Nworɛ Dwirɛhanɛniɛ 9 - AHYERƐLƐ KRONGRON

Ewue ma yɛ mukoraa yɛyɛ pɛ

¹ Ɛhe amukoraa, madwene ye nwo, mapɛnzɛpɛnzɛ ye mukoraa nu manea, na manwu ye kyɛ, teneneefoɛ ne nworɛfoɛ, yeɛ afei bɔ bɛyɔ ne, owura Nyameɛ sa nu: kyɛ ɔdɔ oo, kyɛ ɛpɔen oo, sona biala nze bɔ ɔkɔto ye ɔ;

² ofikyɛ ayieleɛ komapɛ ne ala yeɛ ɔla berɛ ma bɛ mukoraa ɔ: teneneeniɛ ne bɔnefoɛ, sona paa ne sona bɔ ɔtte mayee ɔ, sona bɔ ye nwo te ne bɔ ye nwo nde ɔ, bɔ ɔbɔ afɔleɛ ne bɔ ɔmmɔ afɔleɛ ɔ. Sona paa ne amumuyɛɛniɛ b’ayieleɛ te ko, yeɛ bɔ ɔta ndaen ne bɔ osuro ndaentalɛ koso b’ayieleɛ te ko.

³ Bɔ ɔkɔ so amukoraa wɔ wiase ne, bɔ ɔtte mayee koraa ɛne, kyɛ ayieleɛ komapɛ ne ala yeɛ ɔla berɛ ma kuro sona biala ɔ. Afei koso, bɔne ayi sona biala ti anu tɛkyɛ, ɛlaenbɔlɛ ali bɛ ti wɔ mmerɛ biala bɔ bɛte ngoa nu ɔ, na ɛhe asi ne, bɛkɔ bɛ kra si.

⁴ Nakoso sona biala bɔ ɔboka ateasefoɛ so ne, anyelasoɛ wɔ berɛ ma ye, ofikyɛ kyea bɔ ɔte ngoa nu ne, ɔte paa tra gyata bɔ wawu ɔ.

⁵ Ofikyɛ ateasefoɛ bɛse kyɛ bekowu, nakoso awufoɛ de, bɛnze huu; belle akatuaa biala ko, na bɛ nwo ngayeɛ atu amini.

⁶ Ɔdɔ bɔ benyane ye oo, ɛpɔen bɔ bɛpɔle oo, b’anyeboro oo, watu wamini dadadada, na nikyee biala bɔ ɔkɔ so wɔ wiase ne, belle kyɛfa biala wɔ nu ko.

⁷ Yiti kɔ so, di w’aleɛ wɔ anigye nu, ná fa anwosɛpɛ no wɔ nzaa, ofikyɛ bɔ ɛyɔ ne, Nyameɛ ale ato nu dadadada.

⁸ Mmerɛ biala, wura anigye ataadeɛ, yeɛ nnɛma sakyeɛfona pa wɔ ti so.

⁹ Wɔ ngoa amukoraa bɔ ɔte mbaen bɔ Nyameɛ afa ama wɔ wɔ wiase ne, ɛne ɛye bɔ ekuro yeɛ ɔ ɛmɔtena anigye so, ofikyɛ ɛfɛɛ bɔ ɛfɛ wiase ne, wɔ bue nu deɛ bɔ anya ye hɔ ɛne.

¹⁰ Adwuma biala bɔ wɔ sa kɔsɔ nu kyɛ ɛyɔ ne, fa w’anwoserɛ yɔ, ofikyɛ ɛborɔ dɔ bɔ ɛbaahɔ ne, adwuma anaa adwene anaa nimdeɛ anaa nworɛ nne dɔ.

¹¹ Nza nwuni kyɛ ewiase wa, nna bɛ bɔ bɛ nwo yɛ nyera ɔ yeɛ bedi amirikatulɛ nu ngonim ɔ; nna anwoserɛfoɛ yeɛ bedi koɛ nu ngonim ɔ; nna nworɛfoɛ yeɛ benya bɛ noa aleɛ ɔ, nna badwemma mɔ yeɛ benya bɛ nwo ɔ; yeɛ nna nimdeɛfoɛ yeɛ benya animnyam ɔ; nakoso mmerɛ ne mmerɛ tɛɛ la berɛ ma bɛ mukoraa.

¹² Sona biala nze ye mmerɛ deɛ. Na kyɛbɔ bɛfa asawu atianuserɛserɛ bɛkye egyein, ná besua ngaen bɛkye nnomaa ne, sɔ ala yeɛ mmerɛ tɛɛ te ngaen bɔ ɔkye adasa mvum nu ɔ.

¹³ Masa manwu sɔ nworɛ he koso wɔ wiase, na ɔte nikyee bɔ ɔte piri wɔ me nye so ɔ.

¹⁴ Né kuro kaaba bie wɔ berɛ bɔ mmenia kaaba bie wɔ so ɔ. Yeɛ ɛhene tuminiɛ bie hɔle ootuale kuro ne, na ɔkyekyele nyinasoɛ bɔ okogyina so kɔfo fasue ne ɔkɔhɔ kuro ne anu ɔ.

¹⁵ Né biaa ehianiɛ nworɛniɛ bie wɔ kuro ne anu, na ɔfale ye nworɛ pepɛ lele kuro ne. Nakoso ebiala ngaye sɔ ehianiɛ ne.

¹⁶ Na ye sɔ ne ati, ngane kyɛ, “Nworɛ nwo hia tra anwoserɛ, nakoso bemmu ehianiɛ nworɛ, yeɛ ɔkã dwirɛ a bɛmva.”

¹⁷ Nworɛfoɛ bɛ noa dwirɛ bɔ mmenia tie ye konn ne, bede bɛto nu bɛtra ngwaseafoɛ hene ye ndeateamuɛ.

¹⁸ Nworɛ nwo hia tra akodeɛ, nakoso bɔnefoɛ komapɛ sɛkye paa pee.