Nworɛ Dwirɛhanɛniɛ 8 - AHYERƐLƐ KRONGRON

¹ Nwa yeɛ ɔte kyɛ nworɛniɛ ne ɔ? Nwa yeɛ ɔse edwirɛ bo kyire ɔ: Sona nworɛ ma ye nyunu yɛ gyenegyene, na ye nyunu kusuu ne sesã.

Yɛ sotie ma wɔ hene

² Menwa, yɛ sotie ma ɛhene n’ahyɛdeɛ, ofikyɛ ata ndaen ahyire Nyameɛ, [na nnɛmaa ɔha wɔ].

³ Sɛ edwirɛ ne ɔtte mayee a, nnɛtwetwe wɔ gya ase, fi ye nyunu berɛ kɔ, ofikyɛ bɔ okuro biala yeɛ ɔyɔ ɔ.

⁴ Ɔnate kyɛ, ɛhene noa dwirɛ te tumi, na nwa yeɛ ɔkɔhora kobisa ye kyɛ, “Na nzu yeɛ ɛyɔ ye?”

⁵ Sona biala bɔ odi mmeraa so ne, edwirɛ ndo ye, amba, nworɛniɛ adwene ɔse mmerɛ ne ne ndɛenbualɛ ne.

⁶ Ofikyɛ mmerɛ ne ndɛenbualɛ wɔ berɛ ma nikyee biala, na amaneɛ ayɛ adesoa piri wɔ kuro sona so.

⁷ Ɔnze edwirɛ bɔ okosi ɔ, ofikyɛ atee bɔ ɔkɔfa so kosi ne, nwa yeɛ ɔkɔhora kɔla ye ali kohyire ye ɔ?

⁸ Sona biala nne berɛ bɔ ole nwomeɛ so tumi, bɔ ɔkora si nwomeɛ ate maa ɔtena ye nu ɔ, anaa ole ye wue kyẽa so tumi ɔ? Ɛsrɛ atee wɔ koɛ nu a, engonya ye, yeɛ amumuyɛɛyɔlɛ mbepɛ nne bɛ bɔ bɛyɔ amumuyɛɛ ɔ.

⁹ Manwu ɛhemɔ amukoraa, na medwene nningyein amukoraa bɔ bɛyɔ ye wiase ne anwo: Mmerɛ bie wɔ berɛ a, sona fa ye tumi sisi obiɛngo maa ɔkakyi ye so amaneɛ.

¹⁰ Afei nwuni amumuyɛɛfoɛ bɔ besiele bɛ ɔ. Mmerɛ bɔ bɛte ase ne, né bedi nekaa krongron berɛ akɔneaba. Na kuro bɔ né bɛyɔ amumuyɛɛ wɔ so ne, mmenia wora fili bɛ yɔleɛ ne. Ɛhe koso te mbaen.

¹¹ Na ɔnate kyɛ bɔne yɔleɛ nwo akatuaa ɔmma ndɛndɛ so ne ati, kuro sona ama bɔne yɔleɛ ali ye ti.

¹² Ɔwɔ nu kyɛ bɔnefoɛ ɔyɔ bɔne yɔleɛ sɔ alaa ɛyaa, ná onya ngoa tendenn de; nakoso nahorɛ nu, me de mese kyɛ bɛ bɔ besuro Nyameɛ ná bebu ye ne yeɛ okoyie bɛ yé ɔ.

¹³ Bɔnefoɛ de, ongoyie ye yé, yeɛ ye ngoa bɔ ɔte kyɛ wawoɛ ne, ɔngɔyɛ tendenn, ɔnate kyɛ onzuro Nyameɛ.

¹⁴ Nikyee mbaen bie ɔkɔ so wɔ aseɛ so. Edwirɛ bɔ ɔfata bɔnefoɛ ne yeɛ bɛfa bedi teneneefoɛ ɔ; yeɛ bɔ ɔfata teneneefoɛ ne yeɛ bɛfa bedi bɔnefoɛ ɔ. Na ngane kyɛ, ɛhe koso te mbaen.

¹⁵ Yiti me de, menwu ye kyɛ anigye te paa, ofikyɛ nikye paa biala nne berɛ mma sona wɔ wiase ndra kyɛ okodidi, ɔkɔno, ná ɔkɔgye ye nye ɔ. Ye ngoa bɔ Nyameɛ afa ama ye wɔ wiase ne, ɛfɛɛ bɔ ɔfɛ wɔ nu ne, bɔ odi kyɛ ɔfa bata ye nwo hɔ ɛne.

¹⁶ Yiti mva nziele me nye so kyɛ ngɔpena nworɛ si atee, ɔne kyɛ ngonwu ɛfɛɛ adwuma bɔ ɔkɔ so wɔ aseɛ so ɔ, kyɛbɔ sona onnya nnaa nna eyia ne kɔngɔen ne;

¹⁷ na nwuni Nyameɛ adwuma bɔ ɔyɔ amukoraa, kyɛ sona biala ngɔte bɔ ɔkɔ so wɔ wiase ɔ bo. Sona kɔfɛ ye nwo kyɛ ɔkɔfeefee nu, nakoso ɔngɔte ye bo. Nworɛfoɛ nwa nzɛ bɛse, nakoso bɛngɔhora bengonwu ye.