Nworɛ Dwirɛhanɛniɛ 6 - AHYERƐLƐ KRONGRON

¹ Edwirɛ yealɛ bie wɔ berɛ bɔ manwu ye wɔ wiase ɔ, na opuro adasa kɔme paa:

² Nyameɛ ma ebie sikaa, anwonya ne animnyam, bɔ nikyee fee biala nne berɛ bɔ ye kra pena a ongonya ɔ; nakoso Nyameɛ ɔmma ye anwoserɛ mma ɔmva sɔ nningyein ne ngye ye nye, na ɛwɔfoɛ mmom yeɛ ɔbadi ɔ. Ɛhe te mbaen, na ɔte edwirɛ yealɛ paa.

³ Sɛ sona wo mmaa ɛyaa ko ná onyi di afoɛ pee a, ɔmva ye nwo afoɛ worawora bɔ wali ɔ, sɛ wamva asetena nu nningyein paa wangye ye nye, anaakyɛ banzie ye a, ye de menwa, baa bɔ bapɔ ye ɔ po ɔte paa tra ye.

⁴ Ofikyɛ baa bɔ bapɔ ye ne, ɔba ye mbaen, osa kɔ awosii nu, na awosii kata ye dumaa so.

⁵ Asa koso, wannwu eyia, yeɛ ɔnze nikye fee, nakoso onya ye nwome ode tra sɔ sona ne.

⁶ Sɛ sɔ sona ne di afoɛ apee nyɔ po, ná wannya anigye paa biala a, aso nna neka horɛ yeɛ bɛ mukoraa bɛkɔ ɔ?

⁷ Ɛfɛɛ amukoraa bɔ sona ɔfɛ ye, ye noa aleɛ ti ɔ, nakoso odidi a ɔnde ye.

⁸ Nzikyɛ yeɛ nworɛfoɛ bɛfa bɛtra ngwaseafoɛ ɔ? Yeɛ ehianiɛ bɔ ye koso ɔse asetena bɔ odi kyɛ ɔne ateasefoɛ bɛtena ne, nzikyɛ mvasoɛ yeɛ onya ye ɔ?

⁹ Bɔ ɔwɔ berɛ bɔ wɔ nye tua ye ne, ɔte paa tra bɔ w’akɔnnɔ susu kyɛ ekonya ye ɔ. Ɛhe koso te mbaen, na ɔte dadwene mbaen.

¹⁰ Nikyee biala bɔ ɔwɔ berɛ ne, bato ye dumaa dadadada. Ebiala se kyɛbɔ kuro sona osi te ɔ. Ebiala se kyɛ, sona ngora nne ebie bɔ ye nwo yɛ se tra ye ɔ benni apereapereɛ.

¹¹ Edwudwo pee a, wɔ dwudwolɛ ne yɛ mbaen; mvasoɛ beni yeɛ sona nya ɔ?

¹² Kuro sona ngoa tikaape bɔ ɔte mbaen, bɔ ɔsẽ kɔ kyɛ wawoɛ ne, nwa yeɛ ɔse bɔ ɔte paa ma kuro sona wɔ nu ɔ? Bɔ okosi sona ye wue asi wɔ wiase ne, nwa yeɛ ɔkɔhora kɔla ye ali kohyire ye ɔ?