Nworɛ Dwirɛhanɛniɛ 5 - AHYERƐLƐ KRONGRON

Nnɛpere wɔ nwo bɔ anohoba

¹ Sɛ ɛkɔ Nyameɛ awuro a, nea wɔ nwo yé wɔ bɔ ɛkɔyɔ ɔ nwo. Ɛkɔ berɛ kotie ye a, ɔte paa tra afɔleɛ bɔ ngwaseafoɛ bɛbɔ ɔ. Ofikyɛ bɛ de, bɛnze kyɛ bɔne yeɛ bɛyɔ ɔ.

² Nnɛperepere wɔ nwo bukye wɔ noa, yeɛ nnɛperepere wɔ nwo ma edwirɛ fite wɔ noa wɔ Nyameɛ nyunu. Ofikyɛ Nyameɛ wɔ nyameɛso, yeɛ wɔ wora ɛwɔ aseɛ ye aso, yiti ma wɔ dwirɛ yɛ ndika ndika.

³ Kyɛbɔ adwenedwene pee ma sona kye laleɛ ne, sɔ ala yeɛ edwudwolɛ pee maa yɛnwu sona kwaseaa ɔ.

⁴ Sɛ ɛhyɛ Nyameɛ bɔ a, nnɛtwetwe wɔ gya ase wɔ ye tualɛ nwo, ofikyɛ ɔngyegye ngwaseafoɛ so. Tua bɔ ahyɛ ye nwo bɔ ne.

⁵ Ɔte paa kyɛ ɛngɔhyɛ bɔ tra kyɛ ɛkɔhyɛ bɔ ná anni so ɔ.

⁶ Nnɛma wɔ noa diedie wɔ kɔ bɔne nu, yeɛ nnɛkã kyire bɔfoɛ ne kyɛ wɔ noa fone. Nzu ati yeɛ odi kyɛ Nyameɛ fɛ wɔ noa dwirɛ nwo yaa ná ɔsɛkye wɔ sa noa adwuma ɔ.

⁷ Ɛkye laleɛ pee a, né wɔ dwudwolɛ mbaen mbaen asone pee, nakoso suro Nyameɛ.

⁸ Sɛ enwu kyɛ manzini bie anu besisi ehianiɛ, kyɛ bebua ndɛengyea, ɔne kyɛ bɛkatakata nahorɛ so a, nnɛma sɔ dwirɛ ne yɛ wɔ nwanwa, ofikyɛ panyi bie yeɛ ɔnea sɔ panyi ne so ɔ, na bewura mbanyi paa biemɔ abo.

⁹ Aseɛ ne aso mvasoɛ ne, ɔwɔ berɛ ma ebiala, na ɛhene bɔbɔ po, aseɛ ne aso yeɛ odidi ɔ.

¹⁰ Sona bɔ ye nye boro sikaa ne, onya sikaa a ye nye nzɔ; yeɛ bɔ ye nye boro anwonyadeɛ ne koso, ye nye nzɔ bɔ wanya ye ɔ: Ɛhe koso te mbaen.

¹¹ Mmerɛ bɔ sona anwonyadeɛ ɔkɔ so yɛ pee ne, né bɛ bɔ bedi ne koso bayɛ pee. Yiti anwonyadeɛ mene ne, nzikyɛ mvasoɛ yeɛ onya ɔ? Sana ye nye bɔ ɔfa nwu ye angome.

¹² Sɛ paaniɛ nya aleɛ kãa di oo, anaa pee di oo, ɔdafe hatee; nakoso sikaniɛ de, ye anwonya mmorosoɛ ne mma onnya nnaa nna.

¹³ Edwirɛ yealɛ paa bie wɔ berɛ bɔ manwu ye wɔ wiase ɔ. Ye ole kyɛ, sona fa ye anwonya sie toonn maa ɔkakyi ye so musue,

¹⁴ na asane to ye ma sɔ anwonya ne amukoraa fi ye sa. Ɔwɔ nu kyɛ wawo baa de, nakoso ye mukoraa fi baa ne sa.

¹⁵ Kyɛbɔ ye nwo la so yeɛ ofili oni akunu wale ne, sɔ ala yeɛ okosa kɔhɔ ɔ. Na bɔ wafɛ wanya ye ne, ɔngɔfa nu biala ngotira ye sa nu ngɔhɔ.

¹⁶ Ɛhe koso te edwirɛ yealɛ paa: kyɛbɔ osi wale ne, sɔ ala yeɛ ɔkɔhɔ ye ɔ. Na ɛfɛɛ mbaen bɔ wafɛ ne, nzikyɛ mvasoɛ yeɛ onyane ye ɔ?

¹⁷ Awosii akata ye ngyẽa mukoraa so, na ɔfa ɛyaafɛlɛ, anwonyerɛ ne aworabɔlɛ pee nu.

¹⁸ Tie, bɔ manwu ye kyɛ ɔte paa ɛhe: Ngoa tikaape bɔ Nyameɛ afa ama sona ne, ɔte paa kyɛ sona kodidi, ɔkɔno, ná ɔkɔfa bɔ wafɛ wanya ye amukoraa wɔ wiase ɔkɔgye ye nye ɔ, ofikyɛ ye bue nu deɛ ɛne.

¹⁹ Asa koso, sɛ Nyameɛ ma sona nya sikaa ne anwonyadeɛ, ná ɔma ye aporɛnuserɛ maa ɔkora didi, ná ɔfa sɔ nningyein ne ɔgye ye nye kyɛ ye bue nu deɛ ɛne, ná ɔfa bɔ wafɛ wanya ye ɔgye ye nye a, akyɛdeɛ bɔ ofi Nyameɛ berɛ ma ye hɔ ɛne.

²⁰ Sɔ sona ne ngɔma ye ngoa mmerɛ nwo adwenedwene ngɔtɔ ye so, ofikyɛ Nyameɛ ma ye asetena nu anigye odi ye ti.