛlɛ bangyerɛ bɛ dumaa wɔ Boaen Ba bɔ behuni ye ne ngoa nwomaa ne anu ne.

⁹ Bɔ ole asoɛ ne, maa otie!

¹⁰ Sɛ ebie kye nnure a, ye koso bɛkɔhye ye nnure; sɛ ebie fa ngrandɛ ku a, ye koso ɔsɛ kyɛ bɛfa ngrandɛ beku ye. Na ɛwa yeɛ anwoteefoɛ b’animia ne gyidie wɔ ɔ.

Kaka bɔ ɔtɔ so nyɔ ne

¹¹ Na nwuni kaka foforɛ bie bɔ ofi aseɛ nu fite wale ɔ; né ole mmɛen nyɔ te kyɛ boaen ba, na odwudwo kyɛ sasrabɔnzam.

¹² Na ɔfa kaka bɔ oli moa n’anwoserɛ amukoraa yɔ ye nnwumaa, na ɔma aseɛ ne bɛ bɔ bɛte so ɔ bɛkoto kaka bɔ oli moa bɔ ye puralɛ kena ahɔ ne.

¹³ Na ɔyɔ nzɛngyerɛnneɛ mbiri mbiri, na ɔma see po fi nyameɛso ba aseɛ so bɔ mmenia nye tua ɔ.

¹⁴ Na nzɛngyerɛnneɛ bɔ wanya ye nwo tumi kyɛ ɔyɔ ye wɔ kaka ne nyunu ne, ɔfa so lakalaka bɛ bɔ bɛte aseɛ so ɔ; na ose bɛ bɔ bɛte aseɛ so ɔ kyɛ, bɛ́yɔ ohoni bɛma kaka bɔ ngrandɛ apura ye, nakoso ɔtɛ te ase ne.

¹⁵ Na bɛmane ye tumi kyɛ ɔma kaka ne honi ne sunzum, ná kaka ne honi ne po odwudwo, ná ɔma behũ mmenia wora bɔ bɛngoto kaka ne honi ne.

¹⁶ Na ɔhyɛ mmenia mukoraati: kwahweabaa mɔ ne atitire, esikafoɛ ne ehiafoɛ, nnehyeɛ ne nganga maa bɛhyɛ bɛ nzorɛ wɔ bɛ sa famaa nwo, anaa bɛ nwoma so;

¹⁷ maa ɔnate so ebiala ngora ndɔ nikye anaa ɔnyɛ ye atɔen, sana sona bɔ ole nzorɛhyɛlɛ ne, bɔ ɔte kaka ne dumaa anaa ye dumaa ngondaa nzorɛhyɛlɛ ne ngome

¹⁸ Ɛhe hia ma nworɛ. Ebiala bɔ ole ndeaseɛ ne, ɔsɛ kyɛ ɔsesẽ kaka ne ngondaa ne, ofikyɛ ɔte sona ngondaa, na ye ngondaa ne te ɛyaa nzia ne aburasia ne nzia.