Nyekyire 11 - AHYERƐLƐ KRONGRON

Adanzefoɛ nyɔ ne

¹ Afei bɛmane me elemmire bie bɔ ɔte kyɛ pɔmaa, na besele me kyɛ, “Dwɔso ná susu Nyameɛ asɔneyɛɛ sua ne, afɔleɛ bokyea ne, ɔne bɛ bɔ bɛsɔne wɔ nu ne.

² Nakoso asɔneyɛɛ sua ne anwo aluo dɔ de, yakyi to berɛ, nnɛsusu; ofikyɛ bafa berɛ bama Amaenmaensofoɛ, na bekohwi bɛkɔfa kuro krongron ne aso bosome aburanna ne nyɔ.

³ Na ngɔma m’adanzefoɛ nyɔ bɛkɔhera ɛsɛen tena bɛkɔhyɛ ngɔm ngyẽa apee ko ɛyaa nyɔ ne aburasia.”

⁴ Na ɛhemɔ ole olive bakaa nyɔ ne ne kanea bakaa nyɔ bɔ begyigyi aseɛ Mene nyunu ne.

⁵ Na sɛ ebie yɛ kyɛ ɔha bɛ a, see fi bɛ noa nu bayera bɛ pɔfoɛ mɔ; yeɛ sɛ ebie yɛ kyɛ ɔha bɛ a, sɔ ala yeɛ ɔsɛ kyɛ beku ye ɔ.

⁶ Bele tumi kyɛ bɛto ewienu nu, bɔ esue ndɔ wɔ mmerɛ bɔ bɛhyɛ ngɔm ɔ; yeɛ bele nzue mɔ so tumi kyɛ bɛmaa bɛkakyi mogya, ɔne tumi bɔ ɔmaa bɛfa ɛhawo biala bɛto aseɛ so, mmerɛ pee biala bɔ bekuro ɔ.

⁷ Na sɛ beyie b’adanzeɛlilɛ ne a, kaka bɔ ofi aseɛ bo dɔ kumaa kuronguronn ne anu ɔfo ba ne, ɔkɔfa koɛ kɔɔteta bɛ, na okoli bɛ so ngonim ná wahũ bɛ.

⁸ Na bɛ fuin nemɔ kɔlela kuro piri ne dwaaso, kuro bɔ sunzum nu bɛfrɛ ye Sodom ne Misraim ne, nekaa bɔ bɛbɔle b’Awurade koso mmeamudua nu ne.

⁹ Na mmenia kofi maen maen ne mmusua kure ne edwudwolɛ ahoroɔ nu bekotu bɛ nye bekogua bɛ fuin nemɔ so ɛlɛsa ne bue, na bɛngɔma bengosie bɛ fuin nemɔ.

¹⁰ Na bɛ bɔ bɛte aseɛ so ɔ bekoli bɛ nwo ahurusi, na bɛ nye kɔgye ná bamanemane bɛ nwo akyɛdeɛ; ofikyɛ sɔ ngɔmhyɛlɛfoɛ nyɔ nemɔ bɛfale ɛhawo bɛtole bɛ bɔ bɛte aseɛ so ɔ so.

¹¹ Nakoso ngyẽa ɛlɛsa ne bue asi ne, ngoa sunzum fili Nyameɛ nu oowurale bɛ nu, na bedwɔso begyinane bɛ gya so, na ɛserɛ piri paa hane bɛ bɔ benwuni bɛ ne.

¹² Na bɛtele kyɛ komviɛ piri bie fi nyameɛso odwudwo kyire bɛ kyɛ, “Ɛ́mɔfo bɛbra wa!” Na bɛfale munungum nu bɛfo bɛhɔle nyameɛso bɔ bɛ pɔfoɛ mɔ bɛ nye tua bɛ ɔ.

¹³ Na aseɛ wosole wɔ sɔ dɔnhwere ne ala nu, na kuro ne ngyɛmuɛ buru nu ko bu guale, na aseɛwosolɛ ne huni mmenia apee nzoo; na ɛserɛ hane bɛ bɔ baha ne, na bɛhyɛle nyameɛso Nyameɛ ne animnyam.

¹⁴ Musue bɔ ɔtɔ so nyɔ ne wapɛ nu. Na tie, musue bɔ ɔtɔ so nza ne ɔ́ba ndɛndɛ.

Totorobɛndo bɔ ɔtɔ so nzoo ne

¹⁵ Na abɔfo bɔ ɔtɔ so nzoo ne huli ye totorobɛndo ne, na komviɛ mbiri mbiri bobɔle nu wɔ nyameɛso kyɛ, “Ewiase ahennie wayɛ yɛ Awurade ne ye Kristo ne deɛ, na okoli hene afebɔɔ.”

¹⁶ Na mbanyi aburanyɔ ne nna bɔ bɛtete b’ahennie bia so wɔ Nyameɛ nyunu ne, bɛfale bɛ nyunu bebutubutuli ase bɛsɔnene Nyameɛ,

¹⁷ na bɛhane kyɛ, “Yɛfa asennaa yɛma wɔ, O Tuminiɛ Awurade Nyameɛ bɔ ɛwɔ berɛ, ná ɛwɔ berɛ fi tetetete ɔ, ofikyɛ afa wɔ tumi pirikua ne, na ali hene.

¹⁸ Maen maen mɔ fɛle yaa, na w’ahonehulɛ ne adwɔso, na mmerɛ adwu kyɛ ebua awufoɛ ndɛen, ná ɛma wɔ ngoaa, ngɔmhyɛlɛfoɛ ne anwoteefoɛ ne bɛ bɔ besuro wɔ dumaa, kwahweabaa mɔ ne atitirefoɛ akatuaa ɔ, ɔne kyɛ ɛkɔsɛkye bɛ bɔ bɛsɛkye aseɛ ɔ.”

¹⁹ Afei bebukyele Nyameɛ asɔneyɛɛ sua ne wɔ nyameɛso, na benwuni ye apam alaka ne wɔ asɔneyɛɛ sua ne anu. Na agralaa tetele, komviɛ mɔ, ɔbobɔle nu kurudududu, aseɛ wosole, na asukɔtwea tɔle piri paa.